Bainhira bebé foin moris, feen-laʼen sira sente kontente tebes, maibé ida-neʼe mós bele halo sira hanoin barak. Bainhira foin sai inan-aman, karik imi hakfodak tanba agora tenke uza tempu no forsa barak atu tau matan ba bebé. Tanba imi ladún toba no emosaun mós tun-saʼe, ida-neʼe bele lori susar ba imi-nia moris kaben nian. Imi naʼin-rua presiza prontu atu halo mudansa hodi tau matan didiʼak ba imi-nia oan, no mós halo imi-nia moris kaben nian metin nafatin. Oinsá mak konsellu husi Bíblia bele ajuda imi atu hasoru situasaun hanesan neʼe?

BUAT NEʼEBÉ BÍBLIA HANORIN: “Domin mak pasiénsia no laran-diʼak.” No mós, domin “la buka nia rasik nia diʼak, la sai hirus lalais”. (1 Korinto 13:4, 5) Kuandu Ita foin sai inan ida, Ita sei tau matan liuliu ba bebé nia presiza. Maibé, labele haluha katak Ita-nia laʼen mós presiza Ita-nia atensaun. Selae, nia bele sente katak Ita la hadomi tan nia. Ho pasiénsia no laran-diʼak, ajuda Ita-nia laʼen atu sente katak Ita presiza nia no nia mós bele ajuda Ita atu tau matan ba bebé.

Bíblia mós hatete: “Imi laʼen sira, kontinua moris ho imi-nia feen hodi komprende sira ho didiʼak.” (1 Pedro 3:7) Ita tenke komprende katak Ita-nia feen sei uza tempu no forsa barak atu tau matan ba bebé. Tanba agora nia iha knaar foun, nia bele sente kole, hanoin barak ka laran-tun. Dala ruma, nia bele hirus Ita, maibé hakaʼas an atu kalma nafatin, tanba ema “neʼebé la hirus lalais diʼak liu fali mane ida neʼebé forsa”. (Provérbios [Amsal] 16:32) Hatudu matenek hodi hanoin didiʼak kona-ba situasaun no apoia Ita-nia feen.—Provérbios (Amsal) 14:29.

BUAT NEʼEBÉ ITA BELE HALO:

• Aman sira: Ajuda Ita-nia feen atu tau matan ba bebé, maski iha kalan boot. Atu bele gasta tempu barak hamutuk ho Ita-nia feen no oan, karik presiza hamenus tempu neʼebé Ita uza atu halo atividade seluk

• Inan sira: Kuandu Ita-nia laʼen hakarak ajuda Ita atu tau matan ba bebé, husik nia atu halo nuneʼe. Maski nia halo buat ruma laloos, labele hatún nia, maibé ho laran-diʼak hatudu ba nia oinsá mak nia bele halo diʼak liután

BUAT NEʼEBÉ BÍBLIA HANORIN: “Sira sei sai isin ida deʼit.” (Gênesis [Kejadian] 2:24) Maski imi-nia uma-laran aumenta tan ema ida, maibé Ita ho Ita-nia kaben nafatin “isin ida deʼit”. Nuneʼe, hakaʼas an atu halo imi-nia relasaun metin nafatin.

Feen sira, hatudu agradese ba Ita-nia laʼen nia ajuda no apoia. Ita-nia liafuan neʼebé anima nia bele sai hanesan ai-moruk neʼebé “kura” nia laran. (Provérbios [Amsal] 12:18) Laʼen sira, fó-hatene ba Ita-nia feen katak Ita hadomi tebes no hafolin nia. Gaba nia tanba nia tau matan didiʼak ba família.—Provérbios (Amsal) 31:10, 28.

“Ema ida-idak tenke kontinua buka uluk ema seluk nia diʼak, laʼós nia rasik nia diʼak.” (1 Korinto 10:24) Sempre buka uluk Ita-nia kaben nia diʼak. Nuʼudar feen-laʼen, buka tempu atu koʼalia ba malu, gaba malu, no rona ba malu. Labele hanoin an deʼit kona-ba imi-nia presiza seksuál nian. Hanoin kona-ba Ita-nia kaben nia presiza. Bíblia hatete: “Keta hanetik imi-nia kaben nia direitu.” (1 Korinto 7:3-5) Tan neʼe, koʼalia nakloke kona-ba ida-neʼe. Se imi hatudu pasiénsia no komprende malu, imi sei hametin liután imi-nia relasaun.

BUAT NEʼEBÉ ITA BELE HALO:

• Labele haluha atu buka tempu ba imi naʼin-rua deʼit atu hamutuk

• Halo Ita-nia kaben sente katak Ita hadomi nia. Porezemplu, fó prezente kiʼik ka halo buat ruma neʼebé fó ksolok ba nia

BUAT NEʼEBÉ BÍBLIA HANORIN: “Husi kiʼik kedas ó hatene ona buat neʼebé hakerek iha livru santu, neʼebé fó matenek ba ó hodi hetan salvasaun.” (2 Timóteo 3:15) Halo planu oinsá atu hanorin imi-nia bebé. Maski nia sei iha inan nia knotak, maibé nia bele aprende buat barak ona. Porezemplu, nia bele hatene inan nia lian no sentimentu. Tan neʼe, diʼak atu lee livru sira ba nia husi kiʼik kedas. Maski nia seidauk bele komprende, maibé ida-neʼe bele ajuda nia atu gosta lee bainhira nia sai boot.

Husi kiʼik kedas imi presiza koʼalia ba nia kona-ba Maromak. Halo orasaun ba Jeová hodi nia bele rona. (Deuteronômio [Ulangan] 11:19) Bainhira imi halimar ho nia, imi bele koʼalia kona-ba buat neʼebé Maromak kria. (Salmo [Mazmur] 78:3, 4) Nuʼudar imi-nia oan sai boot, nia sei haree katak imi hadomi Jeová no nia mós sei aprende atu hadomi Jeová.

BUAT NEʼEBÉ ITA BELE HALO:

• Harohan hodi husu matenek atu bele hanorin imi-nia bebé

• Repete beibeik liafuan balu ba bebé hodi nia bele aprende husi kiʼik kedas