HUSI Testemuña sira neʼebé serbí ho laran-manas iha rai neʼebé presiza haklaken-naʼin tan, barak mak irmán klosan. Balu serbí iha rai seluk ba tempu kleur ona. Saida mak ajuda sira iha tempu neʼebá atu muda ba rai seluk? Saida mak sira aprende hodi serbí iha rai seluk? Agora sira halaʼo moris oinsá? Ami halo entrevista ho irmán balu neʼebé serbí ona iha rai seluk. Ita hotu bele aprende husi sira-nia ezemplu, liuliu se Ita mak irmán klosan ida neʼebé hakarak tebes hola parte iha serbisu neʼebé sei lori ksolok boot ba Ita.

Dala ruma Ita hanoin ka lae, katak nuʼudar pioneiru klosan ida, Ita bele muda atu serbí iha rai seluk? Anita, agora tinan 75, uluk iha duvida boot kona-ba ninia matenek. Nia boot iha rai-Inglaterra no foti pioneiru bainhira nia tinan 18. Nia hatete: “Haʼu gosta tebes hanorin ema kona-ba Jeová, maibé haʼu nunka hanoin katak haʼu bele muda ba rai seluk. Uluk haʼu nunka aprende língua seluk tanba haʼu sente neʼe susar tebes mai haʼu. Tan neʼe mak bainhira haʼu simu konvite atu tuir Eskola Gilead, haʼu hakfodak tebes. Haʼu hanoin tanbasá mak ema la importante hanesan haʼu bele simu konvite hanesan neʼe. Maibé haʼu hanoin, ‘Se Jeová fiar katak haʼu bele, haʼu sei koko toʼok.’ Neʼe akontese iha tinan 50 liubá. No husi tempu neʼebá, haʼu serbí nuʼudar misionária iha rai-Japaun.” Anita gosta atu fó laran-manas ba irmán klosan seluk atu halo tuir ninia ezemplu. Nia dehan ba sira: “Mai hamutuk haʼu halo aventura neʼebé diʼak liu hotu.” Irmán barak halo tuir ona ninia ezemplu diʼak neʼe.

Irmán barak neʼebé muda atu serbí iha rai seluk, antes atu muda, sira sente taʼuk uitoan. Oinsá mak sira sai aten-brani atu bele muda?

Maureen neʼebé tinan 64 hatete: “Husi tempu joven, haʼu hakarak moris neʼebé iha folin no ajuda ema seluk.” Bainhira nia tinan 20, nia muda ba Kebeke, rai-Kanadá, atu serbí iha fatin neʼebé presiza pioneiru sira. Nia dehan: “Depois, haʼu hetan konvite atu tuir Eskola Gilead, maibé haʼu taʼuk atu husik haʼu-nia kolega sira hodi bá fatin neʼebé foun. Haʼu mós hanoin barak kona-ba haʼu-nia amá, tanba nia presiza tau matan apá neʼebé moras. Ho matan-been haʼu halo orasaun beibeik ba Jeová kona-ba neʼe. Haʼu koʼalia ba haʼu-nia inan-aman kona-ba haʼu-nia susar neʼe, no sira dehan sira hakarak haʼu tuir eskola neʼe. Ami-nia kongregasaun  mós fó ajuda ba haʼu-nia inan-aman. Tanba haʼu haree oinsá Jeová nia liman ajuda ami, neʼe halo haʼu fiar katak nia sei tau matan ba haʼu. Iha tempu neʼe, haʼu prontu ona atu bá!” Husi tinan 1979, Maureen serbí nuʼudar misionária iha rai-Áfrika Oeste ba tinan 30 liu. Agora, Maureen hela iha rai-Kanadá tau matan ninia inan, maibé nafatin serbí nuʼudar pioneiru tempu-tomak. Maureen hanoin fali tempu neʼebé nia serbí iha rai seluk no hatete: “Jeová sempre fó buat neʼebé haʼu presiza iha tempu neʼebé loos.”

Wendy neʼebé agora tinan 65, foti pioneiru bainhira nia sei joven iha rai-Austrália. Nia hatete: “Uluk, haʼu moedór loos no susar tebes ba haʼu atu koʼalia ba ema neʼebé haʼu la koñese. Maibé serbisu pioneiru treinu haʼu atu koʼalia ba ema oioin, tan neʼe haʼu ladún sente moe no haʼu komesa fiar an liután. Hodi pioneiru, neʼe hanorin haʼu atu sadere ba Jeová, no neineik-neineik haʼu komesa sente katak haʼu bele muda ba rai seluk. Iha tempu neʼebá, irmán klosan ida neʼebé uluk serbí iha Japaun nuʼudar misionária ba tinan 30 liu, nia konvida haʼu atu bá vizita Japaun hodi haklaken ba fulan tolu. Neʼe halo haʼu laran-manas atu muda ba rai seluk hodi haklaken.” Iha tinan 1986, Wendy muda ba rai-Vanuatu, illa kiʼik ida maizumenus kilómetru 1.770 husi Austrália nia parte leste.

