BUAT NEʼEBÉ EMA HANOIN

Ema balu hanoin katak Paraízu mak istória neʼebé ema inventa deʼit. Maibé ema seluk fiar katak Paraízu mak fatin ida hanesan jardín furak neʼebé ema diʼak sira sei hela ba nafatin no haksolok ho sira-nia moris.

BUAT NEʼEBÉ BÍBLIA HANORIN

Ohin loron, ema uza liafuan “paraízu” atu koʼalia kona-ba ema primeiru nia hela-fatin, katak jardín Eden. (Gênesis 2:7-15) Bíblia hatudu katak jardín Eden mak fatin ida neʼebé loos, no kaben-naʼin primeiru hela duni iha fatin neʼe. Sira moris ho saúde diʼak no iha oportunidade atu moris ba nafatin. (Gênesis 1:27, 28) Maibé tanba kaben-naʼin neʼe la halo tuir Maromak, sira lakon sira-nia hela-fatin neʼebé furak. Maski nuneʼe, Bíblia fó-hatene nanis katak iha futuru, mundu neʼe sei sai fali Paraízu no ema sei bele moris ho kontente iha neʼebá.

TANBASÁ MAK IDA-NEʼE IMPORTANTE BA ITA?

Maromak hadomi ema, tan neʼe ita bele fiar katak nia sei fó moris kapás ba ninia atan sira iha fatin neʼebé furak, katak Paraízu. No Maromak mós fó-hatene ba ema buat neʼebé sira presiza halo atu Maromak bele simu sira. Bíblia hatete katak se Ita aprende kona-ba Maromak no hodi halo tuir ninia ukun-fuan sira, Maromak bele simu Ita.—Joao 17:3; 1 Joao 5:3.

“Maromak Jeová halo jardín ida iha Eden, . . . no iha neʼebá nia tau ema neʼebé nia kria.”—Gênesis (Kejadian) 2:8.

BUAT NEʼEBÉ EMA HANOIN

Ema balu fiar katak Paraízu mak iha lalehan, maibé ema seluk fali fiar katak iha futuru, mundu tomak sei sai Paraízu.

BUAT NEʼEBÉ BÍBLIA HANORIN

Iha tempu uluk, Maromak Jeová halo Paraízu, ka jardín Eden, iha rai neʼe. Ninia hakarak mak rai neʼe atu sai ema nia hela-fatin ba nafatin. Bíblia hatete katak ita-nia planeta mundu sei iha toʼo tempu neʼebé la bele sura, katak sei nunka lakon. (Salmo [Mazmur] 104:5) Bíblia mós hatete: “Lalehan mak Jeová ninian, maibé rai neʼe, nia fó ba ema.”—Salmo 115:16.

Tan neʼe, ita la hakfodak katak Bíblia promete rai neʼe sei sai Paraízu. Maromak sei fó moris ba nafatin ba ema iha Paraízu, no ema hotu sei moris ho dame no unidade. Moras no terus sei la iha ona. No ema hotu sei moris haksolok hodi halo serbisu oioin iha rai neʼe.—Isaías 65:21-23.

“Neʼe mak Maromak nia horik-fatin iha ema sira leet, . . .  mate la iha ona, no ema sei la tanis tan eh laran-susar.”—Apokalipse 21:3, 4.

BUAT NEʼEBÉ EMA HANOIN

Relijiaun barak hanorin katak ema diʼak deʼit mak sei moris iha Paraízu. Maibé ema iha hanoin oioin kona-ba buat saida deʼit mak ema tenke halo atu sira bele sai ema “diʼak”. Porezemplu, ema balu hanoin katak hodi bá igreja no repete beibeik orasaun mak toʼo ona ba sira.

BUAT NEʼEBÉ BÍBLIA HANORIN

Bíblia hanorin katak “ema loos” sei hela iha Paraízu. Maibé sé mak “ema loos” tuir Maromak nia haree? Maski ema ida bá igreja beibeik, maibé se nia la halo tuir Maromak nia hakarak, nia laʼós ema neʼebé loos. Bíblia hatete: “Jeová haksolok ho buat-karan no sakrifísiu liu fali halo tuir Jeová nia liafuan ka lae? Haree! Halo tuir diʼak liu fali sakrifísiu.” (1 Samuel 15:22) Neʼe hatudu katak, “ema loos” neʼebé sei moris ba nafatin iha Paraízu mak ema neʼebé halo tuir Maromak nia ukun-fuan sira neʼebé hakerek iha Bíblia.

BUAT NEʼEBÉ ITA BELE HALO

Hodi halo tuir Maromak nia ukun-fuan sira, neʼe la envolve deʼit katak Ita tenke bá igreja beibeik. Liuhusi ita-nia hahalok loroloron nian mak ita bele halo Maromak kontente ka triste. Tuir loloos, la susar ba ita atu halo Maromak kontente. Ita bele aprende oinsá atu halo Maromak kontente hodi estuda Bíblia ho didiʼak. Bíblia hatete katak Maromak “nia ukun-fuan la susar mai ita”. (1 Joao 5:3) Kuandu ita hakaʼas an atu halo tuir Maromak, nia sei kontente hodi fó bensaun mai ita no fó ita oportunidade atu moris iha Paraízu.

“Ema loos rasik sei simu rai, no sira sei moris ba nafatin iha neʼebá.”—Salmo 37:29.