MAROMAK MAK KRIA KA LAE?

Manduku neʼebé moris husi inan nia ibun

LOKE

MANDUKU oin ida (Rheobatrachus) iha rai-Austrália moris liuhusi prosesu neʼebé la hanesan baibain. Bainhira manduku inan neʼe tolun ona, nia tolan fali nia tolun, no luut tolun sira-neʼe iha ninia estómagu laran maizumenus ba semana neen. Ikusmai, tolun sira-neʼe sai manduku ona bainhira sai husi inan nia ibun.

Tanba manduku inan nia estómagu mak sai fali oan-fatin, durante tempu neʼe, nia la han buat ida, ninia estómagu mós la prodús ona ásidu (asam lambung) hodi labele estraga tolun sira. Sientista sira fiar katak kímika neʼebé sai husi tolun ho kamuda sira mak hapara inan nia estómagu atu la prodús tan ásidu.

Manduku inan bele tolan tolun maizumenus 24 dala ida deʼit. Tan neʼe, bainhira oan sira besik ona atu sai husi inan nia ibun, inan nia isin todan tebes tanba todan porsentu 40 mak husi ninia oan sira. Se kompara ho ema karik, neʼe hanesan feto ida ho todan 68 kg neʼebé sai isin-rua, no iha ninia oan-fatin iha bebé hamutuk 24 neʼebé ida-idak ho todan 1,8 kg! Bainhira manduku oan sira sai boot, manduku inan nia estómagu mós sai boot tebes no habit metin ninia pulmaun toʼo inan tenkesér dada iis liuhusi isin-kulit deʼit.

Baibain, manduku oan sai ida-ida husi inan nia ibun ba loron balu nia laran. Maibé se manduku inan sente perigu ruma atu mosu ba nia, nia sei muta sai deʼit ninia oan sira. Sientista sira haree manduku inan ida muta sai ninia oan hamutuk naʼin-neen dala ida deʼit, oan sira-neʼe katiik sai aas toʼo besik metru ida.

Se manduku neʼe nia prosesu atu moris mak tuir evolusaun karik, hanesan ema balu nia hanoin, neʼe katak manduku nia estómagu tenkesér halo mudansa boot tebes durante prosesu evolusaun neʼe. Sientista ida neʼebé apoia evolusaun naran Michael J. Tyler hatete: “Kona-ba manduku neʼe nia prosesu atu moris, karik neʼe la bele muda an neineik-neineik. Atu prosesu neʼe laʼo ho diʼak, tenkesér iha mudansa boot kedas neʼebé akontese dala ida deʼit, laʼós mudansa neineik-neineik.” Ema balu fiar katak mudansa boot ida-neʼe tanba Maromak mak kria. *

Tuir Ita-nia hanoin oinsá? Manduku neʼe nia prosesu atu moris mai husi evolusaun ka lae? Ka Maromak mak kria ida-neʼe?

^ par. 7 Iha Charles Darwin nia livru Origin of Species, dehan: ‘Selesaun naturál mak prosesu ida neʼebé animál ka ai-horis sira halo mudansa kiʼik hodi adapta ba ambiente foun neʼebé haleʼu sira; mudansa neʼe tenkesér muda an neineik-neineik, nunka akontese dala ida deʼit.’