“Istória neʼebé sai hanesan símbolu” neʼebé importante mai ita

KUANDU ita hakarak komprende ho loloos signifikadu husi eskritura balu, ita presiza halo komparasaun ho parte seluk husi Bíblia. Akontesimentu sira neʼebé temi iha Maromak nia Liafuan mak istória neʼebé tebes duni. Maibé istória balu iha signifikadu neʼebé kleʼan liu. Ezemplu ida mak istória kona-ba Abraão nia feen naʼin-rua. Apóstolu Paulo hatete katak neʼe mak “istória neʼebé sai hanesan símbolu”.​—Galásia 4:24.

Ita presiza tau atensaun ba istória neʼe tanba ida-neʼe fó sai lia-loos importante ida ba ema hotu neʼebé hakarak simu bensaun husi Maromak Jeová. Antes atu buka-hatene, mai ita haree situasaun saida mak book Paulo atu esplika signifikadu husi istória neʼe.

Iha apóstolu sira-nia tempu, problema ida mosu entre ema Kristaun sira iha sidade Galásia. Ema Kristaun balu “hakaʼas an atu selebra loron sira, fulan sira, tempu no tinan sira” hodi tuir Moisés nia Ukun-Fuan. Sira dehan katak fiar-naʼin sira tenkesér halo tuir Ukun-Fuan hodi Maromak bele simu sira. (Galásia 4:10; 5:2, 3) Maibé Paulo hatene katak ema Kristaun la presiza halo tuir Moisés nia Ukun-Fuan. Atu esplika kona-ba neʼe, Paulo uza istória ida neʼebé ema Judeu hotu hatene.

Paulo fó-hanoin ema Galásia katak nasaun Judeu nia aman Abraão iha oan Ismael no Isaac. Ismael mak oan husi atan-feto Agar, no Isaac mak oan husi Abraão nia feen Sara neʼebé livre. Ema Galásia neʼebé kaer metin ba Moisés nia Ukun-Fuan hatene katak foufoun Sara mak feto neʼebé labele iha oan, tan neʼe nia fó ninia atan Agar ba Abraão atu bele iha oan. Sira mós hatene katak depois Ismael moris, Agar komesa hakribi ninia naʼi Sara. Maibé ikusmai Sara neʼebé idade ona tuur-ahi oan-mane ida, neʼe mak Isaac. Liutiha tinan balu, Abraão haruka Agar ho Ismael sai tanba Ismael trata aat Isaac.​—Génesis 16:1-4; 17:15-17; 21:1-14; Galásia 4:22, 23.

Feto rua, aliansa rua

Paulo esplika pontu importante husi istória neʼe. Nia hakerek: “Feto rua neʼe reprezenta aliansa rua, aliansa ida husi Foho Sinai, neʼe hanesan Agar neʼebé fó moris ba oan nuʼudar atan. Agar reprezenta . . . Jeruzalein agora nian, tanba nia sai atan hamutuk ho ninia oan sira.” (Galásia 4:24, 25) Agar reprezenta Izraél ho sidade kapitál Jeruzalein. Ema Judeu iha obrigasaun atu serbí Jeová hodi tuir aliansa Ukun-Fuan nian neʼebé sira halo iha Foho Sinai. No Ukun-Fuan neʼe fó-hanoin beibeik ba sira katak sira mak atan ba sala no presiza hetan ajuda atu sai livre husi situasaun neʼe.​—Jeremias 31:31, 32; Roma 7:14-24.

Entaun, Sara, “feto neʼebé livre”, no ninia oan Isaac reprezenta saida? Paulo esplika katak Sara, “feto neʼebé labele iha oan”, reprezenta Maromak nia feen, katak ninia organizasaun parte lalehan nian. Feto simbóliku neʼe labele iha oan, tanba antes Jesus mai toʼo rai, feto neʼe seidauk iha “oan” neʼebé hetan espíritu santu atu bá lalehan. (Galásia 4:27; Isaias 54:1-6) Maibé iha loron Pentekostes tinan 33 EC, mane no feto balu hetan espíritu santu no moris nuʼudar oan husi feto simbóliku neʼe. Oan sira-neʼe sai Maromak nia oan-hakiak no ikusmai simu liman-rohan hamutuk ho Jesus Kristu iha aliansa foun nia okos. (Roma 8:15-17) Oan sira-neʼe ida mak apóstolu Paulo, no nia hakerek: “Jeruzalein lalehan nian mak livre, no nia mak ita-nia inan.”​—Galásia 4:26.

