Imi-nia liafuan—‘dehan uluk sin no tuirmai lae’?
Hanoin toʼok: Katuas kristaun ida neʼebé serbí iha grupu neʼebé komunika ho ospitál sira halo arranju ho irmaun joven ida atu haklaken hamutuk iha loron-domingu dadeer. Maibé iha dadeer neʼe kedas, irmaun ida telefone nia no hatete katak ninia feen foin hetan asidente ho karreta no nia iha ospitál. Irmaun neʼe husu katuas neʼe nia ajuda hodi buka doutór neʼebé halo operasaun neʼebé la uza raan. Entaun, katuas neʼe troka ninia planu atu haklaken ho irmaun joven neʼe, hodi bele ajuda família neʼebé foin hetan dezastre.
Hanoin toʼok kona-ba situasaun ida seluk: Inan ida neʼebé haboot mesak ninia oan naʼin-rua simu konvite husi kaben-naʼin ida iha kongregasaun atu han no halimar hamutuk iha kalan ida. Kuandu nia fó-hatene ninia oan sira kona-ba neʼe, sira kontente loos no hein namanas atu bá. Maibé loron ida antes kalan neʼe, kaben-naʼin neʼe fó-hatene katak buat ruma mosu no sira la bele ransu malu. Maibé ikusmai inan neʼe hatene tansá mak sira troka sira-nia planu. Depois konvida tiha nia ho nia oan, sira hetan konvite seluk husi sira-nia belun atu halimar hamutuk iha kalan neʼebé hanesan, no sira simu fali konvite neʼe.
Nuʼudar ema kristaun, ita tenke kumpre buat neʼebé ita promete. Ita lakohi atu sai ema neʼebé “dehan uluk Sin no tuirmai dehan Lae”. (2 Korinto 1:18) Maibé, ezemplu rua neʼe hatudu katak situasaun ida-idak la hanesan. Dala ruma ita presiza duni atu troka arranju neʼebé ita halo ona. Apóstolu Paulo mós hasoru situasaun hanesan neʼe.
EMA KRITIKA PAULO
Iha tinan 55 kuandu Paulo vizita Éfeso durante ninia viajen misionáriu nian ba dala terseiru, nia hanoin atu hakur Tasi Egeu hodi bá Korinto no husi neʼebá nia sei hakat ba Masedónia. Tuirmai, kuandu nia atu fila ba Jeruzalein, nia hakarak vizita kongregasaun Korinto ba dala segundu hodi halibur sira-nia prezente atu lori ba maluk kristaun sira iha Jeruzalein. (1 Korinto 16:3) Iha 2 Korinto 1:15, 16, Paulo dehan: “Uluk haʼu hakarak atu toʼo ba imi hodi nuneʼe imi bele haksolok ba dala segundu. Haʼu hakarak atu para iha imi kuandu haʼu atu bá Masedónia no mós fila husi Masedónia, no depois neʼe imi bele lori haʼu toʼo dalan klaran nuʼudar haʼu bá Judeia.”
Paulo haruka ona karta hodi fó-hatene ninia planu ba maluk kristaun sira iha Korinto. (1 Korinto 5:9) Maibé, lakleur depois hakerek karta neʼe, Kloe nia umakain fó-hatene ba Paulo katak kongregasaun neʼe iha problema boot. (1 Korinto 1:10, 11) Tan neʼe, Paulo troka ninia planu no nia hakerek karta neʼebé agora ita hatene nuʼudar 1 Korinto. Iha karta neʼe, ho domin Paulo fó konsellu no matadalan kona-ba oinsá atu hadiʼa situasaun neʼe. Nia mós dehan katak nia troka ona ninia planu, hodi bá uluk Masedónia no tuirmai mak nia sei vizita Korinto.—1 Korinto 16:5, 6. a (Haree nota iha kraik.)
Karik kuandu maluk kristaun sira iha Korinto simu Paulo nia karta, sira balu kritika nia katak nia la laran-metin ba ninia promesa. Sira hanoin katak sira mak diʼak liu fali Paulo, no Paulo bolu sira “apóstolu boot”. Hodi defende nia an, Paulo husu: “Bainhira haʼu halo desizaun neʼe, haʼu la haree ida-neʼe nuʼudar buat baibain deʼit, loos ka lae? Ka haʼu halo planu tuir deʼit hakarak isin nian, atu nuneʼe haʼu dehan ‘sin, sin’ no tuirmai ‘lae, lae’?”—2 Korinto 1:17; 11:5.
Entaun, iha situasaun neʼe Paulo haree ninia promete nuʼudar buat neʼebé “baibain deʼit” hanesan ema neʼebé susar atu tau fiar? Lae duni! Hodi husu pergunta ‘Haʼu halo planu tuir deʼit hakarak isin nian ka lae?’, Paulo hatudu ba maluk kristaun iha Korinto katak nia troka ninia planu ho razaun neʼebé loos, laʼós tanba nia la laran-metin ba ninia promesa.
