Haʼu-nia aman John Mills hetan batizmu iha tinan 1913 iha sidade Novaiorke bainhira nia tinan 25. Lakleur depois neʼe, apá bá rai-Trindade no kaben ho Estudante Bíblia ida neʼebé badinas loos, naran Constance Farmer. Apá ajuda ninia belun William R. Brown atu hatudu filme “Foto-Drama kona-ba Kriasaun”. Sira halo nuneʼe toʼo tinan 1923 bainhira família Brown simu knaar atu muda ba Áfrika Oeste. Haʼu-nia inan-aman kontinua serbí Jeová iha rai-Trindade no sira iha esperansa atu bá lalehan.

Haʼu-nia inan-aman iha oan naʼin-sia. Sira-nia oan-mane primeiru hanaran Rutherford hodi tuir prezidente ba Watch Tower Bible and Tract Society iha tempu neʼebá. Haʼu moris iha 30 Dezembru 1922 no haʼu-nia inan-aman hanaran haʼu Clayton J. Woodworth, hodi tuir irmaun neʼebé nuʼudar editór ba revista The Golden Age (ohin loron bolu Matan-moris bá!). Ami simu edukasaun báziku, maibé ami-nia inan-aman mós hanorin ami katak planu espirituál mak importante tebes. Amá matenek loos atu hanorin Bíblia hodi book ami-nia laran. Apá gosta tebes atu konta istória sira husi Bíblia, baibain nia book ninia isin tomak hodi halo istória sira-neʼe moris.

Sira-nia hakaʼas an lori rezultadu diʼak. Husi sira-nia oan-mane naʼin-lima, naʼin-tolu tuir Eskola Gilead. Ami-nia feton naʼin-tolu serbí nuʼudar pioneiru ba tinan barak iha rai-Trindade no Tobagu. Liuhusi inan-aman nia ezemplu no hanorin, sira kuda ami “hanesan ai neʼebé kuda iha Jeová nia uma”. Sira-nia anima, ajuda ami atu metin nafatin iha neʼebá no “sai buras iha ita-nia Maromak nia pátiu”.​—Sal 92:13.

Ami-nia uma mak sai nuʼudar fatin hodi organiza serbisu haklaken. Pioneiru sira halibur hamutuk iha neʼebá no koʼalia beibeik kona-ba misionáriu ida naran George Young husi rai-Kanadá neʼebé uluk vizita rai-Trindade. Haʼu-nia  inan-aman mós koʼalia beibeik kona-ba família Brown neʼebé uluk haklaken hamutuk sira. Neʼe book haʼu atu sai haklaken-naʼin bainhira haʼu tinan 10.

Iha tempu neʼebá ita-nia revista sira koʼalia nakloke kona-ba relijiaun falsu, negosiante sira neʼebé kaan-teen no polítiku-naʼin sira neʼebé halo korrupsaun. Tan neʼe iha tinan 1936 ulun-naʼin igreja sira book governadór iha rai-Trindade atu bandu publikasaun hotu husi Watch Tower. Ami subar tiha publikasaun hotu no kontinua fahe toʼo hotu. Ami haklaken hodi tara kartás no fahe tratu nuʼudar ami marxa no saʼe bisikleta. Ami haklaken ba fatin izoladu sira iha rai-Trindade hamutuk ho grupu ida husi sidade kiʼik Tunapuna neʼebé iha karreta lian. Ami kontente tebes hodi halo nuneʼe. Tanba haʼu ransu hamutuk ho ema espirituál, neʼe book haʼu atu hetan batizmu bainhira haʼu tinan 16.

Haʼu-nia família nia istória iha lia-loos no haʼu-nia esperiénsia rasik kuandu sei kiʼik, mak haburas haʼu-nia hakarak atu sai misionáriu. Haʼu muda ba rai-Aruba iha tinan 1944, no nafatin hakarak sai misionáriu. Iha neʼebá haʼu serbisu hamutuk ho irmaun Edmund W. Cummings. Ami kontente tebes tanba iha tinan 1945 ema naʼin-sanulu halibur hamutuk hodi komemora Naʼi nia Han-Kalan. Iha 1946 kongregasaun primeiru harii iha neʼebá.

