Matan-moris bá, hanesan Jeremias
Matan-moris bá, hanesan Jeremias
“Haʼu [Jeová] matan-moris nafatin hodi haʼu bele kumpre haʼu-nia liafuan.”—JER 1:12.
1, 2. Maromak Jeová “matan-moris nafatin”, oinsá mak ida-neʼe hanesan ho ai-amendueira?
HUSI ai sira hotu neʼebé moris iha foho sira iha rai-Líbanu no Israel, ai neʼebé hamosu uluk funan mak ai-amendueira. Ai ida-neʼe iha funan neʼebé furak tebes ho kór-roza ka mutin, no ai neʼe fó funan iha fulan-Janeiru nia ikus ka iha fulan-Fevereiru. Iha lia-ebraiku, ai-amendueira nia naran iha arti “ida neʼebé hadeer”.
2 Kuandu Maromak Jeová hili Jeremias nuʼudar ninia profeta, Maromak uza ezemplu kona-ba ai-amendueira hodi hanorin buat ida neʼebé importante. Maromak fó sai ba profeta neʼe vizaun kona-ba ai-sanak ida neʼebé mosu husi ai-amendueira. Vizaun neʼe katak sá? Maromak Jeová esplika: “Haʼu matan-moris nafatin hodi haʼu bele kumpre haʼu-nia liafuan.” (Jer 1:11, 12) Hanesan ai-amendueira neʼebé “hadeer” sedu, ita bele dehan katak Maromak Jeová mós “hadeer sedu” hodi haruka ninia profeta atu fó avizu ba ninia povu kona-ba buat aat neʼebé sei mosu tanba sira la halo tuir nia. (Jer 7:25) Maromak “matan-moris nafatin” toʼo ninia liafuan sai loos. Nuneʼe, hodi tuir tempu neʼebé Maromak Jeová hili ona, iha tinan 607 molok Kristu, Maromak nia tesi-lia monu ba nasaun Judá neʼebé husik ona adorasaun neʼebé loos.
3. Saida mak ita bele fiar kona-ba Maromak Jeová?
3 Nuneʼe mós ohin loron, Maromak Jeová hadeer hela ka matan-moris hodi kumpre ninia hakarak. Maromak nia liafuan sempre sai loos. Se Maromak matan-moris nafatin, oinsá mak ida-neʼe kona ita? Ita fiar ka lae, katak iha tinan 2011 neʼe, Maromak Jeová sei “matan-moris” hela atu kumpre buat neʼebé nia promete ona? Se ita duvida kona-ba buat ruma neʼebé Maromak Jeová promete ona, entaun agora mak tempu atu hadeer ka matan-moris hodi hasees an husi buat naran deʼit neʼebé halo ita dukur kona-ba ita-nia adorasaun ba Maromak. (Rom 13:11) Nuʼudar Maromak Jeová nia profeta, Jeremias hakaʼas an atu matan-moris nafatin. Hodi hanoin didiʼak kona-ba oinsá no tansá Jeremias kontinua matan-moris atu halo serbisu neʼebé Maromak fó ba nia, ida-neʼe sei ajuda ita atu hatene oinsá ita bele kontinua atu halaʼo serbisu neʼebé Maromak Jeová fó mai ita.
Mensajen neʼebé urjente
4. Jeremias hasoru susar saida deʼit kuandu nia fó sai ninia mensajen? Tanbasá mak ida-neʼe urjente?
4 Kuandu Jeremias simu knaar husi Maromak Jeová atu fó avizu ba ema, karik nia besik tinan 25 ona. (Jer 1:1, 2) Maski nuneʼe, nia sente katak nia labarik deʼit no la iha matenek atu koʼalia ba ema idade boot sira neʼebé iha pozisaun aas iha nasaun Israel. (Jer 1:6) Nia tenke hatoʼo mensajen tesi-lia nian neʼebé makaʼas, liuliu ba amlulik sira, profeta falsu sira, ukun-naʼin sira, no mós ba sira neʼebé halo tuir deʼit ema seluk no haburas hahalok neʼebé la laran-metin. (Jer 6:13; 8:5, 6) Durante tinan atus haat ona Liurai Salomão nia templu mak fatin atu halaʼo adorasaun neʼebé loos, maski nuneʼe lakleur tan ida-neʼe sei lakon. Jerusalém no Judá sei mamuk tanba ema hotu sei sai dadur iha rai seluk. Tan neʼe, klaru katak mensajen neʼebé Maromak haruka Jeremias atu hatoʼo mak urjente!
