Isaias 7:1-25
7 Iha tempu neʼebá Liurai Acaz+ mak ukun rai-Judá. Acaz mak Jotão nia oan-mane, Uzias nia bei-oan. Iha tempu neʼe, Liurai Rezin husi rai-Síria hamutuk ho Remalias nia oan-mane Liurai Peca,+ neʼebé ukun rai-Izraél, bá halo funu hasoru Jeruzalein, maibé sira* labele manán sidade neʼe.+
2 Ema fó-hatene ba David nia umakain dehan: “Tropa Síria serbisu hamutuk ona ho tropa Efraim.”*
Entaun Acaz no ninia povu sai laran-nakdedar tebes, hanesan anin huu ai-hun sira iha ai-laran hodi halo nakdoko bá-mai.
3 Tuirmai Jeová hatete ba Isaias: “Favór ida, ó no ó-nia oan-mane Sear-Jasub,*+ bá hasoru Acaz iha bee-dalan nia rohan, bee-dalan neʼebé suli husi kolan* iha leten,+ besik dalan boot ba rai-luan neʼebé ema fase roupa.
4 Ó tenke dehan ba Acaz: ‘Hanoin didiʼak no sai kalma nafatin bá. Keta sai laran-triste, no keta taʼuk ba Liurai Rezin husi rai-Síria no Remalias nia oan-mane+ neʼebé hirus makaʼas tanba sira hanesan ai rohan rua neʼebé motuk ona.
5 Tanba Síria ho Efraim no Remalias nia oan-mane planu ona atu halo aat ba ó, hodi dehan:
6 “Mai ita saʼe bá hodi ataka Judá no sobu rahun* rai neʼe no manán rai neʼe,* no mai ita foti Tabeel nia oan-mane nuʼudar liurai ba rai neʼe.”+
7 “‘Jeová, Naʼi Ukun-Naʼin Boot Liu, dehan nuneʼe:
“Planu neʼe sei la hetan susesu,No sei la akontese.
8 Tanba Síria nia ulun mak Damasku,No Damasku nia ulun mak Rezin.
Iha tinan 65 nia laranEfraim sei rahun tiha no la sai tan nuʼudar nasaun ida.+
9 Efraim nia ulun mak Samaria,+No Samaria nia ulun mak Remalias nia oan-mane.+
Se ó-nia fiar la metin,Ó-nia ukun sei la hamriik metin.”’”
10 Jeová hatutan tan ba Acaz, hodi dehan:
11 “Husu toʼok sinál ida husi Jeová, ó-nia Maromak.+ Ó bele husu buat neʼebé kleʼan hanesan rate* ka aas hanesan lalehan.”
12 Maibé Acaz hatete: “Haʼu sei la husu, no haʼu mós sei la koko Jeová.”
13 Tuirmai Isaias dehan: “Favór ida, rona bá, oh David nia umakain. La toʼo ba imi atu koko ema nia pasiénsia ka? Imi mós hakarak atu koko Maromak nia pasiénsia ka?+
14 Tan neʼe, Jeová rasik sei fó sinál ida ba imi: Haree bá! Feto joven* ida sei sai isin-rua no tuur-ahi oan-mane ida,+ no nia sei hanaran oan neʼe Emanuel.*+
15 Labarik-mane neʼe sei han manteiga no bani-been antes tempu neʼebé nia hatene oinsá atu la simu buat aat no hili buat diʼak.
16 Tanba antes labarik-mane neʼe hatene oinsá atu la simu buat aat no hili buat diʼak, rai husi liurai naʼin-rua neʼebé halo ó taʼuk tebes, ema sei husik tiha no sai mamuk.+
17 Jeová sei lori tempu neʼebé susar hasoru ó, ó-nia povu no ó-nia aman nia umakain, susar boot neʼebé seidauk mosu husi loron neʼebé Efraim haketak an husi Judá,+ tanba Nia sei lori liurai Asíria mai.+
18 “Iha loron neʼebá, Jeová sei hakfuʼik hodi bolu lalar sira husi fatin dook iha Mota Nilo nia bee-dalan sira iha rai-Ejitu no bolu bani sira husi rai-Asíria,
19 no sira hotu sei mai no tuur iha rai naruk iha foho-leet* sira, iha fatuk boot sira-nia leet, iha ai-tarak hotu nia leten no iha fatin hotu neʼebé animál atu hemu bee.
20 “Iha loron neʼebá, liuhusi ema neʼebé serbisu hodi koi fuuk, neʼebé mai husi área Mota Eufrates,* katak liuhusi liurai Asíria,+ Jeová sei koi ó-nia ulun no ain-fulun, no mós sei koi hotu ó-nia hasarahun.
21 “Iha loron neʼebá, mane ida sei salva deʼit karau-inan ida husi karau-lubun no mós bibi-malae rua.
22 Iha loron neʼebá, sei iha susubeen barak, tan neʼe nia sei han beibeik manteiga. Ema restu hotu neʼebé moris hela iha rai neʼe sei han manteiga no bani-been.
23 “Iha loron neʼebá, fatin sira neʼebé uluk iha uvas-hun 1.000 neʼebé folin osan-mutin 1.000, sei iha deʼit ai-tarak no duʼut aat.
24 Ema sei bá neʼebá ho rama no rama-oan, tanba rai tomak sei sai nakonu ho ai-tarak no duʼut aat.
25 No foho hotu neʼebé uluk hamoos ho enxada, imi sei la laʼo besik tan tanba taʼuk ai-tarak no duʼut aat. Foho sira-neʼe hotu sei sai fatin ba karau no bibi-malae sira atu han duʼut.”
Nota-rodapé
^ Ka karik “nia”.
^ Neʼe katak Izraél.
^ Naran neʼe katak “Só ema uitoan deʼit mak sei fila fali”.
^ Ka “fatin atu rai bee”.
^ Ka karik “halo taʼuk”.
^ Ka “halo kuak iha ninia moru”. Orj., “fera ida-neʼe”.
^ Haree “Siol” iha Glosáriu.
^ Iha Bíblia Septuajinta Gregu, “Feto virjen”.
^ Naran neʼe katak “Maromak hamutuk ho ita”.
^ Orj., “Mota”.