Loron ida, haʼu haklaken ba feto ida naran Oris Williams iha haʼu-nia serbisu-fatin. Oris koko makaʼas atu defende doutrina neʼebé nia hatene. Maibé liuhusi estuda Bíblia nia aprende saida mak Bíblia hanorin no hetan batizmu iha 5 Janeiru 1947. Ikusmai, ami laran-monu ba malu no kaben. Nia komesa pioneiru iha Novembru 1950. Oris halo haʼu-nia moris sai diʼak liután.

Iha tinan 1955 ami simu konvite atu tuir Eskola Gilead. Ami prepara ba priviléjiu neʼe hodi sai husi serbisu, faʼan ami-nia uma no sasán seluk, no husik rai-Aruba. Iha 29 Jullu 1956 ami hetan graduasaun husi Eskola Gilead klase 27 no simu knaar atu bá rai-Nijéria.

Bainhira hanoin fali kona-ba tempu neʼe, Oris hatete: “Jeová nia espíritu bele ajuda ita atu tahan susar sira nuʼudar misionáriu. Uluk haʼu la planu atu sai misionáriu hanesan haʼu-nia laʼen. Haʼu kontente liu atu iha uma no oan. Maibé haʼu-nia hanoin troka bainhira haʼu komprende katak haklaken mak urjente. Remata tiha Eskola Gilead haʼu sente prontu ona atu sai misionáriu. Bainhira ami atu saʼe ró boot ida, irmaun Worth Thornton neʼebé serbí hamutuk irmaun Knorr, fó adeus no fó-hatene katak ami sei serbí iha Betel. Haʼu sente triste uitoan. Maibé haʼu troka lalais haʼu-nia hanoin no ikusmai gosta tebes Betel. Iha Betel haʼu halo knaar oioin. Knaar neʼebé haʼu gosta liu mak resepsionista. Haʼu gosta ransu ho ema, no serbisu neʼe fó oportunidade ba haʼu atu hasoru beibeik irmaun-irmán sira. Sira barak toʼo Betel ho kole, hamrook no hamlaha. Haʼu kontente tebes atu fó sira han no hemu, no fó kmaan ba sira. Buat hotu mak serbisu sagradu ba Jeová no lori haksolok ba haʼu.” Loos duni, knaar hotu halo ami sai metin liután iha lia-loos.

Iha tinan 1961 ami-nia família halibur hamutuk fali ho irmaun Brown iha rai-Trindade. Nia konta esperiénsia balu husi Áfrika no haʼu konta kona-ba oinsá haklaken-naʼin aumenta iha rai-Nijéria. Irmaun Brown lolo liman ba haʼu no koʼalia ba apá: “John, ó nunka bá Áfrika, maibé Woodworth bá!” Haʼu-nia apá hatán: “Serbisu diʼak Woodworth! Kontinua halo serbisu neʼe!” Anima husi sira neʼebé iha lia-loos kleur hametin haʼu atu kumpre haʼu-nia serbisu haklaken.

Iha tinan 1962, haʼu hetan tan priviléjiu atu simu treinu iha Eskola Gilead klase 37 neʼebé halaʼo ba fulan 10. Irmaun Wilfred Gooch tuir Eskola Gilead klase 38. Iha tempu neʼebá nia mak Koordenadór ba sukursál iha rai-Nijéria, maibé nia simu knaar foun atu serbí iha rai-Inglaterra. Tan neʼe haʼu sai fali Koordenadór ba sukursál. Haʼu halo tuir irmaun Brown nia ezemplu no bá  vizita beibeik irmaun-irmán sira iha rai-Nijéria hodi koñese didiʼak sira no hadomi sira. Maski sira iha sasán uitoan deʼit, maibé sira kontente. Neʼe hatudu katak moris kontente la depende ba osan ka sasán. Sira-nia isin sempre moos no hadiʼa an didiʼak bainhira tuir reuniaun sira. No bainhira tuir reuniaun boot, sira barak saʼe trek no bolekajas * (trek neʼebé halo iha rai-Nijéria). Baibain trek sira-neʼe hakerek liafuan iha oin. Liafuan iha trek ida dehan: “Bee-turuk kiʼikoan-kiʼikoan hamosu tasi.”