5, 6. (a) Ohin loron, oinsá mak Maromak Jeová uza ema kose-mina sira? (b) Ita sei estuda kona-ba saida?
5 Iha tempu modernu, Maromak Jeová ho domin uza ema kose-mina sira nuʼudar grupu atu fó avizu ba ema hotu kona-ba Maromak nia tesi-lia ba mundu neʼe. Ba tinan barak ona, grupu neʼe halaʼo serbisu neʼebé hanesan ho profeta Jeremias hodi fó avizu ba ema atu matan-moris kona-ba tempu neʼebé ita hela agora. (Jer 6:17) Bíblia hatudu ho klaru katak Maromak Jeová nunka tarde no sempre tuir tempu neʼebé nia deside ona. Maromak nia loron boot sei mai iha oras neʼebé loos, iha tempu neʼebé ema la hatene.—Sof 3:8; Mc 13:33; 2 Ped 3:9, 10.
6 Hodi hanoin-hetan katak Maromak Jeová sempre matan-moris no katak nia sei lori mai ninia mundu foun iha tempu neʼebé loos, ida-neʼe fó laran-manas ba ema kose-mina sira atu kontinua halo sira-nia serbisu hanesan Jeremias. Ida-neʼe mós ajuda sira-nia maluk sira atu matan-moris nafatin atu halo serbisu haklaken, tanba serbisu neʼe mak urjente. Oinsá mak ida-neʼe kona ita? Jesus hanorin katak ita ida-idak presiza halo desizaun atu apoia Maromak nia Ukun. Iha lisaun neʼe ita sei estuda kona-ba hahalok tolu neʼebé ajuda Jeremias atu nafatin matan-moris hodi halaʼo ninia serbisu, no oinsá hahalok sira-neʼe mós ajuda ita ohin loron.
Domin ba ema
7. Esplika toʼok kona-ba oinsá domin book Jeremias atu haklaken maski hasoru situasaun susar.
7 Saida mak book Jeremias atu haklaken maski nia hasoru situasaun susar? Neʼe mak domin ba ema. Jeremias hatene katak bibi-atan neʼebé falsu mak hamosu problema barak ba ema. (Jer 23:1, 2) Hodi hatene ida-neʼe book nia atu halaʼo ninia serbisu ho domin no ho laran-diʼak. Jeremias hakarak ninia maluk sira atu rona Maromak nia liafuan hodi sira bele kontinua moris. Nia hanoin tebetebes sira toʼo nia tanis kona-ba terus boot neʼebé atu mosu ba sira. (Lee Jeremias 8:21; * 9:1. *) Livru Lamentações hatudu ho klaru katak Jeremias hanoin no hadomi tebes Maromak Jeová nia naran no ninia povu. (Lam 4:6, 9) Ohin loron, kuandu ita haree ema neʼebé “kole no neon nakraik, hanesan bibi sira neʼebé bibi-atan la iha”, ida-neʼe mós book ita-nia laran atu lori liafuan diʼak kona-ba Maromak nia Ukun hodi fó kmaan ba sira, loos ka lae?—Mt 9:36.
8. Saida mak hatudu katak terus neʼebé Jeremias hetan la halo nia sai hirus?
8 Ema neʼebé Jeremias hakarak atu ajuda fó-terus fali ba nia, maibé nia la kontra no la sai hirus. Nia hatudu pasiénsia no laran-diʼak ba ema, inklui liurai aat naran Zedequias! Maski Zedequias fó mandamentu ba ema atu oho Jeremias, maibé Jeremias ho laran-diʼak kontinua atu husu liurai neʼe atu halo tuir Maromak Jeová nia liafuan. (Jer 38:4, 5, 19, 20) Ita mós iha domin boot ba ema hanesan Jeremias ka lae?
