Haree moris kaben nian nuʼudar prezente husi Maromak
Haree moris kaben nian nuʼudar prezente husi Maromak
“Tan neʼe mak mane ida sei husik nia aman no inan no nia tenke moris hamutuk ho nia feen, no sira sei sai isin ida deʼit.”—GÊN 2:24.
1. Tanbasá mak Maromak merese atu ita hatudu respeitu ba nia?
MAROMAK JEOVÁ, Ida neʼebé hahú moris kaben nian, merese duni atu ema hatudu respeitu ba nia. Nuʼudar ita-nia Kriadór, Ukun-Naʼin Boot Liu Hotu no Aman iha lalehan, nia fó mai ita “prezente diʼak ida-ida no kmanek loloos ida-ida”. (Tgo 1:17; Apok 4:11) Nia prezente sira hatudu katak nia hadomi tebes ema. (1 Joao 4:8) Buat hotu neʼebé nia hanorin ita, buat hotu neʼebé nia husu ita atu halo, no buat hotu neʼebé nia fó ba ita sempre ba ita-nia diʼak.—Isa 48:17.
2. Maromak Jeová fó matadalan saida ba kaben-naʼin primeiru?
2 Bíblia hatudu katak moris kaben nian mak “prezente diʼak” ida husi Maromak. (Rute 1:9; 2:12) Kuandu Maromak Jeová halo kazamentu primeiru, nia fó ba Adão no Eva matadalan kona-ba oinsá atu halaʼo moris kaben nian ho didiʼak. (Lee Mateus 19:4-6.) Se sira halo tuir Maromak nia matadalan, sira sei moris kontente ba nafatin. Maibé, tanba sira la halo tuir Maromak nia mandamentu, sira hetan susar barak.—Gên 3:6-13, 16-19, 23.
3, 4. (a) Oinsá mak ema barak ohin loron la respeitu moris kaben nian no mós Maromak Jeová? (b) Ezemplu kona-ba saida mak ita sei haree iha lisaun neʼe?
3 Hanesan kaben-naʼin primeiru, ema barak ohin loron halo desizaun hodi la halo tuir ka la hanoin kona-ba Maromak Jeová nia matadalan kona-ba moris kaben nian. Ema balu moris hamutuk deʼit nuʼudar feen-laʼen, maibé lakohi atu kaben. No ema balu seluk halaʼo moris kaben nian tuir deʼit sira-nia hakarak. (Rom 1:24-32; 2 Tim 3:1-5) Sira la hanoin katak moris kaben nian mak prezente husi Maromak, no hodi la respeitu prezente neʼe, sira mós la respeitu Maromak Jeová.
4 Dala ruma, Maromak nia atan balu mós la haree moris kaben nian tuir Maromak Jeová nia haree. Kaben-naʼin balu deside atu haketak malu, ka soe malu maski la iha razaun husi Bíblia atu apoia sira-nia desizaun. Oinsá mak ita bele hasees an husi situasaun hanesan neʼe? Oinsá mak Maromak nia matadalan iha Gênesis 2:24 bele ajuda ema kristaun atu hametin sira-nia moris kaben nian? No oinsá mak sira neʼebé hanoin atu kaben bele prepara an ba ida-neʼe? Mai ita haree kona-ba ezemplu tolu iha Bíblia laran kona-ba moris kaben nian neʼebé laʼo ho didiʼak. Ezemplu sira-neʼe sei hatudu katak respeitu ba Maromak Jeová mak importante tebes atu bele iha moris kaben nian neʼebé tahan ba tempu kleur.
Nafatin laran-metin
5, 6. Situasaun saida mak koko Zacarias no Isabel nia moris kaben nian? No oinsá mak Maromak haraik bensaun ba sira-nia laran-metin?
