Ezequiel 14:1-23
14 Izraél nia katuas balu mai no tuur iha haʼu-nia oin.+
2 Tuirmai Jeová koʼalia ba haʼu, hodi dehan:
3 “Oan-mane husi ema, mane sira-neʼe deside ona atu halo tuir sira-nia estátua sira neʼebé haʼu hakribi,* no sira tau ona fatuk sidi nian hodi halo povu monu ba sala. Entaun haʼu tenke hatán ba sira bainhira sira husu matadalan ba haʼu ka?+
4 Agora koʼalia ho sira no hatete ba sira: ‘Jeová, Naʼi Ukun-Naʼin Boot Liu, dehan nuneʼe: “Se ema Izraél ida deside ona atu halo tuir estátua sira neʼebé haʼu hakribi* no tau ona fatuk sidi nian hodi halo povu monu ba sala no nia mai atu husu matadalan husi profeta ida, haʼu, Jeová, sei hatán ba nia hodi fó kastigu neʼebé nia merese tuir ninia estátua barak neʼebé haʼu hakribi.*
5 Haʼu sei halo umakain Izraél sente laran-taʼuk tanba sira hotu hasees an ona husi haʼu no halo tuir fali estátua sira neʼebé haʼu hakribi.”’*+
6 “Entaun koʼalia ba umakain Izraél: ‘Jeová, Naʼi Ukun-Naʼin Boot Liu, dehan nuneʼe: “Fila fali mai no hasees an husi imi-nia estátua sira neʼebé haʼu hakribi* no husik imi-nia hahalok aat hotu.+
7 Tanba se ema Izraél ida ka ema estranjeiru neʼebé hela iha rai-Izraél nia leet fila kotuk ba haʼu no deside ona atu halo tuir estátua sira neʼebé haʼu hakribi* no tau fatuk sidi nian hodi halo povu monu ba sala no nia mai atu husu matadalan husi haʼu-nia profeta ida,+ haʼu, Jeová, haʼu rasik sei hatán ba nia.
8 Haʼu sei kontra nia no halo nia sai nuʼudar avizu no lia-dadolin ida, no haʼu sei halakon nia husi haʼu-nia povu nia leet.+ Nuneʼe imi sei hatene duni katak haʼu mak Jeová.”’
9 “‘Maibé se profeta neʼe hatán ba povu ho liafuan bosok, haʼu sei lolo liman hodi kontra nia no halakon nia husi haʼu-nia povu Izraél nia leet. Profeta neʼe koʼalia bosok tanba haʼu, Jeová, mak lohi profeta neʼe.+
10 Sira sei lori todan ba sira-nia sala rasik. Ema neʼebé husu matadalan ba profeta sei hetan sala neʼebé hanesan ho profeta neʼe.
11 Nuneʼe umakain Izraél sei la fila kotuk tan ba haʼu no la hafoʼer tan sira-nia an ho sira-nia hahalok sala hotu. No sira sei sai haʼu-nia povu, no haʼu sei sai sira-nia Maromak’,+ Jeová, Naʼi Ukun-Naʼin Boot Liu, mak dehan.”
12 Jeová koʼalia tan mai haʼu, hodi dehan:
13 “Oan-mane husi ema, se nasaun ida halo sala hasoru haʼu hodi la hatudu laran-metin, haʼu sei lolo liman kontra nasaun neʼe no halakon ninia ai-han,*+ no haʼu sei hamosu hamlaha boot iha rai neʼe+ no halakon tiha ema no animál sira iha neʼebá.”+
14 “Jeová, Naʼi Ukun-Naʼin Boot Liu, dehan: ‘Se karik Noé,+ Daniel+ no Job+ hela iha rai neʼe, sira naʼin-tolu sei salva deʼit sira-nia an rasik tanba sira-nia hahalok loos.’”+
15 “‘Ka se karik haʼu haruka animál fuik laʼo liu rai neʼe, haʼu sei husik sira oho ema* no halo rai neʼe sai fuik toʼo la iha tan ema neʼebé liu tanba animál fuik sira-neʼe,+
16 haʼu jura hodi haʼu-nia moris rasik katak, maski mane naʼin-tolu neʼe hela iha rai neʼe, sira mós sei la salva sira-nia oan-mane ka oan-feto. Sira sei salva deʼit sira-nia an rasik, no rai neʼe sei sai mamuk’, Jeová, Naʼi Ukun-Naʼin Boot Liu, mak dehan.”
17 “‘Ka se karik haʼu lori surik atu ataka rai neʼe+ no dehan: “Husik surik ida liu rai neʼe”, no halakon ema ho animál,+
18 haʼu jura hodi haʼu-nia moris rasik katak, maski mane naʼin-tolu neʼe hela iha rai neʼe, sira mós sei la salva sira-nia oan-mane no oan-feto. Sira sei salva deʼit sira-nia an rasik’, Jeová, Naʼi Ukun-Naʼin Boot Liu, mak dehan.”
19 “‘Ka se karik haʼu hamosu moras-peste* iha rai neʼe+ no fakar sai haʼu-nia hirus ba rai neʼe atu halakon ema no animál hodi fakar sira-nia raan,
20 haʼu jura hodi haʼu-nia moris rasik katak, maski Noé,+ Daniel+ no Job+ hela iha rai neʼe, sira mós sei la salva sira-nia oan-mane ka oan-feto. Sira sei salva deʼit sira-nia an rasik tanba sira-nia hahalok loos’,+ Jeová, Naʼi Ukun-Naʼin Boot Liu, mak dehan.”
21 “Jeová, Naʼi Ukun-Naʼin Boot Liu, dehan nuneʼe: ‘Buat hotu neʼe sei akontese bainhira haʼu lori surik, hamlaha boot, animál fuik neʼebé siʼak, no moras-peste+ hodi fakar sai haʼu-nia kastigu*+ haat neʼe ba Jeruzalein atu halakon ema no animál husi sidade neʼe.+
22 Maibé haʼu sei salva no lori sai oan-mane no oan-feto balu.+ Sira sei laʼo ba imi, no bainhira imi haree sira-nia hahalok sira, imi sei sente kmaan fali maski imi sente triste tanba haʼu fó susar ba Jeruzalein no tanba haʼu halo buat oioin ba sidade neʼe.’”
23 “Jeová, Naʼi Ukun-Naʼin Boot Liu, dehan: ‘Sira sei fó kmaan ba imi bainhira imi haree sira-nia hahalok sira, no imi sei hatene duni katak haʼu iha razaun neʼebé loos atu halo buat neʼebé haʼu halo ona ba sidade neʼe.’”+
Nota-rodapé
^ Ka “sira-nia ídolu sira neʼebé foʼer tebes”. Liafuan Ebraiku neʼe karik mai husi liafuan “teen”. Liafuan neʼe uza atu hatudu hakribi.
^ Ka “ídolu sira neʼebé foʼer tebes”.
^ Ka “ídolu barak neʼebé foʼer tebes”.
^ Ka “ídolu sira neʼebé foʼer tebes”.
^ Ka “ídolu sira neʼebé foʼer tebes”.
^ Ka “ídolu sira neʼebé foʼer tebes”.
^ Orj., “halo tohar ninia ai paun nian”. Karik neʼe refere ba ai sira neʼebé uza atu rai paun.
^ Ka “oho ema nia oan”.
^ Ka “desizaun”.
