Maski Bíblia la esplika kona-ba kaben tuir lei entre mane ho mane ka feto ho feto, maibé Bíblia esplika duni Maromak nia haree kona-ba hahalok omoseksuál.

Maski ema barak seidauk buka-hatene didiʼak Bíblia nia matadalan sira, maibé sira fó sai sira ida-idak nia hanoin kona-ba neʼe. Ema balu hatete katak Bíblia bandu hahalok omoseksuál. Maibé balu tan dehan, bainhira Bíblia haruka ema atu “hadomi ó-nia maluk”, neʼe katak Bíblia apoia ema nia hahalok seksuál hotu. —Roma 13:9.

Tuir Ita-nia hanoin, liafuan tuirmai neʼe loos ka sala?

1. Bíblia bandu hahalok omoseksuál.

2. Bíblia apoia hahalok omoseksuál.

3. Bíblia haruka ema atu odi no hakribi ema neʼebé halo hahalok omoseksuál.

RESPOSTA:

1. LOOS. Bíblia dehan: “Mane neʼebé toba ho mane . . . sei la hetan Maromak nia Ukun nuʼudar liman-rohan.” (1 Korinto 6:9, 10) Liafuan neʼe bele aplika mós ba feto neʼebé toba ho feto.—Roma 1:26.

2. SALA. Tuir Bíblia nia hanorin, relasaun seksuál mak entre feto ho mane deʼit, neʼebé sai ona feen-laʼen.—Gênesis (Kejadian) 1:27, 28; Provérbios (Amsal) 5:18, 19.

3. SALA. Maski Bíblia bandu hahalok omoseksuál, maibé Bíblia la apoia diskriminasaun ba ema neʼebé halo hahalok omoseksuál.—Roma 12:18. ^[1] (Haree nota iha pájina 9.)

Ami Testemuña ba Jeová fiar metin katak Bíblia nia hanorin kona-ba morál mak diʼak liu ba ita hotu, no ami hakaʼas an atu halo tuir hanorin sira-neʼe. (Isaías [Yesaya] 48:17) ^[2] Tan neʼe, ami la simu hahalok seksuál neʼebé mak kontra Bíblia, inklui mós hahalok omoseksuál. (1 Korinto 6:18) ^[3] Neʼe mak ami-nia desizaun, no ami iha direitu atu halaʼo ami-nia moris tuir desizaun neʼe.

Maibé, ami mós hakaʼas an atu “buka dame ho ema hotu”. (Ebreu 12:14) Tan neʼe, maski ami la simu hahalok omoseksuál, maibé ami la obriga ema seluk atu iha hanoin hanesan ho ami-nian. Ami mós la hola parte iha krime oioin neʼebé ema halo atu diskrimina omoseksuál sira, ka sente haksolok kuandu rona kona-ba buat sira-neʼe. Ami hakaʼas an atu halo tuir Jesus nia mandamentu neʼebé dehan: “Buat hotu neʼebé imi hakarak ema halo ba imi, imi mós tenke halo ba sira.”—Mateus 7:12.

Ema balu hatete katak, Bíblia apoia diskriminasaun ba omoseksuál sira, no ema neʼebé halo tuir Bíblia mak ema neʼebé lakohi tolera ema seluk. Sira dehan: ‘Bíblia hakerek iha tempu neʼebé ema barak iha hanoin neʼebé kloot. Maibé ohin loron, ita simu ema husi rasa no nasaun hotu, nuneʼe mós ho hahalok seksuál hotu.’ Tuir sira-nia hanoin, la simu hahalok omoseksuál mak hanesan deʼit ho la simu ema neʼebé rasa la hanesan. Maibé, neʼe laʼós komparasaun neʼebé loos. Tanbasá?

Tanba la simu hahalok omoseksuál la hanesan duni ho la simu ema neʼebé halo hahalok omoseksuál. Bíblia haruka ema kristaun atu hatudu respeitu ba ema hotu. (1 Pedro 2:17) ^[4] Maibé, neʼe la dehan katak ema kristaun tenke simu hahalok naran deʼit.

Porezemplu: Ita hanoin katak fuma mak hahalok neʼebé estraga ema nia isin, maibé Ita-nia kolega ida iha serbisu-fatin mak fumadór. Nia iha direitu ka lae, atu dehan katak Ita hanoin kloot tan deʼit Ita la gosta fuma? Se nia fuma no Ita la fuma, neʼe katak Ita diskrimina nia ka lae? Se nia obriga Ita atu troka Ita-nia hanoin, neʼe katak nia mak iha hanoin neʼebé kloot, loos ka lae?

Ami Testemuña ba Jeová hakarak atu moris tuir Bíblia nia matadalan kona-ba morál. Ami la simu hahalok sira neʼebé Bíblia bandu. Maibé ami mós respeitu ema seluk nia hanoin.