Aten-brani husi Maromak
9. Oinsá mak ita hatene katak Jeremias hetan aten-brani husi Maromak?
9 Foufoun, kuandu Maromak Jeová koʼalia ho Jeremias, Jeremias buka atu fó razaun oioin atu la halo Maromak nia serbisu. Husi ida-neʼe ita bele haree katak aten-brani neʼebé Jeremias hatudu durante tempu neʼebé nia serbí nuʼudar profeta la mai husi ninia an rasik, maibé nia hetan ida-neʼe tanba nia tau fiar tomak ba Maromak. Klaru katak Maromak Jeová mak apoia profeta neʼe “hanesan ida neʼebé kbiit boot”, no nia fó forsa ba Jeremias atu halaʼo ninia knaar. (Jer 20:11) Tanba ema barak hatene Jeremias nuʼudar ema neʼebé aten-brani, iha Jesus nia tempu ema balu hanoin katak Jesus mak Jeremias neʼebé moris hiʼas fali ona!—Mt 16:13, 14.
10. Restu husi ema kose-mina sira simu kbiit atu halo saida?
10 Nuʼudar “Liurai ba nasaun sira”, Maromak Jeová haruka Jeremias atu fó sai ninia mensajen tesi-lia nian ba nasaun sira no governu sira. (Jer 10:6, 7) Maibé, iha dalan saida mak ita mós bele dehan katak restu husi ema kose-mina sira iha kbiit atu fó avizu ba “nasaun sira no governu sira”? (Jer 1:10) Hanesan profeta Jeremias iha tempu uluk, ema kose-mina sira mós simu knaar neʼebé importante husi Ukun-Naʼin Boot Liu Hotu. Tan neʼe, sira iha kbiit atu fó sai Maromak nia tesi-lia hasoru nasaun no governu sira. Hodi simu kbiit husi Maromak Aas Liu Hotu, no hodi uza liafuan neʼebé klaru husi Bíblia, ohin loron ema kose-mina sira fó sai katak Maromak sei fokit no halakon nasaun no governu sira iha tempu neʼebé nia hili ona no iha dalan neʼebé nia hakarak. (Jer 18:7-10; Apok 11:18) Sin, ema kose-mina sira, neʼebé hanesan Jeremias, sei la para atu halaʼo sira-nia knaar atu haklaken Maromak Jeová nia mensajen tesi-lia nian iha mundu tomak.
11. Saida deʼit mak sei ajuda ita atu kontinua haklaken maski ita hasoru situasaun susar?
11 Dala ruma ita hotu bele sente laran-tun kuandu ema fó-terus ba ita, kuandu ita hasoru situasaun susar, ka kuandu ema la simu ita-nia haklaken. (2 Kor 1:8) Maibé, hanesan Jeremias, mai ita la para atu serbí Maromak. Keta lakon esperansa. Mai ita ida-idak kontinua atu harohan ba Maromak atu husu ninia ajuda, no sai “aten-barani” nuʼudar ita sadere ba nia. (1 Tes 2:2) Nuʼudar ema neʼebé halaʼo adorasaun loos, ita tenke kontinua atu matan-moris atu halaʼo serbisu neʼebé nia fó ba ita. Ita presiza nafatin haklaken ho laran-metin kona-ba oinsá Maromak sei halakon relijiaun kristaun falsu, hanesan nia halo ba Jerusalém neʼebé husik adorasaun loos. Ema kose-mina sira la haklaken deʼit kona-ba “Jeová nia tinan rahun-kmanek nian”, maibé sira haklaken mós kona-ba “loron hirus nian husi ita-nia Maromak”.—Isa 61:1, 2; 2 Kor 6:2.
Ksolok iha laran
12. Tanbasá mak Jeremias la lakon ninia ksolok? Saida mak ajuda nia atu halo nuneʼe?
12 Jeremias sente ksolok atu halo Maromak Jeová nia serbisu. Nia hatete ba Maromak: “Haʼu hetan Ita-nia liafuan, no haʼu komesa han sira; no Ita-nia liafuan sai buat neʼebé halo haʼu-nia laran ksolok no kontente; tanba haʼu lori ita-nia naran, oh, Jeová.” (Jer 15:16) Jeremias sente katak atu reprezenta Maromak loos no atu haklaken ninia liafuan mak knaar neʼebé espesiál duni. Maski nuneʼe, Bíblia hatudu katak kuandu Jeremias hanoin demais kona-ba ema neʼebé goza nia, nia lakon ninia ksolok. Maibé, kuandu Jeremias hanoin fali kona-ba ninia mensajen neʼebé kapás no importante, nia hetan fali ninia ksolok.—Jer 20:8, 9.
