ENJEÑEIRU sira hakfodak kona-ba nehek nia forsa boot atu lori buat neʼebé todan tebes liu fali nia rasik nia todan. Atu komprende kona-ba forsa boot neʼe, enjeñeiru sira iha Universidade Ohio, Estadus Unidus, uza komputadór atu halo modelu neʼebé hanesan ho nehek, ho parte ulun no isin. Sira kria modelu neʼe hodi uza CT scan neʼebé bele leno buat kiʼik tebes. Hodi halo nuneʼe, sira buka-hatene oinsá mak nehek bele iha forsa atu lori buat neʼebé todan tebes.

Tuir sira-nia estudu, parte importante mak uat mamar no mihis neʼebé liga metin nehek nia ulun ho isin neʼebé toos, tanba ho buat neʼe mak nehek sira bele tahan todan boot neʼebé sira lori ho ibun. Uat neʼebé liga metin nehek nia ulun no isin bele kompara ho ita-nia liman-fuan husi liman loos no karuk neʼebé kaʼit malu. Tuir sientista ida, ligasaun neʼe mak úniku tebes tanba liga parte neʼebé mamar ho toos, no karik neʼe mak fó forsa ba nehek atu lori buat neʼebé todan. Sira hein katak hodi komprende liután kona-ba neʼe, sira bele halo robot neʼebé bele hiʼit sasán todan liután.

Tuir Ita-nia hanoin oinsá? Nehek nia uat neʼe mosu mesak deʼit? Ka Maromak mak kria ida-neʼe?