1, 2. Saida mak ajuda Testemuña ba Jeová naʼin-230 atu tahan iha “marxa mate nian”?

 BAINHIRA Hitler nia tropa besik ona atu lakon funu mundiál segundu, ninia governu Nazi haruka oho ema rihun ba rihun neʼebé iha komarka laran. Hodi halo nuneʼe, sira halo planu atu lori ema dadur iha komarka ida naran Sachsenhausen ba ponte-kais, hatama sira iha ró boot, no depois halo ró mout iha tasi laran. Ikusmai, ema bolu planu neʼe nuʼudar “marxa mate nian”.

² Husi komarka Sachsenhausen iha rai-Alemaña, ema dadur naʼin-33.000 komesa marxa hodi laʼo dook kilómetru 250 toʼo sidade Lübeck, neʼebé iha ponte-kais. Dadur sira-neʼe inklui mós Testemuña ba Jeová naʼin-230 husi nasaun oioin hamutuk neen. Maski ema dadur hotu la iha forsa tanba hamlaha no moras, maibé ita-nia irmaun hotu moris liu terus neʼe. Tanbasá? Ida hatete: “Ami fó laran-manas ba malu no ajuda malu atu kontinua laʼo ba oin.” Sin, domin neʼebé sira hatudu ba malu no “kbiit makaʼas” husi Jeová mak ajuda sira atu tahan susar boot neʼe.—2 Kor 4:7.

3. Tanbasá mak ita presiza fó laran-manas ba malu?

³ Maski ita la laʼo iha “marxa mate nian”, maibé ita hasoru susar oioin. Husi tinan 1914 neʼebé Maromak nia Ukun hahú iha lalehan, Satanás soe tun ba mundu no laran-nakali tanba nia hatene katak ninia tempu hela uitoan deʼit. (Apok 12:7-9, 12) Nuʼudar Armagedon besik daudauk, Satanás uza dalan oioin atu estraga ita-nia relasaun ho Jeová. Liután neʼe, ita mós hasoru susar loroloron nian. (Jó 14:1; Ecle 2:23) Dala ruma, buat sira-neʼe halo ita laran-tun tebes hodi sai fraku no la bele tahan susar sira-neʼe. Porezemplu,  hanoin toʼok kona-ba irmaun ida neʼebé ajuda ona ema barak atu laran-metin nafatin ba Jeová. Bainhira nia rasik mak sai katuas, nia ho ninia feen sai moras, no nia komesa sente laran-tun tebes. Hanesan ho irmaun neʼe, ita hotu presiza simu “kbiit makaʼas” husi Jeová no fó laran-manas ba malu.

4. Kuandu ita fó laran-manas ba malu, ita presiza halo tuir apóstolu Paulo nia konsellu saida?

⁴ Kuandu ita fó laran-manas ba malu, ita presiza halo tuir apóstolu Paulo nia konsellu ba ema kristaun ebreu sira, neʼebé dehan: “Mai ita hanoin malu hodi ajuda malu atu hatudu domin no hahalok diʼak, no keta haluha atu halibur an hamutuk nuʼudar ema balun toman atu halo, maibé fó laran-manas ba malu, liuliu nuʼudar imi haree loron neʼe besik ona mai.” (Ebr 10:24, 25, MF) Iha dalan saida deʼit mak ita bele halo tuir konsellu importante neʼe?

5. “Hanoin malu” katak sá? Oinsá mak ita bele halo ida-neʼe?

⁵ “Hanoin malu” katak hanoin kona-ba maluk nia presiza. Ita sei la hatene irmaun-irmán sira-nia presiza se ita fó kumprimentu ba malu lalais deʼit iha reuniaun-fatin, ka dada lia deʼit kona-ba buat neʼebé ladún importante. Klaru katak ita lakohi mete ema seluk nia moris. (1 Tes 4:11; 1 Tim 5:13) Maski nuneʼe, atu fó laran-manas ba ita-nia maluk, ulukliu ita presiza hatene sira-nia situasaun, hahalok, susar, no mós oinsá sira sente kona-ba Jeová. Sira presiza fiar katak ita mak sira-nia belun neʼebé diʼak no katak ita hadomi sira. Tan neʼe, importante atu uza ita-nia tempu hamutuk ho sira, laʼós deʼit bainhira sira hasoru susar ka sira sai laran-tun.—Rom 12:13.