Feto rua neʼe nia oan sira

Bíblia konta katak Ismael fó-terus ba Isaac. Hanesan neʼe mós ho apóstolu sira-nia tempu, Jeruzalein nia oan sira neʼebé iha situasaun atan goza no fó-terus ba oan sira husi Jeruzalein lalehan nian. Paulo esplika: “Hanesan iha tempu neʼebá, oan neʼebé moris mai tuir isin [Ismael] hahú fó-terus ba oan neʼebé moris mai liuhusi Maromak nia espíritu [Isaac].” (Galásia 4:29) Bainhira Jesus Kristu hahú ninia knaar iha mundu atu haklaken kona-ba Maromak nia Ukun, ulun-naʼin sira husi relijiaun Judeu nian hatudu hahalok hanesan ho Agar nia oan Ismael neʼebé trata aat Isaac neʼebé iha direitu atu simu liman-rohan. Ulun-naʼin relijiaun sira-neʼe goza no fó-terus Jesus Kristu tanba sira hanoin katak sira mak Abraão nia oan neʼebé iha direitu atu simu liman-rohan no Jesus mak ema neʼebé hanetik sira.

Antes ema Izraél nia ulun-naʼin sira oho Jesus, Jesus dehan: “Jeruzalein, Jeruzalein, ó neʼebé oho profeta sira no tuda ema neʼebé Maromak haruka ba ó! Dala hira ona mak haʼu hakarak atu halibur ó-nia oan sira hanesan manu-inan halibur ninia oan iha ninia liras okos! Maibé imi lakohi. Tan neʼe, Maromak sei husik imi-nia uma.”​—Mateus 23:37, 38.

Akontesimentu sira iha Jesus nia tempu hatudu katak nasaun Izraél neʼebé reprezenta husi Agar la prodús oan sira neʼebé sei simu liman-rohan hamutuk ho Jesus. Ema Judeu sira hatudu hahalok foti an hodi fiar katak sira mak iha direitu atu simu liman-rohan, maibé Jeová la simu sira. Klaru katak ema Izraél balu sai duni ema neʼebé hetan liman-rohan hamutuk ho Kristu. Maibé sira hetan oportunidade espesiál neʼe tanba sira tau fiar ba Jesus, laʼós tanba sira mak jerasaun husi Izraél.

Ema neʼebé hetan liman-rohan hamutuk ho Jesus sai klaru iha loron Pentekostes tinan 33 EC. Nuʼudar tempu liu daudaun, Jeová mós hili ema seluk tan nuʼudar oan husi Jeruzalein lalehan nian.

Bainhira Paulo esplika kona-ba “istória neʼebé sai hanesan símbolu”, ninia objetivu mak atu fó sai katak aliansa foun mak diʼak liu fali aliansa Ukun-Fuan nian liuhusi Moisés. La iha ida mak bele halo kontente Maromak hodi halo tuir Moisés nia Ukun-Fuan ho kompletu, tanba ema hotu la perfeitu no Ukun-Fuan neʼe hatudu sai katak sira mak atan ba sala. Maibé hanesan Paulo esplika, Jesus mai atu “sosa fali ema neʼebé iha ukun-fuan nia okos hodi halo sira sai livre”. (Galásia 4:4, 5) Tan neʼe, ema neʼebé fiar ba Kristu nia sakrifísiu bele sai livre husi Ukun-Fuan neʼebé tesi-lia ba sira.​—Galásia 5:1-6.

Istória neʼe importante mai ita

Tanbasá importante atu hatene kona-ba Paulo nia esplikasaun husi feto simbóliku sira-neʼe? Razaun ida mak tanba istória neʼe ajuda ita atu komprende signifikadu kleʼan husi Bíblia. Esplikasaun neʼe hametin ita-nia fiar katak informasaun husi Bíblia la kontra malu.​—1 Tesalónika 2:13.

Liután neʼe, buat neʼebé reprezenta husi istória neʼe mak importante tebes ba ita-nia futuru neʼebé haksolok. Se la iha “oan sira” neʼebé Maromak promete nanis, ita-nia futuru mak atan ba sala no mate. Maibé hodi simu ukun husi Kristu hamutuk ho sira neʼebé sai parte husi Maromak nia promesa ba Abraão, “nasaun sira hotu iha mundu sei hetan bensaun”. (Génesis 22:18) Neʼe sei akontese bainhira ema hotu sai livre husi sala, kondisaun la perfeitu, triste, no mate. (Isaias 25:8, 9) Tempu neʼebá mak furak no kmanek tebes!

[Dezeñu]

Maromak halo aliansa Ukun-Fuan nian iha Foho Sinai

[Credit Line]

Pictorial Archive (Near Eastern History) Est.

[Dezeñu]

Istória kona-ba Sara no Agar iha signifikadu saida?