Buka ajuda

“Ema bele manán ema neʼebé mesak deʼit, maibé ema naʼin-rua hamutuk bele kontra nia.”​—Eclesiastes 4:12.

BAINHIRA ema seluk apoia ita, ita sei hetan duni susesu atu kontra inimigu naran deʼit. Tan neʼe, se Ita hakarak atu manán Ita-nia toman atu fuma, diʼak atu buka ajuda husi Ita-nia família no mós belun sira, ka husi ema sira neʼebé hakarak duni apoia Ita no hatudu pasiénsia.

Buka ajuda husi ema sira neʼebé konsege manán ona toman atu fuma, tanba sira sei hatudu laran-sadiʼa no mós fó sujestaun diʼak atu ajuda Ita. Torben husi rai-Dinamarka hatete: “Ajuda husi ema seluk mak folin-boot tebes.” Abraham neʼebé hela iha rai-Índia hatete: “Domin husi haʼu-nia família no maluk Kristaun sira ajuda tebes haʼu atu para fuma.” Maibé dala ruma la toʼo atu simu deʼit apoia husi família no belun sira.

Mane ida naran Bhagwandas hatete: “Haʼu fuma durante tinan 27, maibé tanba haʼu aprende saida mak Bíblia hanorin kona-ba toman sira neʼebé la moos, haʼu deside atu para fuma. Haʼu koko atu hamenus sigarru hira mak haʼu fuma. Haʼu hili belun foun. No haʼu bá konsulta. Maibé labele para fuma. Ikusmai, iha kalan ida, haʼu fakar sai haʼu-nia laran ba Maromak Jeová no husu nia atu ajuda haʼu para fuma. Ikusmai haʼu konsege para fuma.”

Buat importante ida tan neʼebé Ita presiza halo mak prepara ba susar neʼebé karik Ita sei hasoru. Saida mak neʼe? Informasaun tuirmai sei esplika kona-ba neʼe.

[Kaixa]

HAʼU PRESIZA UZA AI-MORUK KA LAE?

Kompañia barak hetan osan barak tanba halo ai-moruk atu ajuda ema para fuma, hanesan emplastru nikotina. Antes uza ai-moruk hanesan neʼe, hanoin uluk pergunta sira tuirmai:

Neʼe lori benefísiu saida? Doutór barak dehan katak neʼe sei halo fasil ba ema atu para fuma tanba hamenus sintoma la diʼak neʼebé mosu kuandu sira para fuma. Maibé iha mós ema barak neʼebé duvida kona-ba benefísiu neʼe sei dura ba tempu kleur ka lae.

Neʼe iha risku saida? Ai-moruk balu iha risku ruma, hanesan laran-saʼe, depresaun, no hanoin atu oho an. Hanoin-hetan mós katak ai-moruk sira hanesan neʼe mak droga seluk neʼebé iha risku oioin ba ita-nia saúde. Tan neʼe, ema neʼebé uza ai-moruk sira hanesan neʼe sei dependente ba ida-neʼe.

Iha dalan seluk ka lae? Peskiza ida dehan katak porsentu 88 husi ema neʼebé konsege para fuma hatete katak sira konsege para maski la uza ai-moruk.