1-3. (a) Oinsá mak ema kristaun hatudu katak sira hafolin atu halibur hamutuk? (Haree foto iha leten.) (b) Ita sei koʼalia kona-ba saida iha lisaun neʼe?

BAINHIRA Corinna foin tinan 17, ema kaer ninia amá no hatama iha komarka. Ikusmai, sira mós kaer Corinna bá fatin dook ida naran Sibéria. Iha neʼebá ema obriga nia serbisu iha toʼos hanesan atan. Dala ruma sira obriga nia serbisu iha uma liʼur neʼebé malirin tebes ho roupa baibain deʼit. Maski moris iha situasaun neʼebé susar tebes, maibé Corinna ho irmán ida seluk hakaʼas an hodi tuir reuniaun.

² Corinna dehan: “Iha kalan ami para husi serbisu, ami laʼo kilómetru 25 mak foin toʼo iha estasaun komboiu nian. Komboiu sai husi estasaun iha tuku rua madrugada, no komboiu laʼo ba oras neen mak ami foin tun. Depois, ami laʼo ain ba kilómetru sanulu tan mak foin toʼo iha reuniaun nia fatin.” Laʼo dook hanesan neʼe halo Corinna sente oinsá? Nia dehan: “Iha reuniaun, ami estuda Livru Haklaken no kanta knananuk sira. Neʼe fó laran-manas tebes no hametin ami-nia fiar.” Maski liutiha loron tolu  mak sira naʼin-rua foin fila fali bá serbisu iha toos, maibé toos-naʼin la nota katak sira bá tiha fatin ruma.

³ Jeová nia povu sempre hafolin tempu neʼebé atu halibur hamutuk. Porezemplu, bainhira kongregasaun kristaun foin harii, Jesus nia eskolante sira sempre halibur hamutuk, “loron ba loron, sira kontinua halibur iha templu”. (Apóstolu 2:46) Karik ita mós sente hanesan ho sira. Maibé, tanba serbisu, laiha tempu, ka kole bele halo susar ba ita atu tuir beibeik reuniaun. Irmaun-irmán barak mós sente hanesan neʼe. Se nuneʼe, saida mak bele ajuda ita hakaʼas an atu bele tuir beibeik reuniaun sira? ^[1] (Haree nota husi lisaun.) Oinsá mak ita bele ajuda ita-nia estudante Bíblia ka ema seluk atu tuir beibeik reuniaun sira? Lisaun neʼe sei esplika tanbasá mak tuir reuniaun (1) diʼak ba ita, (2) ajuda ema seluk, no (3) halo Jeová kontente. ^[2]—Haree nota husi lisaun.

4. Oinsá mak reuniaun sira ajuda ita aprende liután kona-ba Jeová?

⁴ Reuniaun sira hanorin ita. Reuniaun ida-idak ajuda ita aprende kona-ba ita-nia Maromak Jeová. Porezemplu, bainhira ita estuda livru Hela Nafatin iha Maromak nia Domin iha kongregasaun, ita aprende buat barak kona-ba Jeová nia hahalok sira, no rona komentáriu husi irmaun-irmán sira mós hametin liután ita-nia domin ba Maromak Jeová, loos ka lae? Iha reuniaun ita mós bele aprende buat barak kona-ba eskritura sira liuhusi rona didiʼak ba diskursu, fó atensaun ba drama, no rona didiʼak bainhira ema lee eskritura ruma. (Neemias 8:8) No hanoin toʼok mós kona-ba programa lee Bíblia nian iha reuniaun semana-semana, ita rasik hetan informasaun furak oioin husi ema seluk nia komentáriu no mós husi ita rasik nia preparasaun, loos ka lae?