13. Tanbasá mak importante atu estuda buat neʼebé kleʼan husi Bíblia?
13 Bíblia kompara hanorin neʼebé kleʼan husi Maromak nia Liafuan hanesan “etu tasak”. Tan neʼe, atubele haksolok nafatin iha ita-nia serbisu haklaken ita presiza han ka aprende buat neʼebé kleʼan husi Maromak nia Liafuan. (Ebr 5:14) Hodi estuda buat neʼebé kleʼan hametin duni ita-nia fiar. (Kol 2:6, 7) No ida-neʼe mós sei ajuda ita atu hatene kona-ba oinsá mak ita-nia hahalok halo Maromak Jeová kontente ka triste. Se susar ba ita atu hetan tempu atu lee no atu estuda Bíblia, ita presiza atu haree fali ita-nia atividade sira. Hodi estuda no hanoin kleʼan loron-loron maski ba minutu balu deʼit, ida-neʼe sei ajuda ita atu hakbesik liu ba Maromak Jeová no sei ajuda ita atu sente ‘laran-ksolok no kontente’ hanesan Jeremias.
14, 15. (a) Tanba Jeremias laran-metin atu halo ninia knaar, ida-neʼe lori rezultadu diʼak saida? (b) Ohin loron, Maromak nia atan sira hatene saida kona-ba sira-nia serbisu haklaken?
14 Jeremias laʼós deʼit badinas atu fó sai Maromak Jeová nia avizu no nia mensajen tesi-lia nian, maibé Jeremias mós hafolin ninia knaar “atu harii no atu kuda”, no knaar neʼe lori rezultadu diʼak. (Jer 1:10) Porezemplu, ninia knaar neʼe ajuda ema judeu balu no mós ema balu neʼebé laʼós ema Israel hetan salvasaun kuandu Jerusalém naksobu iha tinan 607 molok Kristu. Hanoin toʼok kona-ba Ebed-melec, Baruc, no ema Recab sira. (Jer 35:19; 39:15-18; 43:5-7) Ema sira-neʼe hatudu laran-metin ba Maromak no habelun malu ho Jeremias. Hanesan neʼe, ohin loron ema neʼebé iha esperansa atu moris iha rai habelun malu ho ema kose-mina sira. Ema kose-mina sira haksolok atu hametin “ema-lubun boot” nia fiar. (Apok 7:9) Nuneʼe mós, “ema-lubun boot” neʼe hatudu laran-metin ba sira-nia belun kose-mina sira, no sira haksolok atu ajuda ema seluk neʼebé laran-moos atu hatene lia-loos.
15 Nuʼudar Maromak nia atan, ita hatene katak serbisu atu haklaken lia-foun diʼak laʼós deʼit serbisu atu ajuda ema atu hetan moris, maibé serbisu neʼe mós parte husi ita-nia adorasaun ba Maromak. Maski ema rona ka la rona ita, maibé hodi halaʼo Maromak Jeová nia serbisu sagradu neʼe sei lori ksolok boot mai ita.—Sal 71:23; lee Roma 1:9.
Matan-moris atu halo ita-nia knaar!
16, 17. Oinsá mak Apokalipse 17:10 no Habacuque 2:3 hatudu katak ita moris iha loron ikus sira?
16 Kuandu ita hanoin didiʼak kona-ba buat neʼebé hakerek iha Apokalipse 17:10, ita haree katak Maromak nia loron besik duni ona. Eskritura neʼe fó-hatene nanis kona-ba liurai númeru hitu nia ukun. Liurai neʼe reprezenta nasaun Inglaterra ho Estadus Unidus Amérika, no liurai neʼe ukun daudauk ona. Bíblia hatete: “Wainhira nia [liurai númeru hitu] toʼo mai, nia sei hela ba tempu badak deʼit.” Klaru katak “tempu badak” neʼe besik ona atu ramata. Profeta Habacuc koʼalia kona-ba mundu nia rohan, hodi dehan: “Vizaun neʼe ba tempu neʼebé deside tiha ona . . . Hein nafatin nia bá; tanba nia sei sai loos duni. Nia sei la tarde.”—Hab 2:3.
17 Husu ba ita-nia an: ‘Haʼu halaʼo haʼu-nia moris iha dalan neʼebé hatudu katak haʼu hela iha loron ikus sira ka lae? Dalan neʼebé haʼu moris hatudu katak haʼu fiar mundu nia rohan besik ona ka lae? Haʼu-nia desizaun no planu sira hatudu katak haʼu hanoin mundu nia rohan sei kleur, ka haʼu ladún fiar katak mundu nia rohan sei mai ka lae?’