6. Hodi bele ajuda irmaun-irmán sira iha kongregasaun, katuas sira presiza halo saida?

⁶ Bíblia hatete katak katuas kristaun sira tenkesér prontu atu tau matan ba kongregasaun. (1 Ped 5:1-3) Atu halo ida-neʼe, sira presiza hatene didiʼak Jeová nia bibi ida-idak. (Lee Provérbios 27:23. a) Se katuas sira mak prontu atu ajuda irmaun-irmán sira no gosta ransu hamutuk, ida-neʼe sei halo fasil ba sira iha kongregasaun atu husu ajuda. Karik sira mós sei la moe atu koʼalia nakloke kona-ba sira-nia sentimentu no problema oioin, no rezultadu mak katuas sira bele ajuda ema iha kongregasaun hodi tuir sira ida-idak nia presiza.

7. Bainhira ema neʼebé laran-tun mak koʼalia arbiru, ita presiza hanoin-hetan saida?

⁷ Paulo hatete ba kongregasaun iha Tesalónika: “Tau matan ba sira neʼebé kbiit-laek.” (Lee 1 Tesalonika 5:14.) “Sira neʼebé kbiit-laek” inklui mós ema neʼebé laran-tun. Provérbios 24:10 hatete: “Ó sente laran-tun iha tempu neʼebé susar ka lae? Ó-nia kbiit sei sai menus.” Se ita hakarak ajuda ema neʼebé laran-tun, ita presiza hanoin-hetan katak dala ruma sira sei koʼalia arbiru deʼit, no la ho neon hakanek ema seluk nia laran. (Jó 6:2, 3) Irmán ida naran Rachelle ninia inan mós hetan moras depresaun. Rachelle hatete: “Dala barak, haʼu-nia inan koʼalia siʼak mai haʼu. Maibé, haʼu hanoin filafali katak loloos nia ema neʼebé laran-diʼak. Ema neʼebé iha moras depresaun sei koʼalia buat oioin la ho neon. Haʼu hatene katak se haʼu siʼak fali ba haʼu-nia inan, situasaun sei sai aat liu.” Provérbios 19:11 hatete: “Hodi uza matenek ema sei la sai hirus lalais, no ninia hahalok furak mak fó perdua ba ema nia sala.”

8. Ita presiza “hafoun” ita-nia domin liuliu ba sé?

 ⁸ Oinsá mak ita bele “hanoin” ema neʼebé laran-tun tanba sala neʼebé uluk nia halo? Dala ruma, maski nia arrepende an no hadiʼa ona ninia hahalok, maibé nia nafatin sente moe. Kona-ba ema neʼebé arrepende an ona, apóstolu Paulo hakerek ba ema kristaun iha Korinto: “Imi fó perdua ba nia no konsola nia; lae karik, susar boot liu neʼe bele halakon nia. Neʼe duni, haʼu husu imi atu hafoun imi-nia domin ba nia.” (2 Kor 2:7,  8) Ita labele hanoin katak ita-nia maluk mak tenke komprende ita-nia domin, maibé ita mak tenkesér “hafoun” ita-nia domin liuhusi ita-nia liafuan no hahalok.

9. Oinsá mak ita bele “ajuda malu atu hatudu domin no hahalok diʼak”?

⁹ Paulo mós hakerek: “Mai ita hanoin malu hodi ajuda malu atu hatudu domin no hahalok diʼak.” Oinsá mak ita bele halo nuneʼe? Porezemplu, bainhira ita sunu ai no ahi neʼe atu mate, ita presiza book ahi no kehe hodi ahi neʼe lakan fali. (2 Tim 1:6) Hanesan neʼe mós ho ita-nia irmaun-irmán sira. Ita hakarak book sira atu kontinua serbí Jeová ho laran-manas. Dalan diʼak ida mak hodi gaba sira kona-ba buat diʼak neʼebé sira halo.