5. Oinsá mak reuniaun sira ajuda ona ita atu uza Bíblia iha ita-nia moris no hadiʼa dalan neʼebé ita haklaken?

⁵ Reuniaun sira hanorin ita oinsá atu uza informasaun neʼebé ita aprende husi Bíblia iha ita-nia moris. (1 Tesalónika 4:9, 10) Porezemplu, karik tanba tuir ona reuniaun Estudu Livru Haklaken mak book ita atu halo planu hodi serbí Jeová liután, hadiʼa dalan neʼebé ita halo orasaun, no book ita atu fó perdua ba irmaun ka irmán sira, loos ka lae? Loron baileet iha semana ida dala ida, ita mós halaʼo reuniaun ida neʼebé hanorin ita oinsá atu haklaken no oinsá atu ajuda ema seluk aprende kona-ba lia-loos husi Bíblia.—Mateus 28:19, 20.

6. Oinsá mak reuniaun sira anima no hametin ita?

⁶ Reuniaun sira anima ita. Satanás nia mundu sempre koko atu halo fraku ita-nia fiar no halo ita estrese no laran-tun. Maibé ita-nia reuniaun sempre fó laran-manas no hametin ita-nia fiar atu kontinua serbí Jeová. (Lee Apóstolu 15:30-32.) Baibain ita koʼalia dala barak kona-ba Bíblia nia profesia sira neʼebé sai loos ona iha ita-nia reuniaun sira. Ida-neʼe ajuda ita tau fiar liután katak Jeová nia promesa hotu kona-ba futuru sei sai loos. Ita hetan laran-manas laʼós liuhusi diskursu sira deʼit. Bainhira irmaun-irmán sira fó komentáriu no kanta knananuk ho laran mós fó anima tebes ita. (1 Korinto 14:26) Iha tempu neʼebé ita koʼalia ho ita-nia irmaun-irmán sira antes reuniaun no bainhira reuniaun remata tiha, neʼe halo ita sente ita iha interese ba malu no halo ita-nia neon sai fresku.—1 Korinto 16:17, 18.

7. Tanbasá mak importante atu tuir reuniaun sira?

⁷ Reuniaun sira lori espíritu santu ba ita. Jesus Kristu hatete: “Ema neʼebé iha tilun, rona bá buat neʼebé espíritu dehan ba kongregasaun sira.” (Apokalipse 2:7) Loos duni, Jesus tau matan ba kongregasaun  sira liuhusi espíritu santu. Ita presiza duni espíritu santu hodi bele hasees an husi tentasaun, no atu bele haklaken ho aten-brani. Espíritu santu mós bele ajuda ita atu halo desizaun neʼebé matenek. Tan neʼe mak ita tenke hakaʼas an atu tuir reuniaun sira hodi bele simu ajuda husi Maromak nia espíritu santu.

8. Oinsá mak tuir reuniaun, fó komentáriu, no kanta iha reuniaun bele ajuda maluk fiar-naʼin seluk? (Haree mós kaixa “Fila husi reuniaun, nia sempre sente diʼak fali.”)

⁸ Reuniaun sira fó oportunidade ba ita atu hatudu ba irmaun-irmán sira katak ita hadomi sira. Irmaun-irmán barak mak hasoru hela susar iha sira-nia moris. Tan neʼe mak apóstolu Paulo hakerek hanesan neʼe: “Mai ita hanoin malu.” (Ebreu 10:24, 25) Ita hatudu ita hanoin irmaun-irmán sira liuhusi halibur hamutuk iha reuniaun hodi anima malu. Bainhira ita tuir reuniaun, ita hatudu duni ba maluk fiar-naʼin sira katak ita hakarak hamutuk ho sira atu koʼalia ho sira, no ita interese tebes ba sira. Kuandu sira rona ita fó komentáriu no kanta iha reuniaun, neʼe mós fó laran-manas tebes ba sira.—Koloso 3:16.

9, 10. (a) Esplika toʼok oinsá Jesus nia liafuan iha João 10:16 ajuda ita komprende tanbasá importante atu halibur hamutuk ho irmaun-irmán sira. (b) Tanbasá mak tuir beibeik reuniaun bele ajuda sira neʼebé família laiha lia-loos?

