KAPÍTULU 35

Oinsá haʼu bele sai Maromak nia belun?

Kuandu Jeremy hasoru susar ida, nia komesa komprende katak sai Maromak nia belun mak folin boot. Nia esplika: “Bainhira haʼu tinan 12, haʼu-nia apá husik hela haʼu-nia família. Kalan ida, haʼu halo orasaun iha kama leten, haʼu harohan atu haʼu-nia apá bele fila fali.”

Iha tempu triste neʼe, Jeremy komesa lee Bíblia. Bainhira nia lee liafuan iha Salmo 10:14, neʼe book duni ninia laran. Versíkulu neʼe esplika kona-ba Jeová hodi dehan: “Vítima neʼebé kbiit-laek sei husu ajuda husi Ita; Ita mak fó ajuda ba oan-kiak.” Jeremy hatete: “Haʼu sente hanesan Jeová koʼalia daudaun mai haʼu no nia fó-hatene haʼu katak nia sei ajuda haʼu; nia mak haʼu-nia Aman. Iha aman neʼebé diʼak liu fali nia ka?”

MASKI karik Ita-nia situasaun la hanesan ho Jeremy, maibé Bíblia hatudu ho klaru katak Jeová hakarak Ita atu sai ninia belun. Tuir loloos, Bíblia hatete: “Hakbesik ba Maromak, no nia sei hakbesik ba imi.” (Tiago 4:8) Hanoin toʼok kona-ba signifikadu husi liafuan sira-neʼe: Maski Ita labele haree Maromak Jeová, no nia mós iha pozisaun neʼebé aas tebes, maibé nia konvida Ita atu sai ninia belun!

Maibé atu bele sai Maromak nia belun, Ita presiza hakaʼas an. Hanoin toʼok ai-knanoik neʼe: Se Ita kuda ai-horis ida, Ita hatene katak ai-horis neʼe labele sai boot mesak. Atu ai-horis neʼe bele sai buras, Ita presiza rega beibeik no tau ai-horis neʼe iha fatin neʼebé diʼak hodi ai-horis neʼe bele buras. Ita mós presiza halo buat neʼebé hanesan se Ita hakarak sai Maromak nia belun. Saida mak bele ajuda Ita hametin ita-nia relasaun belun ho Maromak?

Estuda Bíblia mak importante

Atu bele iha relasaun belun neʼebé metin, ita presiza iha komunikasaun neʼebé diʼak, ita presiza rona no koʼalia. Ita mós presiza halo buat neʼebé hanesan se ita hakarak sai Maromak nia belun. Lee no estuda Bíblia mak dalan atu rona buat neʼebé Maromak hatete mai ita.​—Salmo 1:2, 3.

Karik Ita la gosta atu estuda. Joven barak gosta liu atu haree televizaun, halimar game, ka ransu ho kolega sira. Maibé se Ita hakarak atu sai Maromak nia belun, la iha dalan seluk. Ita presiza rona ba Maromak liuhusi estuda ninia Liafuan.

Maibé keta hanoin barak. Ita la presiza haree estuda Bíblia nuʼudar buat neʼebé todan atu halo. Ita bele aprende atu gosta estuda maski karik Ita la toman atu estuda. Buat primeiru neʼebé Ita bele halo mak buka tempu atu estuda Bíblia. Joven feto ida naran Lais hatete: “Haʼu iha oráriu metin. Dadeer-dadeer buat primeiru neʼebé haʼu halo mak lee kapítulu ida husi Bíblia.” Maria neʼebé idade 15 iha oráriu neʼebé la hanesan. Nia hatete: “Haʼu lee versíkulu balu husi Bíblia kalan-kalan antes haʼu toba.”

Atu ajuda Ita hahú estuda Bíblia, haree kaixa “ deskobre Ita-nia Bíblia”. Tuirmai, iha kraik neʼe, hakerek bainhira mak Ita bele uza minutu 30 atu estuda Maromak nia Liafuan.

․․․․․

Halo oráriu mak hakat primeiru. Kuandu Ita hahú estuda, Ita sei aprende katak dala ruma la fasil atu lee Bíblia. Karik Ita konkorda ho Jezreel neʼebé idade 11. Nia hatete: “Ita presiza konsentrasaun liután atu komprende parte balu husi Bíblia neʼebé ladún interese.” Se Ita mós sente hanesan, keta rende an. Haree estuda Bíblia nuʼudar oportunidade atu rona ba Maromak Jeová, Ita-nia belun. Se Ita hakaʼas an, ikusmai Ita sei gosta atu estuda Bíblia no bele hetan benefísiu!

