Pergunta husi lee-naʼin

Haʼu tenke halo saida se haʼu ladún komprende buat ruma neʼebé haʼu lee iha Bíblia ka se haʼu presiza konsellu kona-ba problema ruma?

Provérbios 2:1-5 fó laran-manas ba ita atu “kontinua buka” matenek hanesan ita buka “rikusoin neʼebé subar hela”. Neʼe katak ita presiza hakaʼas an atu buka informasaun neʼebé ajuda ita atu komprende buat neʼebé ita lee iha Bíblia no atu rezolve problema sira neʼebé ita hasoru. Maibé, oinsá mak ita bele halo nuneʼe?

Iha livru Memperoleh Manfaat dari Pendidikan Sekolah Pelayanan Teokratis, pájina 33 toʼo 38, iha kapítulu ho tema “Cara Melakukan Riset” neʼebé esplika oinsá mak ita bele buka informasaun ruma hodi uza buat neʼebé ‘atan laran-metin no matenek’ prepara mai ita. (Mt 24:45) Porezemplu, iha pájina 36 esplika oinsá atu uza livru Indeks Publikasi Menara Pengawal. Livru neʼe iha lista ho liafuan no eskritura neʼebé lori ita ba informasaun neʼebé ita buka. Liuhusi lista neʼe, ita bele hatene iha livru saida no iha pájina saida mak ita bele hetan informasaun neʼebé ita buka. Atu halo ida-neʼe, ita presiza pasiénsia. Hanoin-hetan, ita buka “rikusoin neʼebé subar hela”, tan neʼe ita presiza tempu no hakaʼas-an.

Klaru katak ita-nia livru sira la esplika kona-ba buat hotu no eskritura hotu. Porezemplu, maski ita-nia livru sira fó informasaun balu kona-ba eskritura ruma, maibé dala ruma informasaun neʼe la hatán ita-nia pergunta ka la ajuda atu komprende kona-ba buat neʼebé ita hakarak hatene. Liután neʼe, tanba Bíblia la fó-hatene informasaun hotu kona-ba istória sira, karik kuandu ita lee istória balu, susar atu komprende. Tan neʼe, ita presiza kuidadu atu la siʼik ka iha hanoin oioin kona-ba buat neʼebé ita-nia livru sira seidauk esplika. Hodi nuneʼe, ita la haksesuk ho ema seluk kona-ba “liafuan barak neʼebé folin la iha”. (1 Tim 1:4; 2 Tim 2:23; Tito 3:9) Sukursál ka sede-jerál la bele hatán ba pergunta hotu neʼebé sira simu ka fó informasaun kona-ba buat hotu. Maibé, ita sente kontente katak Bíblia fó informasaun neʼebé toʼo atu hametin ita-nia fiar ba Maromak no fó matadalan ba ita-nia moris.—Haree livru Mendekatlah kepada Yehuwa, pájina 185-186.

Maibé, ita sei halo saida se ita la hetan informasaun kona-ba buat neʼebé ita hakarak hatene? Ita bele koʼalia ba maluk kristaun neʼebé iha esperiénsia ona, inklui mós katuas sira iha ita-nia kongregasaun. Sira hatene buat barak kona-ba Bíblia no iha mós esperiénsia barak iha lia-loos. Diʼak atu husu sira-nia ajuda, liuliu kuandu ita presiza konsellu atu rezolve problema ruma ka atu foti desizaun ruma tanba sira hatene didiʼak ita no ita-nia situasaun. Ita mós labele haluha atu halo orasaun ba Jeová hodi fó sai ita-nia problema no husu ninia espíritu santu hodi fó matadalan mai ita atu iha hanoin neʼebé loos, “tanba Jeová rasik mak fó matenek”.—Prov 2:6; Lc 11:13.