18, 19. Tanbasá mak agora laʼós tempu atu hamenus ita-nia atividade kristaun nian?
18 Ema kose-mina sira halaʼo serbisu hanesan Jeremias, no sira-nia serbisu sei kontinua hela. (Lee Jeremias 1:17. *) Ita haksolok tebes katak restu husi ema kose-mina sira hamriik metin hanesan “ai-riin besi nian” no “sidade neʼebé forte”! Sira tau ‘lia-loos nuʼudar sira-nia futu-kabun’, neʼe katak sira husik Maromak nia Liafuan hametin sira toʼo tempu neʼebé sira kumpre serbisu neʼebé Maromak fó ba sira. (Ef 6:14) Ema-lubun boot mós hatudu laran-metin hodi hakaʼas an atu halaʼo serbisu atu apoia ema kose-mina sira atu kumpre sira-nia knaar husi Maromak.
19 Agora laʼós tempu atu hamenus ita-nia atividade kristaun nian, maibé tempu atu hanoin didiʼak kona-ba buat neʼebé hatete iha Jeremias 12:5. (Lee. *) Ita hotu hasoru susar oioin. Susar sira-neʼe koko ita-nia fiar, no ida-neʼe hanesan ita halai-taru ho “ema neʼebé laʼo ain”. Tuir loloos, nuʼudar ‘terus boot’ sai besik daudauk, susar sira neʼebé ita hasoru sei aumenta. (Mt 24:21) Bainhira ita hasoru susar sira-neʼe, neʼebé makaʼas liu, ida-neʼe hanesan ita “halai-taru ho kuda sira”. Klaru katak ema presiza forsa barak liu atu halai-taru ho kuda sira. Tan neʼe, hodi tahan hasoru susar neʼebé mosu agora, ida-neʼe sei prepara ita atu tahan hasoru susar sira neʼebé sei mosu iha futuru.
20. Ita sei hakaʼas an atu halo saida?
20 Ita hotu bele banati-tuir Jeremias nia ezemplu hodi kumpre ita-nia knaar atu haklaken! Hahalok sira neʼebé ajuda Jeremias atubele halaʼo ninia knaar ho laran-metin ba tinan 67 mak domin, aten-brani, no ksolok. Ai-amendueira nia funan neʼebé furak fó-hanoin ita katak Maromak Jeová sei “matan-moris nafatin” atubele kumpre ninia liafuan. Nuneʼe, mai ita mós banati-tuir nia. Hanesan ho Jeremias, ita mós bele “matan-moris nafatin”.
[Nota–rodapé]
^ par. 7 Jeremias 8:21: “Haʼu-nia laran rahun tanba haʼu-nia povu nia oan-feto sai rahun. Haʼu sai triste. Haʼu sai bilán no neʼe kaer metin haʼu.”
^ par. 7 Jeremias 9:1: “Se karik haʼu-nia ulun mak bee no haʼu-nia matan mak hun ba matan-been, se nuneʼe, haʼu bele tanis loron no kalan ba haʼu-nia povu nia oan-feto nia ema mate.”
^ par. 18 Jeremias 1:17: “No ó, ó tenke sai prontu bá, no ó tenke hamriik no fó-hatene ba sira buat hotu neʼebé haʼu hatete ba ó. Keta sai taʼuk tanba sira, hodi haʼu la halo ó sente taʼuk iha sira-nia oin.”
^ par. 19 Jeremias 12:5: “Tanba ó halai hamutuk ho ema neʼebé laʼo ain, no sira halo ó sente kole, se nuneʼe oinsá mak ó bele halai-taru ho kuda sira? No se ó tau fiar ba rai dame nian, nuneʼe, ó sei halo saida kuandu ó iha ai-laran fuik besik mota Jordaun nia ninin?”
Ita hanoin-hetan?
• Oinsá mak domin ajuda Jeremias atu “matan-moris nafatin” kona-ba ninia knaar?
• Tanbasá mak ita presiza aten-brani husi Maromak?
• Saida mak ajuda Jeremias atu haksolok nafatin?
• Tanbasá mak ita hakarak atu “matan-moris nafatin”?
[Pergunta estudu nian]
[Dezeñu iha pájina 31]
Maski ema haterus ita, ita sei haklaken nafatin ka lae?
