Sin, iha. Sira mai husi neʼebé? Uluk, Maromak kria anju sira ho kbiit atu foti desizaun rasik. Lakleur depois Maromak kria Adão no Eva, anju ida deside atu la halo tuir Maromak, no nia mós konsege book sira atu kontra hasoru Maromak. (Gênesis [Kejadian] 3:1-7; Apokalipse 12:9) Bíblia la fó sai anju neʼe nia naran ka ninia pozisaun iha lalehan antes nia kontra hasoru Maromak. Maibé, bainhira nia kontra ona Maromak, Bíblia bolu nia Satanás, neʼebé signifika “Kontradór”, no Diabu, neʼebé signifika “Bosok-Teen”.​—Mateus 4:8-11.

Liutiha neʼe, anju seluk mós la halo tuir Maromak. Iha Noé nia tempu, anju balu “husik tiha sira-nia hela-fatin neʼebé loos” iha Maromak nia família iha lalehan. Sira kontra Maromak nia hakarak hodi mai toʼo mundu, nakfila an sai fali ema, no halo relasaun seksuál ho feto sira.​—Judas 6; Gênesis (Kejadian) 6:1-4; 1 Pedro 3:19, 20.

Ikusmai, bainhira Maromak halo rai-nabeen atu halakon buat aat hotu, anju aat sira-neʼe fila fali ba lalehan. Maibé, Maromak la husik sira atu fila fali ba “sira-nia pozisaun uluk nian”. Duké simu fali sira nuʼudar Ninia família, Maromak entrega sira ba Tártaro, ka “nakukun laran [iha dalan espirituál]”. (Judas 6; 2 Pedro 2:4) Sira halo tuir Diabu Satanás, “anju aat sira-nia ukun-naʼin” neʼebé “hatudu ninia an nuʼudar anju naroman nian”.​—Mateus 12:24; 2 Korinto 11:14.

Bíblia hanorin katak iha tinan 1914, Maromak harii ona governu ida iha lalehan no Jesus mak ukun nuʼudar Liurai. * Depois neʼe, Jesus duni tun Satanás no ninia anju aat sira husi lalehan ba rai. Ohin loron, mundu nakonu ho hahalok aat no la iha morál, ida-neʼe hatudu ho klaru katak Satanás no anju aat sira hakaʼas an atu halo aat ba ema iha mundu.​—Apokalipse 12:9-12.

Maibé mundu nia situasaun neʼebé aat tebes mós hatudu katak lakleur tan, terus no susar sei la iha tan. Iha tempu neʼebá, Jesus sei kesi metin Satanás no anju aat sira hotu, no Maromak nia governu sei ukun mundu tomak ba tinan 1.000. Tuirmai, Jeová husik anju aat sira-neʼe atu koko fali ema ba tempu uitoan. Depois neʼe, Jesus sei halakon anju aat sira-neʼe ba nafatin.​—Mateus 25:41; Apokalipse 20:1-3, 7-10.