10, 11. (a) Sé deʼit mak presiza simu liafuan gaba? (b) Oinsá mak liafuan gaba bele ajuda ema neʼebé halo sala? Esplika toʼok.

¹⁰ Ita hotu presiza simu liafuan gaba. Katuas kristaun ida hatete: “Haʼu-nia aman nunka gaba haʼu, tan neʼe haʼu sai ema neʼebé la fiar-an. . . . Maski haʼu tinan 50 ona, haʼu sente kontente kuandu haʼu-nia maluk sira fó-agradese ba haʼu-nia serbisu diʼak nuʼudar katuas kongregasaun nian. Haʼu-nia esperiénsia rasik hatudu mai haʼu katak importante tebes atu fó laran-manas ba malu, no haʼu sempre buka oportunidade atu gaba ema seluk.” Ita hotu sente kontente kuandu ema ruma gaba ita. Neʼe inklui pioneiru  sira, ferik-katuas, no sira neʼebé sente laran-tun.—Rom 12:10.

¹¹ Kuandu katuas sira ajuda maluk kristaun neʼebé halo sala, diʼak atu temi buat diʼak neʼebé ema neʼe uluk halo. Karik ida-neʼe sei ajuda ema neʼe atu troka ninia hanoin no hahalok. (Gal 6:1) Irmán ida naran Miriam hatete: “Uluk, susar oioin kona haʼu tanba haʼu-nia kolega diʼak husik kongregasaun no iha tempu hanesan haʼu-nia aman hetan moras strok. Haʼu sai laran-tun tebes. Atu bele sente kontente fali, haʼu komesa namora ho ema neʼebé fiar la hanesan.” Maibé, ida-neʼe halo nia sente katak nia la merese simu Jeová nia domin, toʼo ikusmai nia hanoin atu husik lia-loos. Maibé, katuas ida fó-hanoin Miriam kona-ba ninia serbisu diʼak neʼebé uluk nia halo ba Jeová no katak Jeová sei nafatin hadomi nia. Liafuan neʼe ajuda nia atu haburas fali ninia domin ba Jeová. Ikusmai, Miriam hakotu ninia relasaun ho namoradu no kontinua serbí Jeová.

12. Se ita hamoe ita-nia maluk, ida-neʼe bele lori rezultadu saida?

¹² Kuandu ita ajuda ita-nia maluk atu kontinua serbí Jeová, ita presiza kuidadu atu la hamoe sira. Ita labele kompara sira ho ema seluk, ka hatún hodi obriga sira atu halo tuir ita-nia hakarak rasik, no ita mós lakohi halo sira sente katak sira-nia hakaʼas-an la toʼo. Se ita halo hanesan neʼe, karik sira sei koko atu troka sira-nia hahalok, maibé ida-neʼe ba tempu uitoan deʼit. Sin, diʼak liu ita gaba ita-nia maluk ho laran no ajuda sira atu hanoin-hetan fali katak ita hakaʼas an atu serbí Maromak tanba domin.—Lee Filipe 2:1-4.

13. Hodi halo saida mak ita bele fó laran-manas ba ita-nia maluk? (Haree dezeñu iha pájina 18.)

¹³ Apóstolu Paulo mós hatete ba ita atu ‘fó laran-manas ba malu, liuliu nuʼudar ita haree loron neʼe besik ona mai’. Hanoin toʼok, bainhira ita sunu ai no ahi neʼe sai menus, dala ruma ita mós tau tan mina-rai atu ahi bele lakan. Hanesan neʼe mós, hodi ajuda ita-nia maluk neʼebé laran-tun, importante atu halo sira sente forsa no kmaan atu serbí Jeová ho laran-manas. Kuandu ita halo ida-neʼe, koʼalia iha dalan neʼebé hatudu domin. (Prov 12:18) Ita mós tenke sai ‘lalais atu see tilun no neineik atu koʼalia’. (Tgo 1:19) Se ita prontu atu rona didiʼak, ita bele komprende sira-nia situasaun no tansá sira sente laran-tun, hodi nuneʼe ita bele ajuda sira atu tahan hasoru sira-nia susar.

