Apóstolu Paulo hatene katak propaganda neʼebé Satanás uza, perigu tebes. Maibé ema kristaun balu ladún fó atensaun ba perigu neʼe. Karik ema balu iha Korinto hanoin katak sira hamriik metin no Satanás sei nunka bele halo sira monu. (1 Korinto 10:12) Tan neʼe mak Paulo fó avizu ba sira: “Haʼu taʼuk katak, nuʼudar samea ho matenek lohi Eva, ema mós bele hafoʼer imi-nia neon no lori imi dook husi hahalok laran-moos no santu neʼebé tuir Kristu.”—2 Korinto 11:3.

Paulo nia liafuan hatudu katak ita la bele fiar an demais liu. Ita tenke rekoñese katak propaganda neʼebé Satanás uza, perigu tebes no ita presiza proteje ita-nia an hodi bele manán hasoru Satanás nia ataka neʼe.

Propaganda mak saida? Neʼe mak informasaun falsu no lia-bosok neʼebé ema uza atu lohi ka kontrola ema seluk nia hanoin no hahalok. Livru ida ho títulu Propaganda and Persuasion hatete katak propaganda mak “perigu, la tuir morál, no la tuir justisa”.

Propaganda perigu tebes tanba informasaun sira-neʼe neineik-neineik bele troka ita-nia hanoin. Ita bele kompara propaganda hanesan ho gás neʼebé la bele haree ka horon maibé halo ita mate. Matenek-naʼin naran Vance Packard hatete katak, tuir loloos propaganda kona ona ema barak nia hanoin no hahalok, maibé sira la hatene. Matenek-naʼin ida tan hatete katak propaganda book  ona ema barak hodi halo hahalok neʼebé beik no perigu tebes, hanesan masakre hasoru ema neʼebé rasa la hanesan, funu, no fó terus ema seluk, tan deʼit relijiaun la hanesan.—Easily Led—A History of Propaganda.

Se ema deʼit bele lohi ita, sá tan ho Satanás? Nia haree didiʼak kona-ba ema nia hahalok komesa husi Adão no Eva moris iha rai. No agora, nia mak kontrola daudauk “mundu tomak”, tan neʼe nia bele uza buat naran deʼit iha mundu neʼe atu habelar ninia lia-bosok sira. (1 João 5:19; João 8:44) Ohin loron, Satanás uza propaganda “taka netik” ema barak nia neon no nia konsege duni “lohi mundu tomak”. (2 Korinto 4:4; Apokalipse 12:9) Oinsá mak ita bele proteje ita-nia an husi ninia propaganda sira?

Jesus hanorin ita kona-ba dalan ida atu luta hasoru propaganda, nia dehan katak se ita buka-hatene lia-loos, ‘lia-loos sei halo ita livre.’ (João 8:31, 32) Iha funu, soldadu ida presiza hatene husi fatin neʼebé mak nia tenke buka informasaun neʼebé loos, tanba inimigu bele habelar lia-bosok atu lohi nia. Entaun, ita bele hetan informasaun neʼebé loos husi neʼebé? Jeová fó informasaun neʼe liuhusi Bíblia. Bíblia iha informasaun neʼebé bele ajuda ita luta hasoru Satanás nia propaganda sira.—2 Timóteo 3:16, 17.

Satanás mós hatene kona-ba neʼe, tan neʼe nia uza ninia mundu atu fahe ita-nia atensaun hodi ita la lee no estuda Bíblia. Keta monu ba “Diabu nia lasu sira”! (Éfeso 6:11) La toʼo atu hatene deʼit buat simples kona-ba lia-loos. Ita presiza hakaʼas an atu estuda kleʼan liután. (Éfeso 3:18) Hakerek-naʼin ida naran Noam Chomsky hatete: “La iha ema ida mak bele enxe lia-loos ba ita-nia kakutak. Ita rasik mak tenke buka-hatene ba ita-nia an.” Ita bele halo ida-neʼe liuhusi “buka-hatene didiʼak Eskritura” loroloron.—Apóstolu 17:11.