Paulo defende nia an hodi dehan: “Imi bele tau fiar ba Maromak katak buat neʼebé ami dehan ba imi mak loos. Ami la dehan uluk Sin no tuirmai dehan Lae.” (2 Korinto 1:18) Tuir loloos, kuandu Paulo troka ninia planu, nia hanoin maluk kristaun sira iha Korinto nia diʼak. Iha 2 Korinto 1:23, Paulo fó razaun hodi hatete: “Tanba haʼu lakohi halo imi triste liután.” Hodi troka planu, Paulo fó tempu ba sira atu hadiʼa problema antes nia bá vizita sira, no sira halo nuneʼe. Kuandu Paulo iha Masedónia, nia rona husi Tito katak ninia karta ajuda ema Korinto atu arrepende an, no ida-neʼe halo Paulo kontente tebes.—2 Korinto 6:11; 7:5-7.
JESUS MAK “AMEN” BA MAROMAK
Kuandu “apóstolu boot” sira duun katak Paulo la kumpre ninia promesa, karik sira mós fó ideia katak ema la bele tau fiar ba Paulo nia serbisu haklaken. Maibé Paulo fó-hanoin ba ema Korinto katak nia haklaken ba sira kona-ba Jesus Kristu nia liafuan. Nia dehan: “Maromak nia Oan-Mane, Kristu Jesus, neʼebé haʼu, no Silvano, no Timóteo fó sai iha imi-nia leet, laʼós sai nuʼudar Sin no tuirmai Lae, maibé Sin mak Sin.” (2 Korinto 1:19) Entaun, Jesus Kristu mak ema neʼebé la bele tau fiar ka lae? Lae duni! Jesus sempre koʼalia lia-loos iha ninia moris no iha serbisu haklaken. (João 14:6; 18:37) Se Jesus nia liafuan mak sempre loos no buat neʼebé Paulo haklaken mós hanesan ho Jesus nia liafuan, neʼe katak ema labele bolu Paulo bosok-teen.
Jeová mak “Maromak lia-loos nian”. (Salmo [Mazmur] 31:5) Paulo hatutan tan, hodi dehan: “Maromak nia promesa hotu sai loos liuhusi nia”, katak Jesus Kristu. Tanba Jesus hatudu laran-metin toʼo mate, ida-neʼe halo ita fiar metin ba Jeová nia promesa sira. Paulo hatutan tan: “Liuhusi nia [Jesus] mak ita dehan ‘Amen’ ba Maromak hodi fó glória ba Maromak.” (2 Korinto 1:20) Jesus mak “Amen”, ida-neʼe katak sá? Neʼe katak buat hotu neʼebé Maromak Jeová promete sei sai loos husi Jesus!
Tan neʼe, hodi tuir Jeová no Jesus neʼebé sempre koʼalia lia-loos, Paulo mós nunka bosok. (2 Korinto 1:19) Paulo la troka ninia planu arbiru hodi “tuir deʼit hakarak isin nian”. (2 Korinto 1:17) Maibé, nia moris tuir Maromak nia espíritu. (Galásia 5:16) Kuandu Paulo halo buat ruma, nia sempre hanoin uluk nia maluk kristaun sira-nia diʼak. Tuir loloos, ninia liafuan Sin mak Sin duni!
ITA-NIA SIN MAK SIN KA LAE?
Ohin loron, ema barak la kumpre sira-nia promesa tan deʼit problema kiʼik ka tanba sira-nia hakarak troka. Porezemplu, kuandu ema halo negósiu ruma, dala barak sira la kumpre buat neʼebé sira promete maski sira asina ona iha kontratu. Ema barak haree arranju kaben nian nuʼudar buat neʼebé sira bele hakotu lalais. Ema neʼebé soe malu aumenta ba beibeik, ida-neʼe hatudu katak ema hanoin juramentu kaben nian mak laʼós buat neʼebé importante.—2 Timóteo 3:1, 2.
Oinsá ho Ita? Ita-nia liafuan Sin mak Sin ka lae? Hanesan temi ona, dala ruma ita presiza troka ita-nia arranju tanba situasaun ruma mosu, laʼós tanba ita mak ema neʼebé sempre troka hanoin. Maibé se ita promete atu halo buat ruma, ita tenke hakaʼas an atu kumpre ida-neʼe. (Salmo [Mazmur] 15:4; Mateus 5:37) Hodi halo nuneʼe, ema bele tau fiar ba ita nuʼudar ema neʼebé sempre koʼalia lia-loos. (Éfeso 4:15, 25; Tiago 5:12) No ida-neʼe bele ajuda sira atu rona ba ita kuandu ita haklaken kona-ba Maromak nia Ukun. Tan neʼe, mai ita hakaʼas an hodi halo tuir ita-nia liafuan. Se ita dehan Sin, tenkesér Sin!
a Lakleur depois Paulo hakerek 1 Korinto, nia halo duni viajen ba Masedónia liuhusi Tróade, no iha neʼebá nia hakerek karta 2 Korinto. (2 Korinto 2:12; 7:5) Ikusmai, nia vizita duni Korinto.
