EMA KRISTAUN millaun ba millaun deside atu la selebra Natál. Sira sente oinsá kona-ba sira-nia desizaun? Sira sente katak sira falta buat ruma tanba la selebra ka lae? Oan sira sente katak sira-nia inan-aman hapara sira atu hetan buat neʼebé diʼak ka lae? Haree saida mak Testemuña ba Jeová iha mundu tomak hatete kona-ba neʼe.

Hanoin-hetan fali Jesus Kristu: “Antes haʼu sai testemuña ba Jeová, haʼu ladún ba igreja, haʼu bá igreja kuandu Natál ka Páskua deʼit. Maibé iha tempu sira-neʼe mós haʼu la hanoin kona-ba Jesus Kristu. Agora haʼu la selebra tan Natál, maibé haʼu tuir reuniaun Kristaun nian semana ida dala rua no haʼu mós hanorin ema kona-ba saida mak Bíblia hatete kona-ba Jesus!”​—EVE, AUSTRÁLIA.

Kontente liu atu fó: “Haʼu kontente se derrepente deʼit ema fó prezente mai haʼu. Haʼu gosta supreza! Haʼu mós gosta halo karta no pinta dezeñu sira no fó ba ema seluk tanba neʼe halo sira sente kontente, no neʼe mós halo haʼu kontente.”​—REUBEN, IRLANDA NORTE.

Ajuda sira neʼebé presiza: “Ami gosta halo hahán ba ema neʼebé moras. Dala ruma ami lori ai-funan, dose, no prezente kiʼik atu halo sira kontente. Ami kontente tanba bele vizita ema iha tempu naran deʼit iha tinan ida nia laran.”​—EMILY, AUSTRÁLIA.

Halibur hamutuk ho família: “Ami-nia família sempre halibur hamutuk, tan neʼe ami-nia oan sira bele koñese tiu, tia, avó-mane, avó-feto no sira-nia prima no primu sira no goza tempu hamutuk. Tanba ami la presiza halo ida-neʼe iha tempu loron-boot espesífiku ruma, ami sente neʼe la hatodan ami, no ami-nia família hatene katak ami vizita sira tanba ami hadomi sira.”​—WENDY, ILLA KAIMAUN.

Dame: “Iha tempu Natál, ema barak sei okupadu tebes no ema uitoan deʼit mak sei hanoin kona-ba dame. Depois aprende tiha Bíblia nia promesa sira ba ita ema, haʼu sente kmaan. Agora, haʼu komprende katak haʼu-nia oan sira sei goza moris kontente iha futuru.”​—SANDRA, ESPAÑA.