Maromak hatudu ninia domin mai ita
Maromak hatudu ninia domin mai ita
“Grasa sei ukun husi justisa ba moris rohan-laek.”—ROM 5:21.
1, 2. Prezente rua saida mak ita simu ona, maibé ida-neʼebé mak folin boot liu?
PROFESÓR ida, naran David J. Williams, husi Universidade Melbourne iha Austrália, hatete katak nasaun Roma nia ukun-fuan sira hanesan prezente neʼebé iha folin boot ba ema toʼo ohin loron. Maski nuneʼe, Bíblia hanorin katak Maromak fó mai ita prezente ida neʼebé folin boot liu. Liuhusi prezente neʼe mak ita bele iha relasaun diʼak ho Maromak no iha esperansa atu hetan salvasaun no moris rohan-laek.
2 Atu Maromak bele fó prezente neʼe, nia presiza halo ida-neʼe tuir ninia justisa. Iha livru Roma kapítulu 5, apóstolu Paulo koʼalia kona-ba justisa neʼe, no nia hatudu katak hamutuk ho justisa iha buat seluk neʼebé importante liu. Tan neʼe, ho haksolok nia hatete: “Tan ita sai ema loos ona tan fiar, [nuneʼe] ita dame malu ona ho Maromak husi ita-nia fiar iha ita Naʼi.” Sira neʼebé simu Maromak nia prezente neʼe hakarak hatudu domin fali ba Maromak. Paulo mós halo ida-neʼe. Nia dehan: “Maromak nia domin fakar tiha ba ita-nia fuan husi espíritu santu.”—Rom 5:1, 5.
3. Ita sei koʼalia kona-ba pergunta saida deʼit?
3 Maibé, tanbasá mak ita presiza prezente furak neʼe? Oinsá mak Maromak bele fó prezente neʼe iha dalan neʼebé tuir justisa ba ema hotu? No saida mak ema tenke halo atubele simu ida-neʼe? Mai ita koʼalia kona-ba oinsá resposta ba pergunta sira-neʼe hatudu Maromak nia domin mai ita.
Tansá ita presiza Maromak nia domin
4, 5. (a) Maromak Jeová hatudu ninia domin iha dalan boot saida? (b) Atu komprende Roma 5:12, ita presiza hatene kona-ba saida deʼit?
4 Maromak Jeová hatudu ninia domin boot hodi haruka ninia Oan-Mane mesak atu ajuda ema. Paulo koʼalia kona-ba ida-neʼe, hodi dehan: “Maromak hatudu nia domin ba ita iha neʼe: katak, wainhira ita ema maksalak, Kristu mate tan ita.” (Rom 5:8) Hanoin took kona-ba buat neʼebé apóstolu Paulo hatete: “Ita ema maksalak.” Ema hotu presiza hatene oinsá mak ita sai ema maksalak, ka sala-naʼin.
5 Paulo koʼalia kona-ba ida-neʼe, hodi dehan: “Nuʼudar husi ema ida deʼit mak sala tama iha mundu, no tan sala, mate; nuneʼe mate toʼo ba ema hotu, basá ema hotu sala.” (Rom 5:12) Ita bele komprende kona-ba ida-neʼe tanba Maromak fó sai iha Bíblia oinsá mak ema nia moris hahú. Jeová kria ema naʼin-rua, Adão ho Eva. Tanba ita-nia Kriadór mak perfeitu, nuneʼe sira mós perfeitu ka la iha sala. Maromak fó ba sira ukun-fuan ida deʼit no fó-hatene ba sira katak se sira la halo tuir lei neʼe, ida-neʼe sei lori kastigu-mate. (Gên 2:17) Maibé, sira hili atu la halo tuir Maromak nia ukun-fuan, no tan neʼe sira hatudu katak sira lakohi simu Maromak nuʼudar Ida neʼebé Fó Ukun-Fuan no Ukun-Naʼin neʼebé Boot Liu Hotu.—Deut 32:4, 5.
6. (a) Tanbasá mak Adão nia bei-oan sira mate antes no depois tempu neʼebé Maromak fó ninia Ukun-Fuan ba ema Israel? (b) Moras emofilia bele kompara ho saida?