14. Oinsá mak katuas ida ajuda irmaun ida neʼebé laran-tun hela?

¹⁴ Entaun, mai ita hanoin kona-ba oinsá mak katuas ida ajuda irmaun ida neʼebé tinan barak ona la bá haklaken. Kuandu katuas neʼe rona didiʼak ba buat neʼebé irmaun neʼe hatete, nia haree ho klaru  katak irmaun neʼe sei hadomi tebes Jeová. Irmaun neʼe estuda nafatin lisaun hotu iha Livru Haklaken no hakaʼas an atu tuir reuniaun sira. Maibé, nia sei triste hela tanba maluk balu iha kongregasaun nia hahalok uluk halo nia laran-kanek. Katuas neʼe rona ho pasiénsia hodi bele komprende irmaun neʼe nia sentimentu, no ajuda nia atu haree katak Jeová no maluk sira sei hadomi nia. Afinál, irmaun neʼe haree katak ninia esperiénsia aat uluk nian mak hanetik ninia serbisu ba Maromak neʼebé nia hadomi. Katuas neʼe konvida nia atu bá haklaken hamutuk. Ho katuas neʼe nia ajuda, irmaun neʼe sai badinas iha serbisu haklaken, no ikusmai, nia hetan fali knaar atu serbí nuʼudar katuas ida.

15. Oinsá mak ita bele halo tuir Jeová nia ezemplu?

¹⁵ Dala ruma, ema neʼebé laran-tun sei la sente diʼak lalais ka simu kedas ita-nia ajuda. Tan neʼe, ita presiza nafatin ajuda sira. Paulo hatete: “Apoia sira neʼebé fraku, hatudu pasiénsia ba ema hotu.” (1 Tes 5:14, MF) Duké rende an lalais, mai ita kontinua “apoia” sira hodi hatudu pasiénsia. Jeová mós hatudu pasiénsia ba ninia atan sira neʼebé laran-tun. Porezemplu, uluk nia hatudu pasiénsia ba Elias hodi komprende ninia susar no fó buat neʼebé Elias presiza atu bele kontinua ninia serbisu. (1 Reis 19:1-18) Nuneʼe mós ho David, tanba nia arrepende an duni, Jeová hatudu laran-luak hodi fó perdua ba nia. (Sal 51:7, 17) Jeová mós ajuda ninia atan neʼebé hakerek Salmo 73, neʼebé besik ona atu la serbí tan Nia. (Sal 73:13, 16, 17) Sin, Jeová hatudu laran-diʼak no pasiénsia ba ita, liuliu kuandu ita sente laran-kraik. (Êx 34:6) Bíblia hatete katak Jeová hafoun ninia laran-diʼak “dadeer-dadeer” no laran-diʼak neʼe sei la iha rohan. (Lam 3:22, 23) Jeová mós hakarak ita atu halo tuir ninia ezemplu hodi hatudu laran-diʼak ba ema neʼebé laran-tun.

16, 17. Nuʼudar mundu aat neʼe besik ona toʼo rohan, ita presiza halo saida? Tanbasá?

¹⁶ Husi ema dadur naʼin-33.000 neʼebé sai husi komarka Sachsenhausen no laʼo ba ponte-kais, ema rihun ba rihun mate. Maibé husi Testemuña ba Jeová naʼin-230, ida deʼit mós la mate. Tanba sira fó laran-manas no ajuda malu, ida-neʼe mak ajuda sira atu tahan hasoru susar boot no salva sira-nia moris.

¹⁷ Ohin loron, ita laʼo daudauk iha ‘dalan kloot neʼebé lori ema ba moris’. (Mt 7:14) Lakleur tan, Jeová nia atan sira hotu sei tama iha mundu foun. (2 Ped 3:13) Nuʼudar Satanás nia mundu aat neʼe besik ona toʼo rohan, mai ita ajuda malu hodi kontinua laʼo iha dalan neʼebé lori ita ba moris rohan-laek.