Liafuan sira-neʼe loos duni. Serbisu neʼebé ema ida-idak halo no mós ami-nia serbisu ajuda haklaken laʼo ba oin. Iha 1974 rai-Nijéria mak nasaun segundu iha mundu tomak neʼebé iha haklaken-naʼin 100.000. Serbisu haklaken iha rai-Nijéria sai buras liután.

Haklaken-naʼin sira aumenta ba beibeik, maibé iha tempu hanesan funu sivíl akontese husi tinan 1967 toʼo tinan 1970. Irmaun-irmán sira iha Biafra iha Mota Nijer nia sorin ba, labele kontaktu sukursál. Tan neʼe ami tenke lori ai-han espirituál ba sira. Hanesan haʼu temi ona, ho orasaun no fiar ba Jeová ami hakur mota neʼe dala balu.

Haʼu hanoin-hetan ami-nia viajen sira neʼebé perigu atu hakur Mota Nijer. Ami-nia moris iha perigu laran tanba tropa sira neʼebé lori kilat, tanba moras oioin no perigu seluk tan. Susar tebes ba ami atu liu governu nia tropa. Maibé aat liután mak atu liu tropa neʼebé kontra governu iha Biafra. Kalan ida, haʼu uza bero husi sidade Asaba hodi hakur Mota Nijer neʼebé tun makaʼas. Haʼu atu bá sidade Onitsha depois neʼe bá sidade Enugu atu fó laran-manas ba katuas sira. Iha tempu seluk ami bá atu hametin katuas kongregasaun sira iha Aba durante tempu neʼebé sira labele uza lampu iha kalan. Iha Port Harcourt, ami-nia reuniaun remata sedu ho orasaun tanba governu nia tropa sira tama Biafra nia sidade liʼur.

Reuniaun sira-neʼe importante tebes tanba fó-hanoin ba sira katak Jeová hadomi sira no iha tempu hanesan fó konsellu ba sira kona-ba sai neutrál nafatin no unidade. Irmaun-irmán sira tahan hasoru konflitu neʼebé aat loos. Sira hatudu domin boot ba malu no neʼe halo sira la odi malu kona-ba suku no mantein unidade. Haʼu sente neʼe mak priviléjiu boot atu hamutuk sira durante tempu susar neʼe.

Iha tinan 1969 irmaun Milton G. Henschel mak koordenadór ba reuniaun boot internasionál ho tema “Peace on Earth (Dame iha mundu)”, iha Yankee Stadium, Novaiorke. Haʼu mak ninia asistente no aprende buat barak husi nia. Haʼu simu treinu neʼe iha tempu neʼebé loos tanba iha tinan 1970 ami halaʼo reuniaun boot internasionál ho tema “Men of Goodwill (Ema sira neʼebé Maromak simu)”, iha Lagos, rai-Nijéria. Reuniaun boot neʼe halaʼo lakleur depois funu sivíl remata no neʼe laʼo ho susesu tan deʼit Jeová nia apoia. Diskursu sira hatoʼo iha língua 17 no ema naʼin–121.128 mak tuir. Irmaun Knorr no irmaun Henschel no irmaun-irmán sira husi Estadus Unidus no husi rai-Inglaterra haree ema naʼin–3.775 hetan batizmu. Seidauk iha ema barak hetan batizmu hanesan neʼe iha loron ida deʼit depois loron Pentekostes iha apóstolu sira-nia tempu. Prepara ba reuniaun boot neʼe halo haʼu okupadu. Haklaken-naʼin sira aumenta lalais loos se kompara ho rai seluk.

Haʼu serbí iha rai-Nijéria ba tinan 30 liu, no durante tinan sira-neʼe dala ruma haʼu serbí nuʼudar katuas neʼebé vizita kongregasaun sira no katuas neʼebé vizita sukursál iha Áfrika Oeste. Misionáriu sira agradese tebes bainhira sira ida-idak simu atensaun no laran-manas! Haʼu kontente tebes atu fó-hatene sira katak ami la haluha sira. Serbisu neʼe hanorin haʼu katak importante atu hatudu interese ba ema seluk hodi hametin sira no haburas unidade iha Jeová nia organizasaun.