5 Zacarias no Isabel (ka Elisabete) hakaʼas an atu halo buat hotu ho loos. Sira ida-idak hili atu kaben ho ema neʼebé serbí Maromak ho laran-metin. Zacarias ho laran-metin halaʼo ninia responsabilidade nuʼudar amlulik, no sira naʼin-rua hakaʼas an atu halo tuir Maromak nia Ukun-Fuan. Sin, sira iha razaun barak atubele sente kontente. Maibé, se ita moris iha tempu neʼebá no ita vizita sira-nia uma iha Judá, ita sei haree kedas katak iha buat ida neʼebé falta iha sira-nia moris. Sira la iha oan. Isabel la bele iha oan, no sira naʼin-rua mós katuas no ferik ona.—Lc 1:5-7.
6 Iha Israel antigu, iha oan mak buat neʼebé importante tebes, no baibain família ida iha oan barak. (1 Sam 1:2, 6, 10; Ps. 128:3, 4) Mane sira iha tempu neʼebá dala ruma ho laran-aat soe sira-nia feen neʼebé la bele fó oan ba sira. Maski nuneʼe, Zacarias ho laran-metin moris hamutuk nafatin ho Isabel. Sira lakohi atu buka razaun oioin atu sees husi sira-nia moris kaben nian. Maski la iha oan halo sira triste, maibé sira kontinua ho laran-metin serbí Maromak Jeová hamutuk. Ikusmai, Maromak Jeová halo milagre hodi haraik bensaun ba sira atubele iha oan-mane ida.—Lc 1:8-14.
7. Iha dalan saida tan mak Isabel hatudu katak nia laran-metin ba nia laʼen?
7 Isabel hatudu mós ninia laran-metin iha dalan ida tan. Kuandu ninia oan foin moris, Zacarias la bele koʼalia tanba Maromak halo nia sai monok. Ida-neʼe akontese tanba nia duvida kona-ba buat neʼebé Maromak nia anju hatete. Maski nia monok, maibé klaru katak antes labarik neʼe moris Zacarias hatudu ona ba nia feen katak Maromak Jeová nia anju hatete ba nia atu hanaran labarik neʼe “João”. Viziñu no família sira hakarak atu hanaran labarik neʼe tuir nia aman nia naran. Maibé Isabel ho laran-metin apoia ninia laʼen nia desizaun. Nia hatete: “Lae, nia naran João.”—Lc 1:59-63.
8, 9. (a) Oinsá mak laran-metin bele hametin moris kaben nian? (b) Iha dalan saida deʼit mak laʼen no feen bele hatudu laran-metin ba malu?
8 Hanesan Zacarias no Isabel, kaben-naʼin sira ohin loron mós hasoru susar oioin neʼebé halo sira laran-tun. Se kaben-naʼin sira la hatudu laran-metin ba malu, moris kaben nian la bele sai buras ka tahan ba tempu kleur. Hahalok hanesan hatudu interese ba ema neʼebé laʼós ita-nia kaben, haree pornografia, halo sala-foʼer, no hahalok aat seluk bele halakon kaben-naʼin nia fiar ba malu. No kuandu kaben-naʼin la fiar ba malu tan, sira-nia domin mós hahú namlaek. Laran-metin mak hanesan moru ida neʼebé haleʼu uma atu proteje ema iha uma neʼe, hodi nuneʼe ema aat la bele tama no perigu oioin la bele kona sira. Ida-neʼe halo sira sente seguru iha uma laran. Nuneʼe, kuandu laʼen no feen hatudu laran-metin ba malu, sira bele hela hamutuk ho seguru no bele loke sira-nia laran ba malu, no sira-nia domin ba malu kontinua sai buras. Sin, laran-metin mak importante tebes!
9 Maromak hatete ba Adão: “Tan neʼe mak mane ida sei husik nia aman no inan no nia tenke moris hamutuk ho nia feen.” (Gên 2:24) Ida-neʼe katak sá? Ida-neʼe katak kuandu ema kaben ona, sira-nia relasaun ho kolega ka família seluk labele hanesan uluk. Sira ida-idak presiza fó uluk sira-nia tempu ba sira-nia kaben. Sira labele tan hanoin uluk kona-ba kolega ka família sira-nia hakarak. Sira mós labele husik inan-aman atu mete iha desizaun neʼebé sira halo ka mete iha problema iha kaben laran. Kaben-naʼin tenke moris hamutuk nuʼudar isin ida deʼit. Neʼe mak Maromak nia matadalan.
