Ita bele mai toʼo Masedónia ka lae?

IHA sidade naran Tróade iha Ázia Kiʼik, apóstolu Paulo haree ema Masedónia ida iha ninia mehi. Ema neʼe husu nia: “Mai toʼo Masedónia atu tulun ami.” Paulo no nia maluk ‘hanoin katak Maromak bolu sira atu bá haklaken Nia Liafuan’ ba ema Masedónia. Neʼe lori rezultadu saida? Iha Masedónia nia sidade boot naran Filipe, feto ida naran Lídia ho nia umakain sai ema kristaun. No ema seluk husi rai neʼe mós sai ema kristaun.—Apos 16:9-15.

Ohin loron Testemuña ba Jeová mós hatudu laran-manas hanesan Paulo. Sira barak prontu atu uza sira-nia osan rasik atu muda ba rai seluk neʼebé presiza haklaken-naʼin liután. Porezemplu, Lisa husi rai-Kanadá hakarak aumenta ninia serbisu haklaken no nia muda ba rai-Kénia. Trevor no Emily mós husi rai-Kanadá, sira muda ba rai-Malavi atu halo hanesan. Kuandu Paul no Maggie husi rai-Inglaterra komesa simu pensaun, sira haree katak neʼe oportunidade furak atu halo buat barak liután iha Maromak Jeová nia serbisu. Nuneʼe, sira muda ba parte leste iha Áfrika. Ita mós hakarak aumenta Ita-nia serbisu ba Maromak ka lae? Ita mós hanoin atu muda ba rai seluk hanesan sira ka lae? Se nuneʼe, Bíblia nia matadalan saida deʼit mak bele ajuda Ita? Saida mak bele ajuda Ita atu hetan rezultadu diʼak?

Haʼu bele muda ba rai seluk ka lae?

Buat ida neʼebé importante tebes atu hanoin mak tansá Ita hakarak muda ba rai seluk. Tuir Jesus, ukun-fuan neʼebé boot liu mak: “Ó sei hadomi Naʼi, ó-nia Maromak ho neon ho laran, ho ó-nia klamar tomak.” Ita muda ba rai seluk tanba Ita hadomi Maromak Jeová no hakarak halaʼo knaar neʼebé Ita simu hodi ajuda ema atu  sai Jesus nia dixípulu. Jesus hatutan tan: “Ida tuirmai, atu hanesan nia mak: ‘Ó sei hadomi ema seluk hanesan ó-nia an rasik.’” Sin, Ita ajuda ema seluk tanba Ita hadomi sira. (Mt 22:36-39; 28:19, 20) Serbí Maromak iha rai seluk, baibain neʼe la fasil no Ita presiza husik buat barak. Ita la bá atu feriadu. Domin mak tenkesér book Ita atu muda ba rai seluk. Remco no Suzanne husi rai-Olanda, agora serbí iha rai-Namíbia, sira hatete: “Domin mak book ami atu hela iha-neʼe.”

Katuas ida, naran Willie, neʼebé iha knaar atu vizita kongregasaun sira iha rai-Namíbia, hatete: “Sira neʼebé hela ba tempu kleur iha rai seluk la hein deʼit irmaun sira iha rai neʼe atu ajuda sira. Maibé sira mai atu ajuda no serbisu hamutuk ho irmaun no irmán sira iha serbisu haklaken.”

Sin, importante tebes atu hanoin didiʼak Ita-nia razaun atu muda ba rai seluk. Maibé antes atu foti desizaun, diʼak mós atu husu ba Ita-nia an: ‘Haʼu iha esperiénsia saida deʼit neʼebé haʼu bele uza atu serbí Maromak iha rai seluk? Haʼu hatene haklaken no hanorin ho diʼak ka lae? Haʼu koʼalia língua saida? Haʼu prontu atu aprende língua seluk ka lae?’ Koʼalia hamutuk ho Ita-nia família. No husu konsellu husi katuas sira iha Ita-nia kongregasaun. Liuliu, halo orasaun ba Maromak Jeová kona-ba ida-neʼe. Hodi halo nuneʼe hotu, Ita bele tetu didiʼak se Ita bele muda atu serbí iha rai seluk ka lae.—Haree kaixa “Hanoin didiʼak Ita-nia situasaun”.

Atu serbí iha neʼebé?

