Dala ruma, matenek-naʼin sira kona-ba arkeolojia hetan sasán antigu sira neʼebé hatudu katak ema neʼebé temi iha Bíblia iha duni iha tempu uluk. Porezemplu, iha tinan 2011, matenek-naʼin sira iha rai-Israel fó sai informasaun kona-ba sasán antigu ida husi tinan 2.000 liubá. Neʼe mak kaixa neʼebé halo husi fatuk, neʼebé uluk ema uza atu tau fali mate-ruin bainhira ema mate nia isin sai ruin.

Liafuan neʼebé bahat iha kaixa neʼe dehan: “Miriam, oan-feto husi Yeshua, oan-mane husi Caifás, amlulik husi Maazias husi Beth ʹImri.” Bíblia hatudu katak amlulik boot neʼebé envolve an iha tesi-lia atu fó kastigu-mate ba Jesus mak Caifás. (Joao 11:48-50) Matenek-naʼin ida kona-ba istória naran Flávio Josefo bolu amlulik boot neʼe nuʼudar “José, neʼebé ema bolu Caifás”. Tan neʼe, kaixa neʼe mak Caifás nia família ida nian. Tanba matenek-naʼin sira hetan tiha ona amlulik boot neʼe nia kaixa mate-ruin nian neʼebé hakerek “Yehosef bar Caiapha”, ka “José, Caifás nia oan”, a karik Miriam mak José nia família.

Tuir informasaun neʼebé Israel Antiquities Authority (IAA) mak hatoʼo, Miriam nia kaixa neʼe hetan fali husi naʼok-teen sira neʼebé buka rikusoin husi rate antigu sira. Matenek-naʼin sira neʼebé estuda didiʼak kaixa neʼe fó sai katak kaixa neʼe laʼós falsu.

Kaixa neʼe mós hatudu buat ida neʼebé foun. Kaixa neʼe temi “Maazias”, neʼe mak grupu ikus husi grupu hamutuk 24 neʼebé fahe amlulik sira atu troka malu serbisu iha templu iha Jerusalém. (1 Crôn 24:18) IAA hatete katak liafuan iha Miriam nia kaixa neʼe hatudu katak família Caifás mak parte husi grupu Maazias nian.

Kaixa neʼe mós temi liafuan “Beth ʹImri”. Matenek-naʼin sira hatete katak ita bele komprende ida-neʼe iha dalan rua. Tuir IAA, dalan ida atu ita komprende Beth ʹImri mak nuʼudar “família amlulik ida nia naran, ka Imer nia oan sira (Esdras 2:36-37; Neemias 7:39-42) neʼebé ninia bei-oan inklui Maazias nia família”. IAA mós hatete katak dalan ida seluk atu komprende Beth ʹImri mak nuʼudar “feto mate neʼe ka ninia família nia moris-fatin nia naran”. Maski ita la hatene ho loloos kona-ba neʼe, maibé Miriam nia kaixa hatudu ho klaru mai ita katak família husi ema neʼebé temi iha Bíblia laran iha duni iha tempu uluk.