Orasaun mak importante tebes

Orasaun mak dalan ida ba ita atu koʼalia ba Maromak. Orasaun mak prezente neʼebé furak tebes! Ita bele koʼalia ba Maromak iha tempu naran deʼit, husi dadeer toʼo kalan. Nia sempre prontu atu rona ba Ita. Laʼós neʼe deʼit, nia mós hakarak atu rona buat neʼebé Ita hatete. Tan neʼe Bíblia anima Ita atu “iha situasaun hotu husu ajuda husi Maromak liuhusi orasaun no harohan no mós fó agradese”.​—Filipe 4:6.

Hanesan eskritura neʼe hatudu, iha buat barak neʼebé Ita bele temi iha Ita-nia orasaun ba Jeová. Ita bele koʼalia kona-ba Ita-nia problema no mós buat neʼebé halo Ita laran-taridu. Ita mós bele fó agradese kona-ba buat oioin neʼebé Ita iha. Tuir loloos, Ita sempre hanoin-hetan atu fó obrigadu bainhira Ita-nia belun halo buat diʼak ba Ita, loos ka lae? Ita mós bele fó obrigadu ba Jeová tanba nia fó ona no halo buat diʼak ba Ita barak liu fali Ita-nia belun sira.​—Salmo 106:1.

Iha kraik neʼe, hakerek tanbasá Ita agradese ba Jeová.

․․․․․

Dala ruma, Ita bele sente taʼuk no laran-taridu. Salmo 55:22 hatete: “Entrega ó-nia laran-susar ba Jeová, no nia sei apoia ó. Nia sei nunka husik ema laran-loos atu monu.”

Iha liña tuirmai, hakerek kona-ba buat sira neʼebé halo Ita hanoin barak no hakarak temi iha Ita-nia orasaun.

․․․․․

Esperiénsia sira

Iha mós buat importante seluk neʼebé Ita labele haluha husi Ita-nia relasaun belun ho Maromak. David hakerek: “Koko no haree katak Jeová mak diʼak.” (Salmo 34:8) Kuandu David hakerek Salmo kapítulu 34, nia foin hasoru esperiénsia neʼebé halo nia taʼuk. Nia halai husi Liurai Saul neʼebé hakarak atu oho nia. Maibé tuirmai nia presiza buka protesaun iha ema Filístia nia leet. Tanba ninia moris iha perigu laran, David ho matenek finje katak nia bulak no ikusmai bele hasees an husi perigu.​—1 Samuel 21:10-15.

David la hanoin katak nia bele hasees an husi perigu tanba ninia forsa rasik, maibé nia fó hahiʼi ba Jeová. Iha salmo neʼebé temi iha parágrafu antes neʼe, David hatete: “Haʼu harohan ba Jeová, no nia hatán haʼu. Nia salva ona haʼu husi buat hotu neʼebé halo haʼu taʼuk.” (Salmo 34:4) Husi David nia esperiénsia rasik, nia bele anima ema seluk atu “koko no haree katak Jeová mak diʼak”. *

Ita rasik bele ka lae hanoin-hetan esperiénsia ida neʼebé hatudu katak Jeová hanoin Ita? Se nuneʼe, hakerek ida-neʼe iha kraik. Sujestaun: La presiza esperiénsia neʼebé úniku. Koko atu hanoin kona-ba bensaun simples sira neʼebé Ita rasik sente loroloron, bensaun neʼebé dala ruma ema haree nuʼudar buat neʼebé baibain deʼit.

․․․․․

Karik Ita-nia inan-aman hanorin ona Ita kona-ba Bíblia. Se nuneʼe, neʼe mak bensaun ida. Maski nuneʼe, Ita rasik presiza haburas relasaun belun ho Maromak. Se Ita seidauk halo ida-neʼe, Ita bele uza informasaun neʼe atu ajuda Ita. Jeová sei fó bensaun ba Ita-nia hakaʼas an. Bíblia hatete: “Kontinua husu, no imi sei simu. Kontinua buka, no imi sei hetan.”​—Mateus 7:7.

[Nota-rodapé]

ESKRITURA

“Ksolok ba sira neʼebé hatene katak sira presiza Maromak nia matadalan.”​—Mateus 5:3.

SUJESTAUN

Se loroloron, Ita lee pájina lima husi Bíblia, ikusmai Ita bele lee Bíblia tomak durante tinan ida.

ITA HATENE KA LAE, . . . ?

Tuir loloos, hodi lee informasaun neʼe no halo tuir konsellu sira neʼebé bazeia ba Bíblia, ida-neʼe hatudu katak Jeová hanoin Ita.​—João 6:44.