Satanás lakohi ita atu hanoin no hatene didiʼak kona-ba lia-bosok husi propaganda sira. Tanbasá? Livru ida hatete katak, propaganda nia objetivu mak lakohi ema atu hanoin kona-ba liafuan sira husi propaganda neʼe, selae ema sei la monu tan ba lia-bosok sira-neʼe. (Media and Society in the Twentieth Century) Tan neʼe, ita tenke hanoin didiʼak no keta fiar deʼit kona-ba buat neʼebé ita rona. (Provérbios [Amsal] 14:15)  Maromak fó ita “kbiit atu hanoin” no uza didiʼak kbiit neʼe bele hametin ita-nia fiar.—Provérbios 2:10-15; Roma 12:1, 2.

Soldadu sira neʼebé fiar ba propaganda sei sai taʼuk no la brani atu halo funu. Dala ruma propaganda mós bele halo sira funu hasoru sira-nia maluk ka haketak an husi soldadu sira seluk. Jenerál ida husi Alemaña hatete katak, propaganda mak razaun ida neʼebé halo Alemaña lakon iha Funu Mundiál Primeiru. Nia dehan katak ema fiar tebes ba propaganda toʼo sira halo tuir deʼit informasaun falsu sira-neʼe. Satanás mós uza dalan hanesan neʼe atu sobu ita-nia unidade ohin loron. Porezemplu, nia koko atu halo irmaun-irmán sira la apoia ba malu. Ka nia koko halo sira hanoin katak Jeová nia organizasaun la hatudu justisa ka halo buat ruma neʼebé sala hodi halo ema sai husi organizasaun neʼe.

Keta husik nia lohi ita! Halo tuir Bíblia nia konsellu no kaer metin nafatin ba ita-nia unidade. Bíblia dehan atu kontinua “fó perdua ba malu ho laran tomak” no rezolve kedas problema neʼebé mosu. (Koloso 3:13, 14; Mateus 5:23, 24) Bíblia mós fó avizu ba ita atu la bele hadook an husi kongregasaun. (Provérbios [Amsal] 18:1) Hametin ita-nia an atu la monu ba Satanás nia propaganda sira. Husu ba ita-nia an: ‘Dala ikus liu neʼebé irmaun-irmán sira hakanek haʼu, haʼu hatudu hahalok neʼebé Maromak simu ka halo Satanás mak kontente?’—Galásia 5:16-26; Éfeso 2:2, 3.

Soldadu neʼebé la laran-metin ba ninia komandante sei la luta didiʼak iha funu. Tan neʼe mak ema sira neʼebé halo propaganda hakarak halakon soldadu sira-nia fiar ba sira-nia komandante. Se komandante sira mak halo sala, inimigu sei uza ida-neʼe hodi dehan ba soldadu sira: “La bele tau fiar ba sira!” no “Keta husik sira lori imi ba mate!” Satanás mós halo hanesan neʼe. Nia koko atu halo ita la tau fiar ba ema sira neʼebé Jeová uza atu dirije ninia povu.

Oinsá mak ita bele proteje ita-nia an? Keta husik Jeová nia organizasaun. Laran-metin no kontinua fó apoiu ba sira neʼebé dirije Maromak nia povu maski sira mak ema neʼebé la perfeitu.  (1 Tesalónika 5:12, 13) Karik ema neʼebé soe-fiar no lohidór sira sei ataka Jeová nia organizasaun. (Tito 1:10) Maski buat neʼebé sira koʼalia rona hanesan buat neʼebé loos, maibé keta husik ema sira-neʼe ‘troka lalais ita-nia hanoin neʼebé loos’. (2 Tesalónika 2:2) Halo tuir konsellu neʼebé Paulo fó ba Timóteo: “Kontinua halo tuir buat neʼebé ó aprende”, no “hanoin-hetan sé mak hanorin ó buat sira-neʼe”. (2 Timóteo 3:14, 15) Hanoin kona-ba evidénsia sira neʼebé hatudu katak ita bele tau fiar ba atan laran-metin neʼebé Jeová uza besik tinan atus ida ona hodi hanorin lia-loos ba ita.—Mateus 24:45-47; Ebreu 13:7, 17.