Paulo hetan konvite atu bá Masedónia liuhusi mehi. Ohin loron, Maromak Jeová la uza  mehi ka milagre hodi fó-hatene ita atu serbí iha neʼebé. Maibé, liuhusi Livru Haklaken no livru sira seluk, ita bele hatene kona-ba fatin neʼebé presiza haklaken-naʼin barak liután. Entaun, ulukliu, halo lista kona-ba rai sira neʼebé presiza liu haklaken-naʼin. Se Ita seidauk prontu atu aprende língua seluk ka Ita hanoin katak Ita la bele hela iha rai seluk ba tempu kleur, diʼak atu hanoin kona-ba serbí iha rai neʼebé koʼalia língua neʼebé Ita hatene ona. Depois buka informasaun liután kona-ba rai neʼe, porezemplu kona-ba vistu, Ita bele uza transporte saida, fatin neʼe seguru ka lae, sasán iha neʼebá karun ka lae, no rai neʼe manas ka malirin. Karik diʼak atu koʼalia ho irmaun sira neʼebé iha esperiénsia ona kona-ba serbí iha rai seluk. Halo orasaun hodi bele foti desizaun ho matenek. Hanoin-hetan katak ‘espíritu santu la husik Paulo ho ninia maluk atu haklaken lia-menon iha Ázia tomak’. Maski sira hakaʼas an atu bá Bitínia, maibé “Jesus nia espíritu la husik sira” atu halo nuneʼe. Karik Ita mós la bele hatene kedas iha neʼebé mak diʼak ba Ita atu serbí.—Apos 16:6-10.

Kuandu Ita hanoin ona rai balu neʼebé Ita hakarak bá, Ita bele hakerek surat ba sukursál sira husi Testemuña ba Jeová neʼebé tau matan ba rai sira-neʼe. Iha Ita-nia surat, fó-hatene Ita-nia esperiénsia no knaar sira neʼebé Ita halaʼo daudauk iha Ita-nia kongregasaun. Diʼak mós atu husu pergunta sira, hanesan: Sasán karun ka lae? Fasil atu hetan uma ka lae? Iha ospitál ka lae? Fasil atu hetan serbisu ka lae? Tuirmai, fó surat neʼe ba Ita-nia kongregasaun nia grupu serbisu. Sira sei hakerek surat kona-ba Ita no haruka hamutuk ho Ita-nia surat ba sukursál sira neʼebé tau matan ba rai sira neʼebé Ita hili. Karik resposta husi sukursál sira-neʼe sei ajuda Ita atu foti desizaun kona-ba rai ida-neʼebé mak Ita sei bá.

Willie, neʼebé temi uluk, hatete: “Sira neʼebé vizita uluk atu buka-hatene moris oinsá loos iha rai neʼebé sira hanoin atu muda, baibain sira serbí iha rai neʼe ho kontente. Porezemplu, feen-laʼen neʼebé vizita rai ida haree katak susar ba sira atu hela iha foho. Tan neʼe sira hili atu muda ba sidade kiʼik, neʼebé presiza haklaken-naʼin no sira mós hetan buat neʼebé sira presiza hodi bele moris kontente.”

Hasoru susar foun

Loos, susar atu husik ita-nia uma hodi muda ba fatin foun. Lisa neʼebé temi uluk, hatete: “Buat neʼebé susar tebes mai haʼu mak sente mesak.” Saida mak ajuda nia? Nia hamutuk beibeik ho irmaun-irmán sira iha ninia kongregasaun foun. Nia hakaʼas an atu hatene sira hotu nia naran. Nia toʼo reuniaun-fatin sedu no fila ikus atubele koʼalia ho irmaun-irmán sira. Lisa mós haklaken hamutuk ho sira no konvida sira ba nia uma. Ikusmai, nia iha kolega foun barak. Nia hatutan tan: “Maski haʼu husik buat barak iha haʼu-nia rai, maibé  haʼu sente kontente tanba Maromak Jeová fó bensaun ba haʼu-nia hakaʼas-an.”

Paul no Maggie mós husik uma neʼebé sira hela ba tinan 30 no husik oan neʼebé boot ona. Paul hatete: “Uluk ami hanoin katak susar atu husik ami-nia sasán sira, maibé neʼe fasil deʼit. Buat neʼebé susar liu mak husik família. Ami tanis kuandu ami saʼe aviaun no hanoin ami la bele halo ida-neʼe. Maibé ami sadere ba Aman Jeová. No mós, hodi hakbesik ho ami-nia kolega foun ajuda ami atu kontinua serbí iha rai neʼe.”