⁹ Reuniaun sira ajuda ita atu iha unidade. (Lee João 10:16.) Jesus kompara ninia an hanesan bibi-atan no ninia eskolante mak bibi-luhan ida. Hanoin toʼok se bibi rua iha foho tutun, rua seluk iha foho leet, no ida tan iha fatin seluk, ita bele bolu bibi lima neʼe bibi-lubun ida deʼit ka lae? Lae, tanba bibi sira hamutuk no tuir hela sira-nia bibi-atan mak ita bele bolu lubun ida. Hanesan neʼe mós ho ita, ita labele sees husi ita-nia irmaun-irmán sira hodi falta reuniaun. Ita presiza halibur hamutuk nafatin atu sai “luhan ida” no tuir “bibi-atan ida deʼit”.

¹⁰ Ita-nia reuniaun mós ajuda ita sai ida deʼit hanesan família ida. (Salmo [Mazmur] 133:1) Iha irmaun-irmán balu, sira-nia família rasik hakribi sira. Maibé Jesus promete ba sira katak nia sei fó família ida ba sira hodi hadomi no tau matan ba sira. (Marcos 10:29, 30) Se ita mak tuir beibeik reuniaun, ita mós sai hanesan inan, aman, maun, no biin-alin ba sira. Bainhira ita hanoin kona-neʼe, neʼe halo ita hakarak hakaʼas an liután atu tuir reuniaun sira, loos ka lae?

11. Oinsá mak tuir reuniaun sira hatudu katak ita iha respeitu ba Jeová?

¹¹ Tuir reuniaun sira hatudu katak ita iha respeitu ba Jeová. Jeová mak ita-nia  Kriadór, tan neʼe ita tenke fó agradese, hahiʼi, no respeitu ba nia. (Lee Apokalipse 7:12.) Ita bele halo buat sira-neʼe liuhusi orasaun, kanta, no koʼalia kona-ba nia iha reuniaun sira. Reuniaun fó duni oportunidade furak ba ita atu adora Jeová iha dalan hanesan neʼe semana-semana.

12. Se ita mak halo tuir Jeová nia mandamentu hodi tuir reuniaun sira, nia sei sente oinsá?

¹² Tanba Jeová mak kria ita, tan neʼe ita tenke halo tuir nia. Nia fó mandamentu ba ita katak ita tenke halibur hamutuk beibeik, liuliu tanba ita besik ona mundu neʼe nia rohan. Se ita mak halo tuir Jeová nia mandamentu neʼe, nia sei kontente tebes ho ita. (1 João 3:22) Jeová hatene no hafolin tebes ita-nia hakaʼas an atu tuir reuniaun ida-idak.—Ebreu 6:10.

13, 14. Tanbasá mak ita bele dehan katak tuir reuniaun mak dalan ida atu hakbesik ba Jeová no Jesus?

¹³ Tuir reuniaun sira hatudu katak ita hakarak hakbesik ba Jeová no ninia Oan-Mane. Iha reuniaun sira ita estuda Bíblia no ita aprende husi Jeová kona-ba oinsá ita bele halaʼo ita-nia moris. (Isaías [Yesaya] 30:20, 21) Bainhira ema neʼebé seidauk adora Jeová tuir ita-nia reuniaun, sira mós bele rekoñese katak Maromak iha duni iha ita-nia leet. (1 Korinto 14:23-25) Loos duni, liuhusi espíritu santu mak Jeová dirije ita-nia reuniaun sira no informasaun sira neʼebé ita aprende husi reuniaun mai duni husi nia. Tan neʼe mak bainhira ita tuir reuniaun sira, neʼe hanesan ita rona ba Jeová koʼalia ba ita, ita bele sente duni katak nia hadomi ita, no neʼe halo ita hakbesik ba nia.

¹⁴ Jesus dehan: “Iha fatin naran deʼit neʼebé ema naʼin-rua ka tolu halibur hamutuk hodi haʼu-nia naran, haʼu mós iha sira-nia leet.” (Mateus 18:20) Bíblia mós hatete katak nuʼudar kongregasaun nia ulun, Kristu “laʼo” iha kongregasaun sira-nia leet. (Apokalipse 1:20–2:1) Husi neʼe ita bele aprende katak Jeová no Jesus laran-manas tebes atu hametin ita liuhusi reuniaun sira. Tuir ita-nia hanoin Jeová sente oinsá bainhira nia haree ita hakarak tebes atu hakbesik ba nia no ninia Oan-Mane?