Satanás la ataka ita iha dalan neʼebé subasubar deʼit. Dala ruma nia mós uza taʼuk hodi ataka ita. Livru ida hatete katak taʼuk mak “propaganda ida neʼebé ema uza ona husi tempu uluk kedas”. (Easily Led—A History of Propaganda) Profesór ida husi Bretaña naran Philip M. Taylor hatete katak iha tempu uluk, ema Asíria uza dalan hataʼuk mak hanesan propaganda ida hodi domina sira-nia inimigu. Satanás mós uza propaganda hanesan taʼuk ba ema, taʼuk mate, no taʼuk ema fó terus, hodi hapara ita atu la bele serbí Jeová.—Isaías (Yesaya) 8:12; Jeremias (Yeremia) 42:11; Ebreu 2:15.

Labele husik Satanás atu hetan susesu! Jesus dehan: “Keta taʼuk sira neʼebé oho isin-lolon no depois neʼe la bele halo buat seluk tan.” (Lucas 12:4) Tau fiar tomak katak Jeová sei kumpre ninia promesa atu tau matan ba ita no fó ba ita “kbiit neʼebé la hanesan baibain”. Nia sei ajuda ita atu luta hasoru Satanás nia ataka.—2 Korinto 4:7-9; 1 Pedro 3:14.

Dala ruma ita bele sente duni fraku ka taʼuk. Maibé hanoin-hetan Jeová nia liafuan sira neʼebé nia koʼalia ba Josué: “Sai aten-brani no sai forte bá. Keta nakdedar ka taʼuk, tanba Jeová, ó-nia Maromak, mak hamutuk ho ó iha fatin hotu neʼebé ó sei bá.” (Josué [Yosua] 1:9) Se ita mak sente laran-taridu, halo kedas orasaun ba Jeová kona-ba ita-nia laran-taridu neʼe. Ita bele fiar katak ‘Maromak nia dame neʼebé aas liu ema nia hanoin hotu sei proteje ita-nia laran no ita-nia kbiit atu hanoin’. Neʼe bele fó forsa ba ita atu la rona ba Satanás nia propaganda sira.—Filipe 4:6, 7, 13.

Hanoin-hetan ka lae propaganda neʼebé ema Asíria nia manu-ain Rabsaqué uza hodi hataʼuk Maromak nia povu? Nia koko atu halo Jeová nia povu fiar katak la iha ema ida mak bele proteje sira husi Asíria, Jeová mós la bele. Ho fiar an nia hatete katak Jeová mak haruka ema Asíria atu harahun Jeruzalein. Maibé Jeová hatete fali saida? “Keta taʼuk tanba liafuan sira neʼebé ó rona husi liurai Asíria nia atan neʼebé koʼalia aat haʼu.” (2 Reis [Raja-Raja] 18:22-25; 19:6) Tuirmai Jeová haruka anju ida oho ema Asíria naʼin–185.000 iha kalan ida deʼit!—2 Reis (Raja-Raja) 19:35.

Ita haree ona ka lae filme neʼebé iha ema balu lohi hela ema ida, maibé nia la hatene. Karik Ita hakarak tebes atu hakilar ba nia: ‘Keta fiar! Sira atu lohi ó!’ Imajina katak neʼe mak buat neʼebé anju sira hatete daudauk ba Ita: “Ketak fiar ba Satanás nia lia-bosok sira!”

Tan neʼe, keta rona ba Satanás nia propaganda sira. (Provérbios [Amsal] 26:24, 25) Rona ba Jeová no tau fiar ba nia kona-ba buat hotu neʼebé Ita atu halo. (Provérbios [Amsal] 3:5-7) Nia hadomi Ita no nia hatete nuneʼe ba Ita: “Haʼu-nia oan, sai matenek bá no halo haʼu-nia laran-kontente.” (Provérbios [Amsal] 27:11) Se Ita mak halo tuir liafuan sira-neʼe, Ita sei manán funu hasoru inimigu neʼebé atu ataka Ita-nia neon!