Toʼo agora, Wendy hela iha Vanuatu, no nia serbí iha eskritóriu tradusaun nian. Nia hatete: “Haʼu sente kontente tebes bainhira haree grupu foun no kongregasaun foun sira harii iha fatin izoladu sira. Atu hola parte kiʼik hodi halo Jeová nia serbisu iha illa sira hanesan neʼe mak priviléjiu neʼebé boot tebes mai haʼu.”

Kumiko agora tinan 65. Uluk nia serbí nuʼudar pioneiru regulár iha Japaun no ninia kolega pioneiru husu nia atu muda ba rai-Nepál hamutuk. Kumiko hatete: “Nia husu haʼu fila-fila maibé haʼu lakohi. Haʼu hanoin barak kona-ba aprende língua foun no kultura neʼebé la hanesan. Problema ida tan mak oinsá haʼu bele hetan osan atu muda ba rai seluk. Iha tempu neʼe, haʼu hetan asidente ho motór no baixa iha ospitál. Haʼu hanoin: ‘Sé mak hatene saida mak sei akontese iha aban-bainrua? Karik haʼu bele kona moras todan no lakon oportunidade atu serbí iha rai seluk. Haʼu bele ka lae, koko toʼok serbí iha rai seluk ba tinan ida?’ Haʼu halo orasaun makaʼas ba Jeová hodi husu nia atu ajuda haʼu foti desizaun.” Bainhira Kumiko nia saúde diʼak fali, nia bá vizita Nepál, no ikusmai nia ho ninia kolega muda ba rai neʼe.

 Kumiko serbí iha Nepál ba tinan sanulu. Nia hatete katak problema sira neʼebé uluk halo nia hanoin barak, ikusmai lakon. Nia dehan: “Haʼu kontente tebes ho haʼu-nia desizaun atu muda ba fatin neʼebé presiza tan haklaken-naʼin sira. Bainhira haklaken Bíblia nia mensajen iha uma ida, baibain ema naʼin-lima ka neen husi viziñu mós mai atu rona. Labarik kiʼik sira mós husu haʼu ho respeitu atu simu tratu ida. Haʼu sente haksolok tebes atu haklaken iha fatin neʼebé ema barak interese ba Bíblia.”

Irmán klosan sira-neʼe mós hetan susar iha sira-nia knaar foun. Saida mak ajuda sira atu hasoru susar sira-neʼe?

Diane husi rai-Kanadá, agora tinan 62. Nia uluk serbí nuʼudar misionária iha rai-Kosta Marfín ba tinan 20. Nia hatete: “Foufoun, susar tebes tanba dook husi haʼu-nia família. Haʼu husu Jeová atu ajuda haʼu sente domin ba ema iha rai neʼe. Haʼu-nia mestre ida husi Eskola Gilead, irmaun Jack Redford, dehan katak bainhira ita foin toʼo iha fatin foun, karik ita sei hakfodak tebes tanba kondisaun sira iha rai neʼe, liuliu tanba ita haree ema kiak ho ita-nia matan rasik. Maibé nia dehan: ‘Keta haree ba ema nia kiak, haree deʼit ba sira-nia oin no matan. Haree sira sente oinsá bainhira sira rona lia-loos husi Bíblia.’ Haʼu halo tuir ninia konsellu neʼe, no neʼe sai nuʼudar bensaun ida mai haʼu! Haʼu haree ema nia matan nabilan bainhira haʼu haklaken ba sira.” Saida tan mak ajuda Diane? Nia dehan: “Haʼu sai belun diʼak ho haʼu-nia estudante sira. Haʼu sente haksolok tebes hodi haree sira sai Jeová nia atan neʼebé laran-metin. Haʼu haree haʼu-nia knaar hanesan haʼu-nia família. Haʼu hetan inan, aman, maun no alin espirituál, hanesan Jesus promete.”—Marcos 10:29, 30.