6 Depois Adão sai sala-naʼin mak nia hetan oan, no nia hadaʼet sala neʼe ba ninia oan no bei-oan sira, no rezultadu husi ida-neʼe mak sira hotu mate. Klaru katak Adão nia oan no bei-oan la kontra Maromak nia ukun-fuan neʼebé Adão la halo tuir, no sira la kontra ukun-fuan ruma tanba Maromak seidauk fó ukun-fuan ida. (Gên 2:17) Maski nuneʼe, Adão nia bei-oan sira hetan sala. Nuneʼe, sala no mate ukun sira toʼo tempu neʼebé Maromak fó ukun-fuan ba ema Israel, no ukun-fuan neʼe hatudu ho klaru katak sira nafatin sala-naʼin. (Lee Roma 5:13, 14.) Ita bele kompara rezultadu aat husi sala ho moras ida neʼebé ema hetan husi sira-nia inan-aman, hanesan anemia (katak raan menus), ka emofilia (katak raan suli la para maski kanek kiʼik). Porezemplu, liurai-oan ida husi rai-Rúsia, naran Alexis, hetan moras emofilia husi ninia aman, Liurai Nicholas II no ninia inan, Alexandra. Maski oan balu la sai moras, maibé sira iha moras neʼe iha sira-nia raan no bele hadaʼet moras neʼe ba sira-nia oan sira. Maibé, sala husi Adão la hanesan neʼe. Rezultadu husi sala kona ema hotu no sempre lori mate. Oinsá mak bele hadiʼa problema neʼe?
Buat neʼebé Maromak fó liuhusi Jesus
7, 8. Oinsá mak dalan neʼebé Adão no Jesus halaʼo sira-nia moris lori rezultadu neʼebé la hanesan?
7 Maromak Jeová ho domin loke dalan atu ema hotu bele sai livre husi sala neʼebé sira hetan husi Adão. Paulo esplika katak ida-neʼe bele akontese liuhusi ema ida neʼebé perfeitu ka la iha sala, nia hanesan Adão segundu. (1 Kor 15:45) Maibé, dalan neʼebé ema naʼin-rua neʼe halaʼo sira-nia moris lori rezultadu neʼebé la hanesan duni. Oinsá?—Lee Roma 5:15, 16.
8 Paulo hatete: “Prezente laʼós hanesan sala.” Adão mak halo sala neʼe, nuneʼe nia merese duni atu hetan kastigu-mate. Maibé, laʼós nia deʼit mak mate. Bíblia hatete: “Tan ema ida deʼit nia sala . . . mak ema barak mate.” Tanba Adão hetan kastigu-mate, ida-neʼe mós monu ba Adão nia oan no bei-oan sira neʼebé sala-naʼin, inklui mós ita. Maski nuneʼe, ita bele sente kmaan hodi hatene katak Jesus neʼebé la iha sala bele lori rezultadu oin-seluk. Saida mak rezultadu neʼe? Apóstolu Paulo hatán hodi dehan katak “perdaun no moris mosu ba ema hotu” neʼebé “sai ema loos”.—Rom 5:18, 19.
9. Tuir Roma 5:16, 18, saida mak Maromak halo?
9 Liafuan gregu neʼebé tradús nuʼudar “ema barak sei sai loos” no hetan “fali perdua”, iha arti saida loos? Ema ida neʼebé tradús Bíblia hatete katak liafuan sira-neʼe hanesan liafuan neʼebé uza iha tribunál. Nia mós hatete katak liafuan sira-neʼe hatudu katak ema sira-nia situasaun troka iha Maromak nia oin, laʼós katak ema troka sira-nia hahalok. Ida-neʼe bele kompara Maromak ho juis ida neʼebé tesi lia ba ema ida neʼebé hetan duun kona-ba sala ruma. Maibé, Maromak perdua nia no halo nia sai livre husi sala.
