ITA iha kakutak hira? Se Ita hatán “ida”, Ita fó resposta neʼebé loos. Maibé ita mós iha sistema nervu seluk iha ita-nia isin-lolon, laʼós deʼit iha ita-nia kakutak. Sistema neʼe komplikadu tebes toʼo sientista balu bolu nuʼudar “kakutak segundu”. Neʼe mak sistema nervu entériku (ENS) neʼebé iha ita-nia kabun.

Atu troka hahán sai fali enerjia, presiza prosesu barak iha ita-nia isin. Ita-nia kakutak la kontrola prosesu neʼe, maibé ENS mak kontrola prosesu atu ita-nia isin bele hetan enerjia no vitamina.

Maski ENS mak simples liu fali kakutak, maibé ninia prosesu neʼe komplikadu nafatin. ENS halo husi neuróniu millaun 200 toʼo 600 no sai parte iha sistema dijestivu nian. Sientista sira fiar katak se kakutak mak halo buat neʼebé ENS halo, nervu sira iha kakutak sei sai barak liu no mahar demais. Tuir livru ida (The Second Brain), “diʼak liu no seguru liu ba kakutak atu husik ENS mak tau matan ba sistema dijestivu”.

Atu hahán bele sai nutrisaun no enerjia, ita-nia kabun tenke prodús kímiku oioin iha tempu neʼebé loos no lori ba fatin neʼebé loos. Profesór Gary Mawe bolu sistema dijestivu nuʼudar “fábrika kímika nian”. Fábrika neʼe halaʼo iha dalan neʼebé kapás tebes. Porezemplu, ita-nia kabun laran iha sélula espesiál atu detekta kímiku oioin husi hahán neʼebé ita han. No tuir informasaun neʼebé sélula espesiál neʼe detekta, ENS hasai enzima oioin atu halo hahán neʼe sai dodok hodi ita-nia isin bele xupa. ENS mós halo serbisu importante atu detekta hahán neʼebé siin ka iha kímiku seluk ruma, no tuirmai hasai enzima oioin hodi tuir informasaun neʼe.

Hanoin mós kona-ba buat seluk tan neʼebé ENS mak kontrola iha sistema dijestivu nian. Kuandu ita tolan tiha hahán ruma, ita-nia “kakutak segundu” neʼe haruka ita-nia estómagu no tee-oan atu book an hodi dudu hahán neʼe. ENS kontrola ita-nia orgaun sira-neʼe hodi manda atu book an makaʼas ka neineik, ka atu dudu hahán neʼe lalais ka neineik.

ENS mós sai nuʼudar seguransa atu proteje ita-nia isin husi hahán neʼebé karik iha baktéria neʼebé aat. Tan neʼe, porsentu 70 toʼo 80 husi sélula linfósitu neʼebé forma parte importante iha sistema imunolójiku mak iha ita-nia kabun! Kuandu ita-nia kabun simu hahán neʼebé la diʼak ba ita-nia isin, ENS sei book ita-nia isin atu hasai buat aat neʼe hodi muta, ka liuhusi diarreia.

Maski ita hanoin katak ENS iha ita-nia kabun serbisu ketak husi ita-nia kakutak, maibé tuir loloos, ita-nia sistema nervu nian iha ita-nia kabun no kakutak sempre serbisu hamutuk. Porezemplu,  ENS kontrola ormóniu neʼebé fó-hatene ba ita-nia kakutak kona-ba oras neʼebé ita presiza han, no mós kona-ba ita presiza han barak ka uitoan. ENS mós fó avizu ba ita-nia kakutak bainhira ita-nia kabun bosu demais toʼo besik atu sente laran-saʼe.

Loos duni, ita-nia kabun ho ita-nia kakutak iha relasaun neʼebé metin. Porezemplu, dala ruma hahán balu bele ajuda ita atu sente kontente. Relatóriu balu fó sai katak neʼe akontese kuandu ita-nia ENS haruka ‘sinál kontente’ ba ita-nia kakutak. Tan neʼe mak ema barak hakarak han hahán neʼebé sira gosta kuandu sira sente estrese. Sientista sira buka dalan oinsá atu book ita-nia ENS atu haruka sinál kontente ba ita-nia kakutak hodi bele fó tratamentu ba moras depresaun.

Ezemplu ida tan mak bainhira ita sente estrese, ita-nia kabun dulas. Dala ruma ita-nia kabun sai hanesan neʼe tanba ENS hamenus raan neʼebé baibain ita-nia kabun uza kuandu ita-nia kakutak sente estrese. Dala ruma mós, bainhira ita sente estrese, ita sente laran-saʼe tanba ENS haruka ita-nia kabun atu la halo ninia serbisu.

Maski ENS bele fó impaktu ba ita-nia sentimentu, maibé neʼe la dehan katak ENS bele hanoin ka foti desizaun. Tuir loloos, ENS laʼós kakutak. ENS la bele ajuda ita atu halo múzika, sura osan, ka halo TPC. Maski nuneʼe, ENS mak buat neʼebé komplikadu tebes no iha buat barak neʼebé sientista sira seidauk hatene. Tan neʼe, kuandu ita atu han, hanoin toʼok kona-ba prosesu neʼebé akontese iha ita-nia kabun laran!