Salmo 49:1-20
Ba dirijente. Kora nia oan-mane sira-nia knananuk.+
49 Oh imi povu hotu, rona ida-neʼe bá.
Oh imi hotu neʼebé hela iha mundu,* see tilun didiʼak bá,
2 Imi hotu, povu kiʼik no ema-boot sira,Riku no mós kiak.
3 Haʼu-nia ibun sei koʼalia ho matenek,No haʼu-nia laran sei hanoin kleʼan+ hodi hatudu kbiit atu komprende.
4 Haʼu sei hanoin didiʼak kona-ba lia-dadolin ida;Haʼu sei toka arpa no fó sai haʼu-nia ai-sasiʼik.
5 Tanbasá mak haʼu tenke taʼuk durante tempu susar?+Tanbasá mak haʼu tenke taʼuk kuandu ema aat* sira neʼebé koko atu halakon haʼu haleʼu haʼu?
6 Ema sira neʼebé tau fiar ba sira-nia rikusoin+No sira neʼebé gaba an kona-ba sira-nia rikusoin neʼebé barak,+
7 Sira ida mós labele sosa fali maun-alin idaKa selu folin ba Maromak atu sosa fali ninia maun-alin,+
8 Folin ba ema nia moris mak karun tebesToʼo sira la iha kbiit atu selu folin neʼe;
9 Sira labele sosa fali sira-nia maun-alin ida hodi bele moris ba nafatin no la haree rate.*+
10 Sira haree katak ema matenek mós mate;Ema beik no ema neʼebé la iha neon mate hamutuk,+No sira tenke husik hela sira-nia rikusoin ba ema seluk.+
11 Sira-nia hakarak iha laran mak atu sira-nia uma iha ba nafatin,No sira-nia tenda bele dura husi jerasaun ba jerasaun.
Sira hanaran sira-nia rai tuir sira-nia naran rasik.
12 Maski ema ida simu respeitu husi ema seluk, maibé nia sei la hela ba nafatin,+Nia hanesan deʼit ho animál sira neʼebé mate.+
13 Neʼe mak ema beik sira-nia dalan moris nian,+No mós ema neʼebé laʼo tuir sira, no gosta sira-nia liafuan folin-laek sira. (Sela)
14 Sira simu kastigu hodi tama ba rate,* hanesan bibi-malae neʼebé ema lori bá atu oho.
Mate mak sei dirije sira hanesan bibi-atan;Ema laran-loos sei ukun sira+ iha dadeer.
Sira hotu sei lakon mohu;+Rate*+ mak sira-nia hela-fatin duké palásiu ida.+
15 Maibé Maromak sei sosa fali haʼu* husi rate* nia kbiit,*+Tanba Maromak sei kaer metin haʼu. (Sela)
16 Keta taʼuk se ema ida sai riku,No buat murak iha ninia uma aumenta tan,
17 Tanba bainhira nia mate, nia labele lori buat ida hamutuk ho nia;+Ninia sasán murak sira sei la tun hamutuk ho nia.+
18 Tanba durante ninia moris nia gaba an.+
Bainhira ema ida sai riku, ema seluk mós hahiʼi nia.+
19 Maibé ikusmai nia sei mate hanesan ninia beiʼala sira.
Sira sei nunka haree tan naroman.
20 Se ema ida la komprende ida-neʼe, maski nia simu respeitu husi ema seluk,+Maibé nia hanesan deʼit ho animál sira neʼebé mate.
Nota-rodapé
^ Ka “iha sistema neʼe”.
^ Orj., “kuandu hahalok sala husi”.
^ Ka “rai-kuak”.
^ Haree “Siol” iha Glosáriu.
^ Haree “Siol” iha Glosáriu.
^ Haree “Nefes” iha Glosáriu.
^ Haree “Siol” iha Glosáriu.
^ Orj., “liman”.