10. Saida mak Jesus halo atu ema hotu sai loos no bele hetan perdua?
10 Oinsá mak Maromak neʼebé “Juis ba raiklaran tomak” bele perdua ema neʼebé la halo buat loos? (Gên 18:25) Primeiru, Maromak ho domin haruka ninia Oan-Mane mesak mai iha rai. Jesus halo tuir ninia Aman nia hakarak iha dalan neʼebé loos maski hasoru tentasaun, ema goza nia, no tarata aat nia. Jesus laran-metin nafatin toʼo nia mate iha ai-riin terus nian. (Ebr 2:10) Hodi saran ninia moris perfeitu nuʼudar sakrifísiu, Jesus bele soi ka salva Adão nia bei-oan sira husi sala no mate.—Mt 20:28; Rom 5:6-8.
11. Jesus nia moris iha folin hanesan saida?
11 Hodi koʼalia kona-ba Jesus, apóstolu Paulo mós hatete: “[Nia] fó ninia moris nuʼudar folin neʼebé hanesan ho buat neʼebé lakon.” (1 Tim 2:6, MF) Ninia liafuan neʼe kona-ba “folin neʼebé hanesan ho buat neʼebé lakon” katak sá? Adão lakon ninia moris nuʼudar ema neʼebé la iha sala, no tan neʼe nia lori sala no mate ba ninia bei-oan rihun ba rihun. No ita hatene katak kuandu Jesus iha rai nuʼudar ema neʼebé la iha sala, nia iha kbiit atu hetan oan no bei-oan rihun ba rihun neʼebé la iha sala. * Tan neʼe, ema barak hanoin katak se Jesus iha oan karik, ninia moris hamutuk ho ninia bei-oan hotu, neʼebé seidauk moris no la iha sala, mak sakrifísiu neʼebé iha folin hanesan ho Adão nia moris hamutuk ho ninia bei-oan sira neʼebé iha sala. Maibé, Bíblia la hatete katak Jesus nia bei-oan sira sai parte husi ninia sakrifísiu atu salva ema husi sala. Iha Roma 5:15-19 hatete katak liuhusi “ema ida” deʼit mak ema hotu bele sai livre husi sala. Sin, Jesus nia moris neʼebé perfeitu iha folin neʼebé hanesan ho Adão nia moris. Nuneʼe, Jesus Kristu mesak deʼit mak bele taka sala. Tanba Jesus nia “hahalok diʼak ida”, katak nia halo tuir Maromak no laran-metin toʼo mate, mak ema hotu bele simu prezente atu sai ema loos no hetan moris. (2 Kor 5:14, 15; 1 Ped 3:18) Oinsá mak rezultadu neʼe bele mosu?
Livre husi sala liuhusi Jesus nia moris
12, 13. Tanbasá mak sira neʼebé sai ema loos presiza Maromak nia laran-sadiʼa no domin?
12 Maromak Jeová simu ninia Oan nia moris nuʼudar sakrifísiu. (Ebr 9:24; 10:10, 12) Maibé, Jesus nia dixípulu sira iha rai, inklui mós ninia apóstolu sira neʼebé laran-metin, sira nafatin sala-naʼin. Maski sira hakaʼas an atu la halo sala, maibé dala ruma sira halo sala. Tanbasá? Tanba sira hetan sala husi Adão. (Rom 7:18-20) Maibé Maromak bele halo buat ruma atu hadiʼa ida-neʼe, no nia halo duni. Maromak simu Jesus nia “moris nuʼudar folin neʼebé hanesan ho buat neʼebé lakon” no nia mós prontu atu uza ida-neʼe atu ajuda ninia atan sira iha rai.
13 Maromak uza folin husi Jesus nia moris atu ajuda apóstolu sira no ema seluk laʼós tanba sira halo hahalok diʼak ruma. Maibé, Maromak halo ida-neʼe tanba ninia laran-sadiʼa no domin boot. Maromak hili atu halo sira sai livre husi sala neʼebé sira hetan husi Adão. Nuneʼe, Paulo hatete: “Basá husi grasa mak ita hetan maksoin, husi fiar, laʼós husi buat ruma neʼebé mai husi imi, maibé husi prezente ida husi Maromak.”—Ef 2:8.