HAʼU-NIA PLANU!

Atu bele hetan benefísiu liután husi haʼu-nia estuda Bíblia mesak, haʼu sei ․․․․․

Atu bele halo orasaun beibeik, haʼu sei ․․․․․

Haʼu bele husu saida ba haʼu-nia inan-aman kona-ba tópiku neʼe ․․․․․

ITA HANOIN OINSÁ?

● Saida mak Ita bele halo atu bele gosta liután estuda Bíblia?

● Tanbasá Jeová hakarak rona ema la perfeitu nia orasaun?

● Saida mak Ita bele halo atu hadiʼa liután Ita-nia orasaun?

[Liafuan neʼebé foti husi pájina 291]

“Kuandu haʼu sei kiʼik, haʼu sempre temi beibeik buat neʼebé hanesan iha haʼu-nia orasaun. Agora, haʼu koko atu temi kona-ba buat diʼak no buat aat sira neʼebé akontese iha haʼu-nia moris loroloron. Tanba loron ida-idak la hanesan, neʼe ajuda haʼu atu la temi beibeik buat neʼebé hanesan.”​—Eve

[Kaixa/​Dezeñu]

 Deskobre Ita-nia Bíblia

1. Hili istória ida husi Bíblia neʼebé Ita hakarak lee. Halo orasaun hodi husu matenek husi Jeová atu Ita bele komprende didiʼak istória neʼe.

2. Lee didiʼak. Keta ansi. Bainhira lee, uza Ita-nia imajinasaun. Uza didiʼak Ita-nia sentidu hotu: Koko atu haree situasaun, rona ema nia lian iha istória neʼe, horon morin ka iis, koko hahán sira, no buat seluk tan. Halo istória neʼe moris iha Ita-nia neon!

3. Hanoin kona-ba buat neʼebé Ita foin lee. Hanoin toʼok kona-ba pergunta sira tuirmai:

● Tanbasá Jeová inklui istória neʼe iha ninia Liafuan?

● Husi istória neʼe, sé-nia hahalok mak haʼu bele banati-tuir no sé-nia ezemplu mak haʼu presiza hanoin-hetan nuʼudar avizu?

● Lisaun saida mak haʼu bele aprende husi istória neʼe?

● Istória neʼe hanorin haʼu saida kona-ba Jeová no ninia hahalok sira?

4. Halo orasaun badak ba Jeová. Fó-hatene ba nia buat neʼebé Ita aprende husi Bíblia no Ita-nia planu kona-ba oinsá Ita atu aplika ida-neʼe iha Ita-nia moris. Sempre hatoʼo agradese ba Jeová kona-ba ninia prezente, Bíblia!

[Dezeñu]

“Ita-nia liafuan mak ahi-oan neʼebé leno haʼu-nia ain, no naroman ba haʼu-nia dalan.”​—Salmo 119:105.

[Kaixa/​Dezeñu]

Tau uluk buat neʼebé importante

Ita okupadu toʼo la iha tempu atu halo orasaun ka lae? Ita la iha tempu atu estuda Bíblia ka lae? Baibain, ida-neʼe liga ho buat neʼebé Ita tau uluk iha Ita-nia moris.

Koko toʼok ida-neʼe: Foti balde ida, tuirmai tau fatuk boot balu iha balde laran. Agora enxe balde neʼe ho rai-henek toʼo nakonu. Ita agora iha balde neʼebé nakonu ho fatuk no rai-henek.

Agora halo mamuk balde neʼe, maibé tau ketak fatuk no mós rai-henek. Agora koko fali ho prosesu neʼebé la hanesan: Primeiru enxe uluk rai-henek iha balde, no tuirmai koko tau fatuk sira iha balde laran. La toʼo, loos ka lae? Ida-neʼe tanba Ita tau uluk rai-henek iha balde laran.

Lisaun importante mak saida? Bíblia hatete: “Buka-hatene loloos buat sira neʼebé importante liu.” (Filipe 1:10) Se Ita tau uluk buat kiʼik sira hanesan atividade halimar nian, Ita sei nunka iha tempu atu halo buat boot sira hanesan atividade espirituál sira. Maibé se Ita halo tuir Bíblia nia matadalan, Ita sei haree rasik katak Ita iha tempu natoon atu halo buat espirituál nian no mós atividade halimar nian. Neʼe depende ba buat neʼebé Ita tau uluk ba Ita-nia balde laran!

[Dezeñu]

Ita-nia relasaun belun ho Jeová mak hanesan ai-horis ida, atu bele moris, ita presiza tau matan didiʼak ida-neʼe