Livru Haklaken iha lia-inglés neʼebé fasil

AMI kontente tebes atu fó sai katak fulan-fulan ami sei hasai Livru Haklaken edisaun atu estuda iha lia-inglés neʼebé fasil atu komprende. Ami sei koko ida-neʼe ba tinan ida. Edisaun neʼe iha lisaun neʼebé ita sei uza atu estuda semana-semana, no mós informasaun seluk tan. Ami fiar katak ida-neʼe sei ajuda irmaun-irmán barak atu bele hametin liután sira-nia fiar. Tanbasá presiza edisaun ida-neʼe?

Ita-nia maluk kristaun barak koʼalia lia-inglés iha rai hanesan Fijí, Gana, Kénia, Libéria, Nijéria, Papua-Giné Foun, no mós Salomaun. Maski ita-nia maluk barak iha rai sira-neʼe mós koʼalia língua seluk, maibé sira presiza uza lia-inglés atu koʼalia iha reuniaun no kuandu bá haklaken. Lia-inglés neʼebé sira uza mak fasil kompara ho lia-inglés iha ita-nia livru sira. No mós, iha irmaun-irmán barak neʼebé muda ba rai seluk no sira presiza uza lia-inglés atu koʼalia ba maluk sira, maski sira ladún hatene didiʼak lia-inglés. No mós, reuniaun iha sira-nia língua rasik la iha.

Lisaun sira neʼebé ita atu estuda semana-semana iha ita-nia Livru Haklaken mak importante duni atu ita bele hetan ai-han espirituál iha tempu loloos. Tan neʼe, atu ajuda sira hotu neʼebé asiste reuniaun, ami hasai edisaun ida ho lia-inglés neʼebé fasil atu komprende. Edisaun foun neʼe nia oin sei iha dezeñu neʼebé la hanesan ho edisaun baibain. Maibé, subtítulu, parágrafu, pergunta atu hanoin fali, no dezeñu sira iha lisaun sira sei hanesan ho edisaun baibain. Nuneʼe, ema hotu bele uza edisaun rua-rua neʼe atu hola parte iha reuniaun Estudu Livru Haklaken nian.

Ami hein katak livru foun neʼe bele ajuda sira neʼebé husu Maromak Jeová, hodi dehan: “Halo haʼu komprende, hodi nuneʼe haʼu bele aprende Ita-nia ukun-fuan sira.” (Sal 119:73) Ami fiar katak sira neʼebé hatene lia-inglés uitoan, no mós labarik kiʼik sira neʼebé lia-inglés mak sira-nia língua rasik, bele prepara didiʼak ba Estudu Livru Haklaken nian semana-semana. Ita hatoʼo obrigadu barak ba Jeová tanba nia ‘hadomi ita-nia maluk’ iha mundu tomak hodi uza atan “laran-metin no matenek” atu fó ai-han espirituál barak mai ita.—1 Ped 2:17; Mt 24:45.

Grupu Administradór husi Testemuña ba Jeová