14, 15. Bensaun saida mak sira neʼebé Maromak halo sai ema loos bele hetan? Maibé, sira tenke kontinua atu halo saida?
14 Hanoin toʼok kona-ba prezente kapás neʼebé Maromak Forsa Boot Liu Hotu fó hodi perdua sala neʼebé ema hetan husi Adão no mós sala ruma neʼebé ema halo! Maski ita la bele sura sala hira mak ema halo antes sira sai ema kristaun, maibé tanba Jesus nia moris nuʼudar sakrifísiu Maromak bele perdua sala sira-neʼe. Paulo hatete: “Prezente neʼe, liu tiha sala barak, lori fali perdua.” (Rom 5:16) Apóstolu sira no ema seluk neʼebé simu prezente neʼe (katak Maromak halo ema sai loos) tenke kontinua nafatin atu adora Maromak neʼebé loos ho fiar. Iha futuru, sira sei hetan bensaun saida? Bíblia hatete: “Sira neʼebé simu grasa waʼin ba waʼin no prezente atu sai ema loos sei ukun iha moris tan ema ida, Jesus Kristu.” Loos duni, prezente atu sai ema loos la lori mate, maibé lori moris.—Rom 5:17; lee Lucas 22:28-30.
15 Ema sira neʼebé simu prezente neʼe, katak sai ema loos, sira sai Maromak nia oan. Nuʼudar liman-rohan naʼin hamutuk ho Kristu, sira iha esperansa atu moris hiʼas ba lalehan ho isin espíritu nian no atu ukun hamutuk ho Jesus Kristu.—Lee Roma 8:15-17, 23.
Maromak hatudu nia domin ba ema
16. Atu ema bele iha esperansa atu moris iha rai, sira presiza prezente saida?
16 Laʼós ema hotu neʼebé tau fiar ba Maromak no serbí nia ho laran-metin mak “sei ukun” iha lalehan hamutuk ho Kristu. Ema barak iha esperansa hanesan Maromak nia atan sira antes apóstolu sira-nia tempu. Esperansa husi Bíblia neʼe mak atu moris ba nafatin iha mundu foun. Maibé, ohin loron sira bele simu prezente ida husi Maromak hodi sai ema loos atubele hetan moris neʼe iha futuru ka lae? Tuir buat neʼebé apóstolu Paulo hatete iha livru Roma, resposta mak sin, bele duni!
17, 18. (a) Tanba Abraão nia fiar, nia hetan saida husi Maromak? (b) Oinsá mak Jeová bele haree Abraão nuʼudar ema loos?
17 Porezemplu, Paulo koʼalia kona-ba Abraão neʼebé fiar Maromak. Abraão moris antes Maromak Jeová fó ninia ukun-fuan ba ema Israel no kleur antes Kristu loke dalan ba ema atu moris iha lalehan. (Ebr 10:19, 20) Bíblia hatete: “Laʼós husi ukun-fuan mak Maromak hakotu lia ba Abraão no nia bei-oan sira katak nia sei simu mundu, maibé husi justisa neʼebé mai husi fiar.” (Rom 4:13; Tgo 2:23, 24) Nuneʼe, hodi Abraão nia fiar mak Maromak sura ida-neʼe nuʼudar ninia justisa, ka halo nia sai ema loos.—Lee Roma 4:20-22.
18 Maromak halo Abraão sai ema loos, laʼós tanba Abraão nunka halo sala durante tempu hotu neʼebé nia serbí Maromak Jeová. (Rom 3:10, 23) Maibé, liuhusi Jeová nia matenek neʼebé la iha rohan, nia bele haree Abraão nia fiar no ninia hahalok diʼak sira neʼebé mosu husi ninia fiar. Abraão hatudu ninia fiar liuliu ba buat neʼebé Maromak promete kona-ba “bei-oan” neʼebé sei mai husi nia. Bei-oan neʼe mak Mesias, ka Kristu. (Gên 15:6; 22:15-18) Nuneʼe, tanba Kristu Jesus nia sakrifísiu mak Maromak nuʼudar Juis bele perdua sala sira neʼebé ema halo tiha ona. Tan neʼe mak Abraão, no mós fiar-naʼin seluk neʼebé moris antes apóstolu sira-nia tempu, iha esperansa atu moris hiʼas fali.—Lee Roma 3:24, 25; Sal 32:1, 2.