10. Saida mak ajuda kaben-naʼin sira atu haburas hahalok laran-metin?
10 Iha família neʼebé laʼen no feen iha fiar neʼebé la hanesan, laran-metin ba malu mós lori bensaun. Irmán ida neʼebé nia laʼen laʼós fiar-naʼin, hatete: “Haʼu agradese tebes ba Maromak Jeová tanba hanorin haʼu kona-ba oinsá atu hakruʼuk an ba haʼu-nia laʼen no atu hatudu respeitu neʼebé kleʼan ba nia. Hodi nafatin laran-metin, ida-neʼe ajuda haʼu atu hadomi no respeitu haʼu-nia laʼen ba tinan 47.” (1 Kor 7:10, 11; 1 Ped 3:1, 2) Tan neʼe, hakaʼas an atu halo ita-nia kaben sente seguru. Liuhusi ita-nia liafuan no hahalok, diʼak atu buka dalan oioin hodi halo ita-nia kaben hatene katak ba ita, nia mak ema neʼebé importante liu hotu iha mundu neʼe. Hakaʼas an atu la husik buat ida ka ema ida atu hanetik ita-nia relasaun diʼak ho ita-nia kaben. (Lee Provérbios 5:18b-20. *) Ron ho Jeannette, neʼebé kaben ona ba tinan 35 liu, hatete: “Tanba ami laran-metin atu halo buat neʼebé Maromak hakarak, ami iha moris kaben nian neʼebé laʼo ho diʼak no kontente.”
Laran ida deʼit hametin moris kaben nian
11, 12. Saida mak Áquila no Priscila hatudu kuandu (a) serbisu iha uma laran, (b) serbisu atu manán osan, no (c) serbisu haklaken?
11 Kuandu apóstolu Paulo koʼalia kona-ba ninia belun Áquila no Priscila, nia sempre temi sira-nia naran hamutuk. Kaben-naʼin neʼe sai nuʼudar ezemplu diʼak kona-ba halo tuir Maromak nia konsellu atu laʼen no feen sai “isin ida deʼit”. (Gên 2:24) Sira sempre serbisu hamutuk iha uma laran, iha serbisu atu manán osan, no iha serbisu haklaken. Porezemplu, kuandu Paulo foin toʼo iha Korinto, Áquila no Priscila ho laran-luak konvida nia atu hela iha sira-nia uma. No uma neʼe Paulo uza ba tempu kleur hodi halaʼo ninia serbisu haklaken no hanorin. Tuirmai, iha Éfeso, Áquila no Priscila fó sira-nia uma nuʼudar fatin atu halaʼo reuniaun kongregasaun nian no sira mós serbí hamutuk atu ajuda ema foun sira, hanesan Apolo, atu komprende liután kona-ba lia-loos. (Apos 18:2, 18-26) Kaben-naʼin neʼe, neʼebé laran-manas tebes, muda ba Roma, no iha neʼebá sira mós fó sira-nia uma nuʼudar fatin atu kongregasaun halaʼo reuniaun sira. Ikusmai, sira muda fali ba Éfeso, no sira kontinua hametin sira-nia irmaun-irmán sira-nia fiar.—Rom 16:3-5.
12 Ba tempu balu, Áquila no Priscila mós serbisu hamutuk ho Paulo atu halo tenda. Iha situasaun neʼe, kaben-naʼin neʼe mós nafatin apoia malu. (Apos 18:3) Nuneʼe, buat neʼebé ajuda sira atu tau uluk Maromak Jeová nia serbisu iha sira-nia moris kaben nian mak tempu neʼebé sira uza atu halo atividade kristaun nian hamutuk. Iha Korinto, iha Éfeso, no iha Roma, ema barak hatene sira nuʼudar “maluk iha serbisu iha Kristu Jesus”. (Rom 16:3) Sira apoia malu atu habelar serbisu haklaken iha fatin naran deʼit neʼebé sira serbí.