Anne neʼebé agora tinan 46, serbí iha rai ida iha rai-Ázia neʼebé hanetik ita-nia serbisu haklaken. Nia hatete: “Durante tinan neʼebé haʼu serbí iha rai oioin, haʼu hela hamutuk ho irmán sira neʼebé iha hahalok la hanesan haʼu, tanba mai husi kultura no situasaun neʼebé la hanesan. Tan neʼe, dala ruma problema balu mosu tanba ladún komprende malu. Se ida-neʼe akontese, haʼu hakaʼas an atu hakbesik ba sira no koko komprende liután sira-nia kultura. Haʼu mós hakaʼas an atu hatudu domin liután no fó perdua ba sira. Haʼu kontente tanba liuhusi haʼu-nia hakaʼas-an neʼe, haʼu bele iha belun diʼak sira neʼebé ajuda tebes haʼu iha haʼu-nia knaar.”

 Iha tinan 1993, Ute, husi rai-Alemaña neʼebé agora tinan 53, simu knaar atu serbí nuʼudar misionária iha rai-Madagaskar. Foufoun, susar tebes ba nia atu aprende sira-nia língua, sai toman ho klima foun, malária no moras sira seluk. Nia dehan: “Maski nuneʼe, haʼu hetan ajuda husi ema seluk. Irmán sira husi haʼu-nia kongregasaun, sira-nia oan, no mós haʼu-nia estudante sira hatudu pasiénsia tebes hodi ajuda haʼu aprende sira-nia língua. Haʼu-nia pár misionária tau matan haʼu bainhira haʼu moras. Maibé ajuda neʼebé boot liu mak husi Jeová. Haʼu sempre fó sai haʼu-nia laran-taridu ba nia. Halo tiha orasaun, haʼu hein ho pasiénsia ba loron balu, ka dala ruma toʼo fulan balu, atu hetan resposta ba haʼu-nia orasaun. Jeová ajuda haʼu rezolve problema hotu neʼebé haʼu hasoru.” Ute serbí iha Madagaskar ba tinan 23 toʼo ohin loron.

Hanesan ema barak neʼebé bá serbí iha rai seluk, irmán klosan sira mós dehan katak sira-nia moris sai kontente liu. Bensaun hanesan saida mak sira simu?

Heidi, husi rai-Alemaña no agora tinan 73, serbí nuʼudar misionária iha Kosta Marfín husi tinan 1968. Nia dehan: “Ksolok boot liu neʼebé haʼu hetan mak atu haree haʼu-nia oan espirituál sira ‘kontinua laʼo iha lia-loos’. Haʼu-nia estudante balu agora serbí nuʼudar pioneiru no katuas kongregasaun. Sira barak bolu haʼu amá ka avó. Katuas kongregasaun ida no ninia feen no oan sira, haree haʼu hanesan sira-nia família rasik. Jeová fó mai haʼu oan-mane ida, feto-foun no bei-oan naʼin-tolu.”—3 João 4.

Karen husi Kanadá, agora tinan 72, nia uluk serbí iha rai-Áfrika Oeste ba tinan 20 liu. Nia hatete: “Moris nuʼudar misionária hanorin haʼu atu hanoin uluk ema seluk nia presiza, hatudu domin no pasiénsia liután. Serbí hamutuk ho irmaun-irmán sira husi rai oioin hanorin haʼu atu iha hanoin luan bainhira halo buat ruma. No atu bele iha belun diʼak sira iha rai oioin iha mundu tomak mak bensaun boot tebes. Maski ami-nia moris no knaar sira troka beibeik, maibé ami nafatin iha relasaun diʼak nuʼudar belun.”

Margaret husi rai-Inglaterra no agora tinan 79, uluk serbí nuʼudar misionária iha rai-Laus. Nia hatete: “Hodi serbí iha rai seluk, haʼu bele haree rasik oinsá Jeová dada ema husi rasa no kultura hotu. Ida-neʼe hametin tebes haʼu-nia fiar katak Jeová mak dirije ninia organizasaun no nia sei kumpre ninia hakarak hotu.”

Irmán klosan sira neʼebé serbí iha rai seluk merese duni atu ita gaba sira tanba serbisu makaʼas neʼebé sira halo ba tinan barak ona. (Juízes [Hakim-Hakim] 11:40) Agora, irmán barak liután fó sira-nia an atu serbí iha rai seluk. (Salmo [Mazmur] 68:11) Oinsá ho Ita? Ita bele ka lae, halo mudansa ba Ita-nia moris atu banati-tuir irmán sira-neʼe nia ezemplu? Se Ita halo nuneʼe, Ita sei ‘koko no haree katak Jeová mak diʼak’.—Salmo (Mazmur) 34:8.