Ita bele sai ema loos agora
19. Tanbasá mak Maromak nia haree kona-ba Abraão fó laran-manas ba ema barak ohin loron?
19 Tanba Maromak domin nian haree Abraão nuʼudar ema loos, ida-neʼe fó laran-manas ba ema kristaun loos ohin loron. Maromak Jeová la halo Abraão sai ema loos hanesan nia halo ba ema neʼebé nia kose mina ho espíritu atu sai “liman-rohan naʼin hamutuk ho Kristu”. Grupu kiʼik neʼe Maromak “bolu atu sai santu” no atu sai “Maromak nia oan sira”. (Rom 1:7; 8:14, 17, 33) Maibé, Abraão sai “Maromak [Jeová] nia belun”, no ida-neʼe akontese antes Jesus fó ninia moris nuʼudar sakrifísiu. (Tgo 2:23; Isa 41:8) Se nuneʼe, oinsá ho ema kristaun loos neʼebé iha esperansa atu moris iha mundu foun?
20. Saida deʼit mak Maromak hakarak husi sira neʼebé nia haree nuʼudar ema loos hanesan Abraão?
20 Ema sira-neʼe la simu “prezente atu sai ema loos” hodi bele hetan moris iha lalehan “husi maksoin iha Kristu Jesus”. (Rom 3:24; 5:15, 17) Maibé, sira tau fiar neʼebé metin ba Maromak no ba buat hotu neʼebé nia fó, no hatudu sira-nia fiar liuhusi hahalok diʼak sira. Hahalok diʼak ida mak “haklaken Maromak nia reinu no hanorin kona-ba Naʼi Jesus Kristu”. (Apos 28:31) Nuneʼe mak Jeová bele haree sira nuʼudar ema loos hanesan nia haree Abraão. Prezente neʼebé sira simu mak sai belun ho Maromak, no prezente neʼe la hanesan ho prezente neʼebé ema kose-mina simu. Maski nuneʼe, sira sente agradese tebes atu simu prezente neʼe.
21. Bensaun saida deʼit mak ita bele hetan tanba Jeová nia domin no justisa?
21 Se ita hakarak atu moris haksolok ba nafatin iha mundu foun, ita presiza rekoñese katak ita bele hetan oportunidade neʼe laʼós tanba hahalok naran deʼit neʼebé ukun-naʼin ruma iha mundu neʼe halo. Tuir loloos, ida-neʼe hatudu Maromak nia hakarak no matenek nuʼudar Ukun-Naʼin Boot Liu Hotu. Jeová neineik-neineik halo buat barak atu kumpre ninia hakarak. Buat neʼebé nia halo tuir ninia justisa. Liután neʼe, buat neʼebé Maromak halo hatudu ninia domin neʼebé boot. Nuneʼe, Paulo hatete: “Maromak hatudu nia domin ba ita iha neʼe: katak, wainhira ita ema maksalak, Kristu mate tan ita.”—Rom 5:8.
[Nota–rodapé]
^ par. 11 Porezemplu, bele haree hanoin ida-neʼe kona-ba bei-oan sira iha Pemahaman Alkitab, Jilid 2, pájina 1001, parágrafu 3 no 4.
Ita hanoin-hetan?
• Adão nia bei-oan sira hetan saida husi nia? Ho rezultadu saida?
• Oinsá mak Maromak salva ita husi sala? Oinsá mak ida-neʼe selu buat neʼebé lakon?
• Prezente atu sai ema loos lori esperansa saida ba Ita?
[Pergunta estudu nian]
[Dezeñu iha pájina 13]
Adão neʼebé perfeitu halo sala. Jesus neʼebé perfeitu fó ninia moris “nuʼudar folin neʼebé hanesan ho buat neʼebé lakon”
[Dezeñu iha pájina 15]
Ita bele sai ema loos liuhusi Jesus, neʼe mak “lia-foun diʼak” duni!
