“Ita-nia reinu sei hamriik metin”
Hakbesik ba Maromak
“Ita-nia reinu sei hamriik metin”
IHA ema nia istória, ukun-naʼin barak lakon sira-nia pozisaun. Balu lakon tanba ema la vota tan ba sira, no balu lakon tanba ema hadau sira-nia ukun ho forsa. Oinsá ho Jesus Kristu, Liurai husi Maromak nia Reinu? Iha buat ruma neʼebé bele halo nia lakon pozisaun nuʼudar Liurai neʼebé Maromak hili, ka lae? Ita bele lee resposta ba pergunta neʼe iha Maromak Jeová nia liafuan ba David, liurai neʼebé ukun Izraél iha tempu uluk. Liafuan sira-neʼe hakerek iha 2 Samuel kapítulu 7.
Liafuan primeiru husi kapítulu neʼe hatudu katak Liurai David sente laran-susar tanba, maski nia mak ema deʼit nia hela iha palásiu neʼebé furak, maibé Maromak nia arka tau deʼit iha tenda neʼebé simples. * David fó sai nia hakarak atu harii uma, ka templu neʼebé diʼak liu ba Maromak Jeová. (Versíkulu 2) Maibé, lakleur David aprende katak nia laʼós ema ida-neʼebé atu harii uma neʼe. Liuhusi profeta Natan, Maromak Jeová fó-hatene David katak nia oan-mane mak sei harii templu neʼe.—Versíkulu 4, 5, 12, 13.
David nia hakarak atu harii templu monu loos ba Maromak Jeová nia laran. Tanba David nia laran-metin, no mós tanba profesia seluk neʼebé fó sai iha tempu uluk, Maromak halo aliansa ho David katak nia sei foti ema ida husi David nia umakain atu ukun ba nafatin. Natan hatoʼo Maromak nia promete ba David hodi dehan: “Ita-nia bei-oan no Ita-nia reinu sei hamriik metin iha Ita-nia oin, toʼo tempu neʼebé la bele sura; Ita-nia kadunan mós sei sai kadunan neʼebé metin toʼo tempu neʼebé la bele sura.” (Versíkulu 16) Sé mak ida neʼebé sei kumpre promete neʼe, hodi simu liman-rohan nuʼudar ukun-naʼin?—Salmo 89:20, 29, 34-36.
Jesus husi Nazaré mak David nia bei-oan ida. Kuandu anju ida fó-hatene katak Jesus atu moris, nia hatete: “Naʼi Maromak sei haraik ba nia aman David nia kadunan. Nia sei ukun Jacob nia umakain ba nafatin; nia ukun sei rohan-laek.” (Lucas 1:32, 33) Entaun, aliansa neʼebé Maromak halo ho David sai loos iha Jesus Kristu. Nuneʼe, nia ukun laʼós tanba ema mak hili nia, maibé tanba promete neʼebé Maromak fó sai nanis mak fó nia direitu atu ukun ba nafatin. Mai ita hanoin-hetan nafatin katak Maromak nia promete sempre sai loos.—Isaías 55:10, 11.
Ita aprende lisaun importante rua husi 2 Samuel kapítulu 7. Primeiru, ita bele fiar katak la iha buat ida no la iha ema ida neʼebé bele halakon Jesus Kristu nia ukun. Nuneʼe, ita bele fiar katak Jesus sei kumpre duni nia knaar nuʼudar ukun-naʼin, hodi halaʼo Maromak nia hakarak iha rai nuʼudar iha lalehan.—Mateus 6:9, 10.
Segundu, istória neʼe hanorin ita lisaun kapás kona-ba Maromak Jeová nia hanoin no hahalok. Hanoin-hetan katak Maromak Jeová haree no hafolin David nia hakarak neʼebé husi laran. Ita sente kontente atu hatene katak Maromak Jeová mós haree no hafolin ita-nia laran-metin atu adora nia. Dala ruma, iha situasaun balu neʼebé ita la bele kontrola, porezemplu ita hetan moras todan ka sai idade boot. Iha situasaun hanesan neʼe, karik ita la bele halo buat hotu neʼebé ita hakarak halo hodi serbí Maromak. Se nuneʼe, ita bele sente laran-kmaan tanba hatene katak Maromak Jeová haree ita-nia hakarak husi laran atu adora nia.
[Nota–rodapé]
^ par. 2 Arka aliansa mak kaixa santu neʼebé Maromak Jeová haruka ema Izraél atu halo, tuir planu neʼebé nia fó ba sira. Iha tempu uluk arka neʼe reprezenta katak Maromak Jeová iha nasaun Izraél nia leet.—Êxodo 25:22.