Ho Jeová nia ajuda ami bele tahan susar sira husi funu sivíl no moras. Klaru katak Jeová fó bensaun ba ami. Oris hatete:

“Ami rua hetan moras malária dala balu. Tempu ida Woodworth dezmaia no ami tenke lori nia ba ospitál. Iha neʼebá doutór sira dehan karik  nia sei mate, maibé ikusmai nia diʼak fali! Bainhira nia hadeer nia koʼalia kona-ba Maromak nia Ukun ba enfermeiru neʼebé tau matan nia. Depois neʼe, ami bá vizita enfermeiru neʼe, naran Señór Nwambiwe hodi haburas ninia interese ba Bíblia. Nia simu lia-loos no ikusmai sai katuas kongregasaun iha sidade Aba. Haʼu mós hetan susesu hodi ajuda ema barak sai Jeová nia atan neʼebé laran-metin, inklui mós ema Izlaun. Ami kontente tebes tanba ami bele koñese no hadomi ema Nijéria, sira-nia kultura, kostume no língua.”

Ami mós aprende katak atu halo ami-nia knaar didiʼak iha rai seluk, ami tenke aprende atu hadomi irmaun-irmán maski ami-nia kultura la hanesan.

Depois ami serbí tiha iha Betel iha rai-Nijéria, iha tinan 1987, ami simu knaar foun atu sai misionáriu iha rai-Santa Lúsia iha Tasi Antillas. Knaar foun neʼe diʼak loos, maibé ami mós hasoru susar foun. Iha Áfrika mane ida bele kaben ho feto barak, maibé iha rai-Santa Lúsia feto no mane hela hamutuk maibé seidauk kaben ho loloos. Maromak nia Liafuan neʼebé iha kbiit ajuda ami-nia estudante Bíblia barak atu halo mudansa.

Bainhira ami-nia forsa menus tanba idade, Grupu Administradór hatudu domin hodi muda ami ba sede-jerál iha Brooklyn, Novaiorke, Estadus Unidus iha tinan 2005. Loroloron haʼu nafatin hatoʼo agradese ba Jeová tanba fó ba haʼu feen diʼak. Iha tinan 2015 nia mate no haʼu sente lakon boot. Nia mak belun neʼebé diʼak, hatudu domin no hahalok diʼak oioin. Ami kaben durante tinan 68 no haʼu hadomi tebes nia. Ami hatene saida mak presiza atu bele kontente iha ami-nia moris kaben nian no mós iha kongregasaun. Ita presiza respeitu ita-nia ulun, prontu atu fó perdua, hatudu haraik an nafatin, no hatudu hahalok neʼebé mai husi espíritu santu.

Bainhira laran-triste ami sadere ba Jeová atu bele ajuda ami serbí nafatin nia. Ami kontinua halo mudansa no haree katak neineik-neineik buat oioin sai diʼak liután. Maibé buat neʼebé diʼak liu sei akontese iha futuru.​—Isa 60:17; 2 Kor 13:11.

Jeová haraik bensaun ba haʼu-nia inan-aman no ema seluk nia serbisu haklaken iha rai-Trindade no Tobagu. Relatóriu ikus fó sai katak ema naʼin–9.892 serbí Jeová iha neʼebá. Iha rai-Aruba, ema barak serbisu hamutuk atu hametin kongregasaun primeiru neʼebé uluk haʼu tuir. Ohin loron, illa neʼe iha kongregasaun 14. Iha rai-Nijéria haklaken-naʼin aumenta toʼo naʼin–381.398. Iha rai-Santa Lúsia iha ema naʼin-783 neʼebé apoia Jeová nia Ukun.

Agora haʼu tinan 90 liu. Salmo 92:14 koʼalia kona-ba ema neʼebé kuda hanesan ai neʼebé kuda iha Jeová nia uma, hodi dehan: “Maski sira fuuk mutin ona, sira sei kontinua buras; sira nafatin forte no fresku.” Haʼu agradese tebes tanba haʼu uza haʼu-nia moris hodi serbí Jeová. Haʼu-nia inan-aman neʼebé metin iha lia-loos fó laran-manas ba haʼu atu serbí Jeová ho didiʼak. Ho domin neʼebé laran-metin, Jeová husik haʼu “sai buras iha [haʼu-nia] Maromak nia pátiu”.​—Sal 92:13.