Greg no Crystal neʼebé husi rai-Kanadá hili atu muda ba rai-Namíbia tanba língua ofisiál iha rai neʼe mak lia-inglés. Maibé lakleur, sira haree katak diʼak se sira aprende língua neʼebé ema barak koʼalia iha rai neʼe. Sira hatete: “Foufoun, ami sente laran-tun. Maibé hodi koʼalia sira-nia língua mak ami komesa komprende sira-nia kultura. No, hodi hamutuk beibeik ho irmaun-irmán sira iha rai neʼe ami sai toman lalais iha fatin foun neʼe.”

Sin, kuandu Ita haraik-an no prontu atu serbí irmaun-irmán sira, neʼe bele book sira-nia laran. Jenny neʼebé husi rai-Irlanda hanoin-hetan família balu neʼebé muda ba neʼebá. Nia hatete: “Sira mak hatudu laran-luak mai ami, sira la mai atu kongregasaun ajuda sira, maibé sira mak ajuda kongregasaun. Sira hatudu laran-manas no sira kontente tebes, ida-neʼe book haʼu atu halo buat neʼebé hanesan.” Agora, Jenny ho ninia laʼen serbí nuʼudar misionáriu iha rai-Gámbia.

Bensaun husi Maromak Jeová mak “halo ema riku”

Apóstolu Paulo hetan duni rezultadu diʼak iha Masedónia! Maizumenus tinan sanulu liutiha, nia hakerek ba irmaun sira iha sidade Filipe: “Haʼu fó-agradese ba haʼu-nia Maromak wainhira haʼu hanoin imi.”—Flp 1:3.

Trevor no Emily mós sente hanesan apóstolu Paulo. Sira serbí iha rai-Malavi antes sira hetan konvite atu tuir eskola Watchtower Bible School of Gilead, neʼebé fó treinu ba ema atu sai misionáriu. Sira hatete: “Uluk ami hanoin barak kona-ba ami-nia desizaun, maski nuneʼe ami kontente. Ami naʼin-rua sai besik liu ba malu no sente Maromak Jeová nia bensaun.” Greg no Crystal neʼebé temi uluk, hatete: “Ba ami, la iha buat ida neʼebé diʼak liu fali buat neʼebé ami halo daudauk.”

Tuir loloos, laʼós ema hotu iha oportunidade atu serbí iha rai seluk. Ba ema balu, diʼak liu atu muda ba distritu neʼebé presiza haklaken-naʼin liután. Sira seluk karik bele halo planu atu serbí iha kongregasaun neʼebé besik sira. Buat neʼebé importante mak halo buat hotu neʼebé ita bele atu serbí Maromak Jeová. (Kol 3:23) Hodi halo nuneʼe, ita mós sei sente hanesan Maromak nia liafuan neʼebé dehan: “Bensaun husi Maromak Jeová, neʼe mak halo ema riku, no nia la aumenta buat neʼebé halo laran-susar.”—Prov 10:22.

[Kaixa/Dezeñu iha pájina 5]

Hanoin didiʼak Ita-nia situasaun

Atu hanoin didiʼak Ita-nia situasaun, husu Ita-nia an pergunta tuirmai neʼe, halo orasaun, no tetu didiʼak se Ita bele muda ba rai seluk ka lae. Informasaun husi Menara Pengawal sira tuirmai neʼe bele ajuda Ita atu halo nuneʼe.

• Haʼu tau uluk haʼu-nia serbisu ba Maromak iha haʼu-nia moris ka lae?—Langkah-Langkah Menuju Kebahagiaan (15 Oktober 1997, pájina 6)

• Haʼu hatene haklaken no hanorin ho diʼak ka lae?—Cara untuk Dapat Berhasil dalam Pelayanan Perintis (15 Mei 1989, pájina 21)

• Haʼu bele hela dook husi haʼu-nia família no kolega sira ka lae?—Mengatasi Kerinduan akan Kampung Halaman dalam Dinas Allah (15 Mei 1994, pájina 28)

• Haʼu bele aprende língua foun ka lae?—Melayani di Sidang Berbahasa Asing (15 Maret 2006, pájina 17)

• Haʼu-nia osan toʼo atu muda ka lae?—Dapatkah Saudara Melayani di Negeri Asing? (15 Oktober 1999, pájina 23)

[Dezeñu iha pájina 6]

Kuandu Ita haraik-an no prontu atu serbí irmaun-irmán sira, neʼe bele book sira-nia laran

[Dezeñu iha pájina 7]

Sira neʼebé mai atu ajuda ema seluk mak hetan rezultadu diʼak