15. Oinsá mak tuir reuniaun hatudu katak ita hakarak halo tuir Maromak?

¹⁵ Tuir reuniaun sira hatudu katak ita hakarak apoia Jeová nia direitu atu ukun. Jeová fó duni mandamentu ba ita atu tuir reuniaun sira, maibé nia nunka obriga ita atu halo tuir nia. (Isaías [Yesaya] 43:23) Tan neʼe mak bainhira ita hili atu halo tuir ninia mandamentu ho laran, ita hatudu katak ita hadomi nia no ita hakarak atu apoia ninia direitu atu ukun. (Roma 6:17) Porezemplu, karik ita-nia patraun hakarak ita atu halo serbisu barak ba nia toʼo ita laiha tempu atu tuir beibeik reuniaun sira. Ka karik governu mak bandu ita atu la bele halibur hamutuk hodi adora Jeová, selae sira sei husu multa husi ita, ka kaer ita bá komarka, ka fó kastigu todan ba ita. Ka karik ita hetan tentasaun atu falta reuniaun sira tanba ita bá halimar. Iha situasaun sira-neʼe, ita mak hili rasik sé loos mak ita atu serbí. (Apóstolu 5:29) Se ita mak hili atu apoia Jeová nia direitu atu ukun, neʼe sei halo Jeová nia laran kontente.—Provérbios (Amsal) 27:11.

16, 17. (a) Oinsá mak ita hatene katak reuniaun sira mak importante tebes ba ema kristaun iha tempu uluk? (b) Irmaun George Gangas sente oinsá kona-ba ita-nia reuniaun sira?

¹⁶ Ema kristaun sira neʼebé halibur tiha iha loron Pentekostes tinan 33, “sira ho laran-manas kontinua aprende husi apóstolu sira” no “loron ba loron, sira kontinua halibur iha templu”. (Apóstolu 2:42, 46) Maski ikusmai governu Roma no ulun-naʼin relijiaun husi ema judeu fó terus makaʼas ba  sira, maibé sira nunka para atu halibur hamutuk. Ba sira, la fasil duni atu tuir reuniaun, maibé sira hakaʼas an nafatin hodi tuir reuniaun sira-neʼe.

¹⁷ Ohin loron, Jeová nia atan sira mós sente agradese ba ita-nia reuniaun sira. George Gangas, irmaun neʼebé serbí nuʼudar membru ida ba Grupu Administradór ba tinan 22 liu hatete: “Ba haʼu, halibur hamutuk ho irmaun-irmán sira mak buat neʼebé solok tebes no neʼe mak fatin atu hetan laran-manas. Se haʼu bele, haʼu gosta toʼo iha Reuniaun-Fatin sedu antes ema seluk mai, no haʼu mós gosta fila ikus liu. Bainhira haʼu koʼalia ho irmaun-irmán sira, haʼu-nia laran sente kontente tebes. Kuandu haʼu hamutuk ho sira, haʼu sente hanesan haʼu ho haʼu-nia família iha uma, hanesan iha paraízu espirituál ida.” Nia hatutan tan: “Haʼu-nia sentimentu no hakarak loloos husi laran mak atu tuir reuniaun sira.”

18. Ita sente oinsá kona-ba ita-nia reuniaun, no ita hakarak hakaʼas an atu halo saida?

¹⁸ Ita mós sente hanesan neʼe ka lae kona-ba halibur hamutuk hodi adora Jeová? Se nuneʼe, maski susar mós hakaʼas an nafatin atu halibur hamutuk ho irmaun-irmán sira hodi tuir beibeik reuniaun. Hatudu ba Jeová katak ita mós sente hanesan Liurai David neʼebé hatete: “Oh Jeová, haʼu gosta tebes uma neʼebé Ita hela bá.”—Salmo (Mazmur) 26:8.