LISAUN 07
Jeová mak hanesan saida?
Bainhira Ita hanoin kona-ba Maromak Jeová, Ita sente oinsá? Ita sente nia mak kmanek no dook tebes husi Ita, hanesan fitun sira neʼebé dook tebes ka lae? Ka Ita imajina nia nuʼudar forsa deʼit neʼebé la iha hahalok ruma? Loloos Jeová mak hanesan saida? Liuhusi ninia Liafuan, Bíblia, Jeová fó sai ninia hahalok balu, no mós fó sai katak nia interese ba Ita.
1. Tanbasá ita labele haree Maromak?
“Maromak mak Espíritu.” (João 4:24) Maromak Jeová la iha isin hanesan ita ema. Nia mak Espíritu neʼebé hela iha lalehan, fatin neʼebé ita labele haree.
2. Jeová nia hahalok balu mak hanesan saida?
Maski ita labele haree Jeová, maibé kuandu ita hatene ona kona-ba nia, ita sei hadomi nia tanba ninia hahalok sira neʼebé furak. Bíblia hatete: “Jeová hadomi justisa, no nia sei nunka husik hela ninia ema sira neʼebé laran-metin.” (Salmo 37:28) Nia mós “iha domin neʼebé boot tebes no laran-sadiʼa”, liuliu ba ema neʼebé hasoru terus. (Tiago 5:11) “Jeová besik ema sira neʼebé laran-kanek; nia salva sira neʼebé laran-triste.” (Salmo 34:18) Ita-nia hahalok mós bele kona Jeová. Ema neʼebé hili atu halo buat neʼebé aat, halo Jeová nia laran-triste. (Salmo 78:40, 41) Maibé ema neʼebé halo buat neʼebé diʼak, halo Jeová nia laran-kontente.—Lee Provérbios 27:11.
3. Oinsá mak Jeová hatudu katak nia hadomi ita?
Jeová nia hahalok ida neʼebé furak liu mak domin. Tuir loloos, “Maromak mak domin”. (1 João 4:8) Jeová fó sai ninia domin, laʼós deʼit liuhusi Bíblia maibé mós liuhusi ninia kriasaun sira. (Lee Apóstolu 14:17.) Porezemplu, hanoin toʼok kona-ba oinsá nia kria ita. Nia fó ita abilidade atu haree kór furak sira, rona ba múzika, no sente hahán nia gostu. Nia hakarak ita atu moris kontente.
KEʼE KLEʼAN
Aprende kona-ba saida mak Jeová uza atu halo buat furak oioin. No haree oinsá Jeová hatudu sai ninia hahalok furak sira.
4. Espíritu santu mak Maromak nia forsa
Hanesan ita uza liman atu halo serbisu, Jeová uza ninia espíritu santu atu halo buat oioin. Bíblia hatete katak espíritu santu laʼós maromak ida, maibé forsa neʼebé Maromak uza hodi halo buat barak. Lee Lucas 11:13 no Apóstolu 2:17, depois koʼalia hamutuk kona-ba pergunta tuirmai:
-
Maromak sei “fakar” ninia espíritu santu ba ema neʼebé husu ba nia. Entaun, Ita hanoin espíritu santu mak maromak ida? Ka neʼe mak Maromak nia forsa? Tanbasá Ita hatán nuneʼe?
Jeová uza ninia espíritu santu atu kumpre buat barak. Lee Salmo 33:6 a no 2 Pedro 1:20, 21, depois koʼalia hamutuk kona-ba pergunta tuirmai:
-
Iha dalan saida deʼit mak Jeová uza ninia espíritu santu?
5. Jeová iha hahalok furak oioin
Moisés serbí Maromak ba tinan barak, maibé nia nafatin sente katak nia presiza hatene Maromak diʼak liután. Tan neʼe Moisés husu: “Halo haʼu hatene Ita-nia dalan sira, atu nuneʼe haʼu bele hatene Ita.” (Éxodo 33:13) Jeová esplika ba Moisés kona-ba nia mak Maromak hanesan saida. Lee Éxodo 34:4-6, depois koʼalia hamutuk kona-ba pergunta tuirmai:
-
Jeová fó sai ninia hahalok saida deʼit ba Moisés?
-
Jeová nia hahalok saida mak Ita gosta liu?
6. Jeová hanoin ema
Uluk Maromak nia povu, ema Ebreu sai atan iha Ejitu. Jeová sente oinsá kona-ba terus neʼebé sira hasoru? Loke ÁUDIO no lee Éxodo 3:1-10. Depois koʼalia hamutuk kona-ba pergunta tuirmai.
-
Husi istória neʼe, tuir Ita-nia hanoin saida mak Jeová sente kona-ba ema nia terus?—Haree versíkulu 7 no 8.
-
Tuir Ita-nia hanoin, Jeová hakarak duni atu ajuda ema no nia iha kbiit atu halo nuneʼe ka lae? Tanbasá?
7. Kriasaun hatudu sai Jeová nia hahalok sira
Jeová hatudu sai ninia hahalok sira liuhusi buat neʼebé nia kria. Loke VÍDEO. Depois lee Roma 1:20, no koʼalia hamutuk kona-ba pergunta tuirmai.
-
Jeová nia hahalok saida deʼit mak Ita haree liuhusi buat neʼebé nia halo?
EMA BALU DEHAN: “Ita labele koñese didiʼak Maromak tanba ita labele haree nia.”
-
Ita hanoin oinsá?
-
Tanbasá Ita hanoin nuneʼe?
PONTU IMPORTANTE
Jeová mak Espíritu neʼebé ita labele haree. Maibé nia iha hahalok furak barak no ida neʼebé furak liu mak domin.
Rezumu
-
Tanbasá ita labele haree Jeová?
-
Saida mak espíritu santu?
-
Jeová iha hahalok hanesan saida deʼit?
BUKA-HATENE LIUTÁN
Aprende liután kona-ba Jeová nia hahalok haat neʼebé importante liu.
“Maromak nia hahalok hanesan saida?” (Livru Haklaken No. 1 2019)
Haree evidénsia neʼebé hatudu katak Jeová la hela iha fatin hotu-hotu.
“Maromak iha fatin hotu-hotu ka lae?” (Informasaun iha jw.org/tdt)
Haree tanbasá Bíblia temi espíritu santu nuʼudar Maromak nia liman.
Mane ida neʼebé defisiente matan sente susar atu fiar katak Maromak hadomi nia. Haree toʼok saida mak troka ninia hanoin neʼe.
“Agora haʼu bele ajuda ema seluk” (Informasaun husi Livru Haklaken)
a Liafuan Ebraiku neʼebé tradús nuʼudar “iis” iha Salmo 33:6 bele mós refere ba “espíritu santu”.
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