13, 14. (a) Situasaun saida mak bele hanetik ita atu la halo buat hotu ho laran ida deʼit? (b) Buat balu saida mak kaben-naʼin sira bele halo atu hametin sira-nia relasaun nuʼudar “isin ida deʼit”?
13 Klaru katak hodi iha planu neʼebé hanesan no hodi halo atividade barak hamutuk, ida-neʼe hametin ita-nia moris kaben nian. (Ecle 4:9, 10) Maibé, triste katak kaben-naʼin barak ohin loron la uza tempu barak hamutuk. Sira serbisu ba oras barak iha fatin neʼebé la hanesan. Kaben-naʼin seluk karik laʼo beibeik ba fatin dook hodi halo serbisu ka muda ba rai seluk hodi halo serbisu iha neʼebá no haruka fali osan ba sira-nia kaben. Dala ruma iha uma, kaben-naʼin balu mós sente katak sira ladún besik ba malu tanba sira uza tempu barak liu atu haree televizaun, halimar desportu, video game, ka uza internét. Ida-neʼe akontese iha ita-nia família ka lae? Se nuneʼe, ita bele troka ita-nia situasaun hodi uza tempu barak liu hamutuk ho ita-nia kaben ka lae? Porezemplu, karik ita bele halo serbisu uma laran nian balu hamutuk, hanesan fase bikan, ka serbisu iha jardín. Ka karik ita bele serbisu hamutuk atu tau matan ba ita-nia oan ka atu ajuda inan-aman neʼebé moras.
14 Buat neʼebé importante liu mak uza beibeik tempu hamutuk atu serbí Maromak Jeová. Porezemplu, koʼalia hamutuk kona-ba eskritura loroloron nian no halaʼo adorasaun família nian sei fó oportunidade diʼak ba ita-nia família atu nafatin iha hanoin no planu neʼebé hanesan. Diʼak mós atu uza tempu hodi halo serbisu haklaken hamutuk. Se bele, koko atu serbí hamutuk nuʼudar pioneiru, maski ita iha tempu atu halo serbisu neʼe ba fulan ida ka ba tinan ida deʼit. (Lee 1 Korinto 15:58.) Irmán ida neʼebé pioneiru hamutuk ho nia laʼen, hatete: “Serbisu haklaken mak dalan ida ba ami atu uza tempu hamutuk no koʼalia ba malu. Tanba ami naʼin-rua iha planu neʼebé hanesan atu ajuda ema seluk hatene kona-ba Maromak, ida-neʼe halo haʼu sente katak ami iha laran ida deʼit. No haʼu sente besik liu ba nia laʼós deʼit nuʼudar haʼu-nia laʼen, maibé mós nuʼudar belun neʼebé diʼak.” Sin, nuʼudar ita serbisu hamutuk atu halo atividade neʼebé importante liu, ita-nia planu, hakarak no toman sira neineik-neineik sei sai hanesan ho ita-nia kaben nian. Ikusmai, hanesan Áquila no Priscila, Ita mós sei hanoin, sente, no halo buat hotu nuʼudar “isin ida deʼit”.
