Isaias 66:1-24
66 Jeová dehan nuneʼe:
“Lalehan mak haʼu-nia kadunan, no rai mak fatin ba haʼu atu tau haʼu-nia ain.+
Entaun, imi bele harii uma ida ba haʼu iha neʼebé?+Fatin ba haʼu atu deskansa mak iha neʼebé?”+
2 “Haʼu halo buat sira-neʼe hotu ho haʼu-nia liman rasik,Hodi nuneʼe mak buat hotu iha”, Jeová mak dehan.+
“Haʼu sei hateke ba ema neʼebé haraik an,Ba ema neʼebé neon-susar no nakdedar ba* haʼu-nia liafuan.+
3 Ema neʼebé oho karau mak hanesan ema neʼebé oho ema.+
Ema neʼebé hasaʼe bibi-malae nuʼudar sakrifísiu mak hanesan ema neʼebé halo tohar asu nia kakorok.+
Ema neʼebé hasaʼe sakrifísiu, ninia sakrifísiu neʼe mak hanesan fahi nia raan!+
Ema neʼebé fó olíbanu+ mak hanesan ema neʼebé fó sai bensaun ho liafuan masonik nian.*+
Sira hili ona atu laʼo tuir sira-nia dalan rasik,No sira gosta buat neʼebé haʼu hakribi.
4 Tan neʼe, haʼu sei buka dalan oioin atu fó kastigu ba sira,+No haʼu sei lori ba sira buat neʼebé sira taʼuk.
Tanba bainhira haʼu bolu, la iha ema ida mak hatán;Bainhira haʼu koʼalia, la iha ema ida mak rona.+
Sira kontinua halo buat neʼebé aat tuir haʼu-nia haree,No sira hili atu halo buat neʼebé halo haʼu la kontente.”+
5 Imi hotu neʼebé nakdedar ba* Jeová nia liafuan, rona ba ninia liafuan tuirmai neʼe:
“Imi-nia maun-alin odi imi no haketak an husi imi tanba haʼu-nia naran, hodi koʼalia ho laran-makerek: ‘Fó glória ba Jeová!’+
Maibé Maromak sei mosu hodi fó ksolok ba imi,No sira mak sei hetan moe.”+
6 Iha lian barullu iha sidade, lian husi templu!
Lian neʼe mosu tanba Jeová selu fali ba ninia inimigu sira tuir buat neʼebé sira merese.
7 Antes feto ida sente moras tuur-ahi nian, ninia oan moris ona.+
Antes nia sente knotak moras, nia tuur-ahi ona oan-mane ida.
8 Sé mak rona ona buat ida hanesan neʼe?
Sé mak haree ona ida-neʼe?
Rai ida bele mosu* iha loron ida deʼit ka?
Nasaun ida bele moris iha tempu ida deʼit ka?
Maibé, bainhira Siaun komesa sente moras tuur-ahi nian, nia tuur-ahi kedas ba ninia oan-mane sira.
9 Jeová, ó-nia* Maromak, husu: “Haʼu sei hanetik bebé neʼebé atu moris ona ka?
Haʼu sei halo bebé ida atu moris maibé taka netik fali ninia inan nia oan-fatin ka?”
10 Imi hotu neʼebé hadomi Jeruzalein,+ haksolok no sai kontente bá hamutuk ho sidade neʼe.+
Imi hotu neʼebé tanis tanba Jeruzalein, haksolok bá hamutuk ho sidade neʼe,
11 Hanesan inan ida fó-susu ba ninia oan toʼo bosu, nuneʼe mós Jeruzalein sei fó kmaan no tau matan ba imi.Imi sei hemu toʼo bosu no haksolok ho sidade neʼe nia glória neʼebé boot.
12 Tanba Jeová dehan nuneʼe:
“Haʼu sei halo dame sai hanesan mota+No nasaun sira-nia glória sai hanesan mota neʼebé suli makaʼas, hodi suli toʼo sidade neʼe.+
Imi sei sai hanesan labarik ida neʼebé ninia inan koʼus no fó-susuNo nia tuur halimar iha ninia inan nia hitin.