Ema balu hanoin: ‘Oinsá ho ema sira neʼebé iha hakarak omoseksuál nian? Se sira moris mai hanesan neʼe ona, no ita bandu fali sira atu labele moris tuir sira-nia hakarak seksuál nian, neʼe sei haterus deʼit sira, loos ka lae?’

Bíblia la koʼalia kona-ba tansá mak ema balu iha hakarak omoseksuál nian, maibé Bíblia esplika katak ema hotu moris mai nuʼudar sala-naʼin neʼebé iha hahalok ladiʼak. Bíblia mós temi hahalok sira neʼebé ita tenke hasees an atu bele halo Maromak kontente, no neʼe inklui mós hahalok omoseksuál.—2 Korinto 10:4, 5.

Ema balu dehan katak Bíblia nia hanorin neʼe demais liu ona. Maibé sira dehan hanesan neʼe tanba sira hanoin katak, ema hotu tenke moris tuir sira ida-idak nia hakarak seksuál nian, la presiza kontrola sira-nia hakarak neʼe, no mós la iha kbiit atu kontrola. Maibé tuir Bíblia, ita ema iha kbiit duni atu kontrola ita-nia hanoin no hakarak, la hanesan ho animál sira.—Koloso 3:5. ^[5]

Hanoin toʼok: Matenek-naʼin sira dehan katak ema balu sai nervozu lalais tanba  moris mai hanesan neʼe ona. Bíblia nunka esplika kona-ba ida-neʼe, maibé Bíblia fó sai katak ema balu iha toman atu “sempre hirus lalais”. (Provérbios [Amsal] 22:24; 29:22) Maski nuneʼe, Bíblia haruka sira atu ‘husik tiha hirus no laran-nakali’.—Salmo (Mazmur) 37:8; Éfeso 4:31.

Ita la hanoin katak Bíblia nia liafuan neʼe haterus deʼit ema hirusdór sira. Tuir loloos, maski ema balu fiar duni katak hirusdór balu moris mai hanesan neʼe ona, maibé sira mós hakaʼas an atu ajuda hirusdór sira-neʼe atu kontrola sira-nia emosaun.

Hanesan neʼe mós ho hahalok seluk hotu neʼebé kontra hasoru Bíblia nia matadalan, neʼe inklui relasaun entre feto ho mane neʼebé laʼós feen-laʼen. Bíblia dehan: “Imi ida-idak tenke hatene oinsá kontrola ninia isin rasik atu imi sai santu no atu Maromak simu imi, laʼós ho hakarak seksuál nian neʼebé kaan-teen.”—1 Tesalónika 4:4, 5.

Iha apóstolu nia tempu, ema balu neʼebé sai ema kristaun halo ona mudansa boot hodi husik hahalok aat oioin. Porezemplu, bainhira Bíblia temi kona-ba “ema neʼebé . . . adora estátua, ka halo sala-foʼer ho kaben-naʼin, ka mane neʼebé sai hanesan feen ba mane seluk”, tuirmai, Bíblia mós dehan: “Imi balu mós uluk halo hanesan neʼe.”—1 Korinto 6:9-11.

Liafuan “Imi balu mós uluk halo hanesan neʼe” hatudu katak ema neʼebé husik tiha hahalok omoseksuál la iha ona hakarak neʼe ka lae? Lae, sira tenke kontinua luta hasoru sira-nia hakarak neʼebé la diʼak. Tan neʼe, Bíblia mós fó laran-manas ba sira atu ‘kontinua moris tuir espíritu hodi la halo tuir hakarak isin nian’.—Galásia 5:16.

Neʼe hatudu katak, dala ruma ema kristaun sei iha hakarak neʼebé la loos no la moos. Maibé sira foti desizaun ona atu la halo tuir sira-nia hakarak neʼe. Sin, ema kristaun aprende oinsá atu la husik sira-nia hakarak aat isin nian sai buras toʼo hamosu sala.—Tiago 1:14, 15. ^[6]

Tuir Bíblia, hakarak ho hahalok mak buat rua neʼebé la hanesan duni. (Roma 7:16-25) Ema ida neʼebé iha hakarak omoseksuál nian bele kontrola duni ninia neon, hanesan ho kontrola hirus, sentimentu kaan osan, ka emosaun domin ba ema nia kaben.—1 Korinto 9:27; 2 Pedro 2:14, 15.

Maski ami Testemuña ba Jeová kaer metin ba Bíblia nia matadalan sira, maibé ami la obriga ema seluk atu iha hanoin neʼebé hanesan ho ami. Ami mós la protesta lei sira neʼebé proteje sira-nia direitu. Ami hakaʼas an atu haklaken kona-ba Bíblia nia matadalan ba ema hotu neʼebé hakarak rona.—Apóstolu 20:20.