Tau uluk Maromak iha ita-nia moris kaben nian
15. Saida mak kaben-naʼin sira presiza haburas hodi moris kaben nian bele laʼo ho diʼak? Esplika toʼok.
15 Jesus hatene katak importante duni ba kaben-naʼin sira atu tau uluk Maromak iha sira-nia moris kaben nian. Nia haree Maromak Jeová hahú kazamentu primeiru. Nia haree oinsá Adão no Eva moris kontente hodi halo tuir Maromak nia matadalan, no Jesus mós haree rasik oinsá mak problema mosu tanba Adão no Eva la halo tuir matadalan neʼe. Tan neʼe, kuandu Jesus hanorin ema seluk, nia temi fali ninia Aman nia mandamentu neʼebé ita bele hetan iha Gênesis 2:24. Jesus mós hatutan tan: “Buat neʼebé Maromak tau hamutuk ema keta haketak.” (Mt 19:6) Nuneʼe, hatudu respeitu neʼebé kleʼan ba Maromak Jeová mak buat ida neʼebé importante liu atubele sai kontente no atu moris kaben nian bele laʼo ho diʼak. Jesus nia inan-aman iha rai, José no Maria, fó ezemplu neʼebé diʼak kona-ba neʼe.
16. Oinsá mak José no Maria tau uluk Maromak iha sira-nia moris família nian?
16 José hatudu laran-diʼak no hatudu respeitu ba Maria. Foufoun, kuandu José hatene katak Maria isin-rua, nia hakarak atu hatudu laran-sadiʼa ba Maria, maski Maromak nia anju seidauk esplika ba nia buat neʼebé akontese ba Maria. (Mt 1:18-20) Nuʼudar kaben-naʼin, sira halo tuir César nia lei no mós halo tuir Moisés nia Ukun-Fuan. (Lc 2:1-5, 21, 22) No maski mane deʼit mak tenke tuir festa boot relijiaun nian neʼebé halaʼo iha Jerusalém, maibé José no Maria, hamutuk ho sira-nia família, tinan-tinan sempre bá Jerusalém atu tuir festa sira. (Deut 16:16; Lc 2:41) Iha dalan sira hanesan neʼe no iha dalan seluk tan, kaben-naʼin neʼe hakaʼas an atu halo Maromak Jeová kontente no hatudu respeitu neʼebé kleʼan ba sira-nia adorasaun ba Maromak. Tanba sira hatudu hahalok hanesan neʼe mak Maromak Jeová hili sira atu haboot ninia Oan kuandu nia moris iha rai.
17, 18. (a) Iha dalan saida deʼit mak feen-laʼen sira bele tau uluk Maromak iha sira-nia moris? (b) Oinsá mak ida-neʼe lori buat diʼak ba sira?
17 Ita mós tau uluk Maromak iha ita-nia moris família nian ka lae? Porezemplu, kuandu ita halo desizaun neʼebé importante, ita buka uluk matadalan husi Bíblia, halo orasaun kona-ba neʼe, no tuirmai buka konsellu husi ema kristaun neʼebé iha esperiénsia barak ka lae? Ka ita koko atu rezolve problema ruma hodi tuir deʼit ita rasik nia hanoin ka ita-nia família no kolega sira-nia hanoin? Ita hakaʼas an atu halo tuir matadalan sira neʼebé atan laran-metin no matenek fó sai iha livru sira kona-ba kaben no kona-ba moris família nian ka lae? Ka ita halo tuir deʼit kostume husi ita-nia rai ka halo tuir konsellu husi ema iha mundu neʼe? Ita halo orasaun no estuda hamutuk beibeik, halo planu kona-ba serbí Maromak, no koʼalia kona-ba buat neʼebé importante liu ba família ka lae?
18 Ray, neʼebé halaʼo ona moris kaben nian neʼebé kontente ba tinan 50, hatete: “Hanesan ‘tali tolu neʼebé bobar hamutuk’, ami mós husik Maromak Jeová atu sempre sai parte iha ami-nia moris família nian, no ida-neʼe ajuda ami atu rezolve problema naran deʼit neʼebé mosu.” (Lee Eclesiastes 4:12. *) Danny no Trina neʼebé kaben ona ba tinan 34 liu mós sente hanesan neʼe, sira hatete: “Nuʼudar ami serbí Maromak hamutuk, ami-nia relasaun kaben nian sai metin liután.” Sin, se ita sempre tau uluk Maromak Jeová iha ita-nia moris kaben nian, nia sei ajuda ita atu hetan susesu no sei haraik bensaun barak ba ita.—Sal 127:1.