13 Hanesan inan ida fó kmaan ba ninia oan,*Nuneʼe mós haʼu sei kontinua fó kmaan ba imi;+No imi sei hetan kmaan tanba Jeruzalein.+
14 Imi sei haree ida-neʼe, no imi-nia laran sei haksolok,Imi-nia ruin sei sai hanesan duʼut matak neʼebé buras.
No Jeová nia atan sira sei hatene kona-ba ninia liman,*Maibé nia sei fó-sala ba ninia inimigu sira.”+
15 “Jeová sei mai hanesan ahi,+No ninia karreta funu nian sira mak hanesan anin-fuik,+Atu selu fali ho ninia hirus makaʼas,Atu korrije ho ahi neʼebé lakan.+
16 Tanba ho ahi mak Jeová sei tesi-lia,Sin, ho ninia surik mak nia kontra ema hotu;No Jeová sei oho ema barak tebes.”
17 Jeová dehan: “Sira neʼebé halo sira-nia an santu* no hamoos an atu bele tama ba jardín sira*+ hodi tuir estátua neʼebé iha klaran, sira neʼebé han naʼan-fahi,+ laho no buat sira seluk neʼebé la moos,+ sira hotu sei mate hamutuk.
18 Tanba haʼu hatene sira-nia hahalok no sira-nia hanoin, haʼu sei mai hodi halibur ema husi nasaun hotu no língua hotu, no sira sei mai no haree haʼu-nia glória.”
19 “Haʼu sei tau sinál ida iha sira-nia leet, no haʼu sei haruka sira balu neʼebé halai sai ona hodi bá nasaun sira, ba sira neʼebé matenek atu uza rama, katak ba sira neʼebé iha Tarsis,+ Pul no Lud,+ no mós Tubal, Javan+ no illa sira neʼebé dook tebes. Ema iha rai sira-neʼe seidauk rona kona-ba haʼu-nia hahalok no seidauk haree haʼu-nia glória; no sira neʼebé halai sai ona sei fó sai kona-ba haʼu-nia glória iha nasaun sira-nia leet.+
20 Sira sei lori sai imi-nia maun-alin sira husi nasaun hotu+ nuʼudar prezente ba Jeová. Imi-nia maun-alin hotu sei saʼe kuda, kuda-karreta, karrosa boot, kuda-mula,* no kuda-kamelu neʼebé halai lalais, hodi mai iha haʼu-nia foho santu, Jeruzalein, hanesan tempu neʼebé povu Izraél lori sira-nia prezente iha sanan neʼebé moos hodi tama ba Jeová nia uma”, Jeová mak dehan.
21 Jeová dehan: “Haʼu mós sei foti sira balu atu sai amlulik no balu sai ema Levi.”
22 Jeová dehan: “Hanesan lalehan foun no rai foun+ neʼebé haʼu halo sei hela ba nafatin iha haʼu-nia oin, nuneʼe mós imi-nia bei-oan sira no imi-nia naran sei hela ba nafatin.”+
23 “Husi fulan-foun ida toʼo fulan-foun tuirmai no husi Sábadu toʼo Sábadu,Ema hotu sei tama mai hodi hakruʼuk* iha haʼu-nia oin”,+ Jeová mak dehan.
24 “No sira sei sai bá liʼur hodi hateke ba mate-isin husi ema neʼebé kontra hasoru haʼu;Ular-oan neʼebé han sira-nia isin sei la mate,No ahi neʼebé han sira sei nunka mate,+No mate-isin sira-neʼe sei sai buat neʼebé ema hotu hakribi.”
Nota-rodapé
^ Ka “hanoin barak kona-ba”.
^ Ka karik “ema neʼebé fó hahiʼi ba estátua”.
^ Ka “hanoin barak kona-ba”.
^ Ka “moris mai”.
^ Neʼe refere ba Siaun, ka Jeruzalein.
^ Orj., “oan-mane”.
^ Ka “kbiit”.
^ Haree “Halo santu” iha Glosáriu.
^ Neʼe katak jardín espesiál neʼebé sira uza atu adora maromak falsu.
^ Neʼe mak oan husi kuda-burru aman no kuda-inan.
^ Ka “adora”.