Kontinua hatudu respeitu ba prezente neʼebé Maromak fó
19. Tanbasá mak Maromak fó moris kaben nian nuʼudar prezente?
19 Ohin loron, ba ema barak buat neʼebé importante liu mak buka solok ba sira-nia an rasik. Maibé Maromak Jeová nia atan la hanoin hanesan neʼe. Sira hatene katak Maromak fó moris kaben nian nuʼudar prezente atu kumpre ninia hakarak. (Gên 1:26-28) Se Adão no Eva hatudu respeitu ba prezente neʼe, mundu tomak sei sai paraízu ka jardín furak neʼebé nakonu ho Maromak nia atan neʼebé kontente no iha hahalok loos.
20, 21. (a) Tanbasá mak ita presiza haree moris kaben nian nuʼudar buat neʼebé sagradu? (b) Prezente seluk saida mak ita sei estuda iha lisaun tuirmai?
20 Liután neʼe, Maromak nia atan sira haree moris kaben nian nuʼudar oportunidade atu hahiʼi Maromak Jeová. (Lee 1 Korinto 10:31.) Hanesan ita haree ona, hahalok laran-metin, iha laran ida deʼit, no tau Maromak Jeová uluk iha ita-nia moris kaben nian mak buat neʼebé halo Maromak kontente no hametin relasaun kaben nian. Tan neʼe, se ita prepara daudauk atu kaben, ka buka atu hametin ita-nia relasaun kaben nian, ka koko atu salva ita-nia relasaun kaben nian, ita tenke hakaʼas an atu haree moris kaben nian nuʼudar buat neʼebé sagradu no nuʼudar prezente husi Maromak. Hodi hanoin-hetan kona-ba neʼe sei book ita atu hakaʼas an atu halo desizaun tuir matadalan husi Maromak nia Liafuan. Ida-neʼe hatudu katak ita respeitu moris kaben nian no mós katak ita respeitu Ida neʼebé fó prezente neʼe, Maromak Jeová.
21 Maibé klaru katak laʼós moris kaben nian deʼit mak buat neʼebé Maromak Jeová fó ba ita nuʼudar prezente. No mós, laʼós moris kaben nian deʼit mak bele halo ema ida sente haksolok iha ninia moris. Iha lisaun tuirmai, ita sei estuda kona-ba prezente ida seluk tan husi Maromak, prezente neʼe mak moris nuʼudar ema neʼebé la kaben.
[Nota–rodapé]
^ par. 10 Provérbios 5:18b: “Haksolok bá ho ó-nia feen husi tempu joven nian, 19 bibi-rusa inan ida neʼebé hamosu domin no bibi foho nian ida neʼebé furak atu mate. Husik ninia susun halanu ó iha tempu hotu. Haksolok ho nia domin nafatin. 20 Nuneʼe, haʼu-nia oan, tansá ó hakarak haksolok ho feto neʼebé ó la koñese ka hakuak feto seluk nia hirus matan?”
^ par. 18 Eclesiastes 4:12: “No se ema ida bele manán hasoru ida deʼit, naʼin-rua hamutuk bele hamriik hasoru nia. No tali tolu neʼebé bobar hamutuk la bele kotu lalais.”
Oinsá ita hatán?
• Oinsá mak laran-metin bele hametin moris kaben nian?
• Tanbasá mak serbisu hamutuk ho laran ida deʼit bele hametin relasaun kaben nian?
• Iha dalan saida deʼit mak kaben-naʼin sira bele tau uluk Maromak iha sira-nia moris?
• Oinsá mak ita bele hatudu respeitu ba Maromak Jeová, Ida neʼebé hahú moris kaben nian?
[Pergunta estudu nian]
[Dezeñu iha pájina 15]
Serbisu hamutuk ajuda feen-laʼen atu iha laran ida deʼit
