Bíblia troka ema nia moris

FETO ida husi rai-Rúsia neʼebé haboot oan mesak, oinsá mak nia husik nia toman kona-ba droga no aprende atu tau matan didiʼak ba nia oan? Mane ida neʼebé la iha uma iha rai-Japaun iha sidade Kyoto, oinsá mak nia hetan forsa atu hadiʼa nia hahalok neʼebé halo nia moris kiak? Oinsá mak mane ida neʼebé tau matan karau iha rai-Austrália husik nia toman hemu-lanu? Haree toʼok saida mak ema sira-neʼe hatete.

“Haʼu aprende oinsá atu kaer haʼu-nia responsabilidade rasik.”—NELLY BAYMATOVA

TINAN: 45

HUSI RAI: RÚSIA

MORIS ULUK NIAN: TOMAN HO DROGA

HAʼU-NIA MORIS ULUK: Haʼu boot iha sidade Vladikavkaz, kapitál husi rai-Osétia Norte (agora rai-Alania). Haʼu-nia família ema riku uitoan, no ami iha buat barak. Maski nuneʼe, haʼu-nia moris la kontente. Antes haʼu tinan 34, haʼu kaben no soe malu dala rua ona. No mós ba tinan sanulu, haʼu toman uza droga. Haʼu tama ospitál dala rua atu hetan tratamentu atubele husik toman aat neʼe, maibé la konsege. Maski haʼu iha oan naʼin-rua, maibé iha tempu neʼebá haʼu la hanoin sira, no mós haʼu la iha relasaun diʼak ho família no kolega sira.

Haʼu-nia inan sai Testemuña ba Jeová. Haʼu haree nia tanis beibeik no halo orasaun ba Maromak Jeová, husu atu fó ajuda mai haʼu. Haʼu hanoin: ‘Haʼu-nia inan la hatene buat ida! Oinsá mak Jeová bele ajuda haʼu?’ Haʼu koko duni atu husik droga. Maibé haʼu la konsege ho haʼu-nia forsa rasik. Dala ida, haʼu la uza droga ba loron rua. Haʼu sente haʼu tenke sai husi uma, tan neʼe haʼu haksoit tun husi janela. Problema mak haʼu-nia kuartu iha andár leten. Ida-neʼe halo haʼu-nia liman no ain tohar, no haʼu tenke toba deʼit ba fulan ida resin.

Iha tempu neʼebá, haʼu-nia inan tau matan haʼu. Nia la hirus no nia komprende katak haʼu iha problema kona-ba kontrola haʼu-nia emosaun. Maski nuneʼe, nia rai hela livru Sedarlah! * balu iha haʼu-nia toba-fatin. Haʼu lee livru sira-neʼe hotu kedan no haʼu gosta tebes. Tanba neʼe, haʼu deside atu estuda Bíblia ho Testemuña ba Jeová.

OINSÁ BÍBLIA TROKA HAʼU-NIA MORIS: Hodi estuda Bíblia haʼu aprende oinsá atu kaer haʼu-nia responsabilidade rasik. Haʼu aprende katak haʼu labele hein deʼit haʼu-nia inan atu fó osan mai haʼu, maibé haʼu tenke serbisu hodi tau matan ba haʼu-nia an no haʼu-nia oan nia presiza. Uluk, susar ba haʼu atu halo serbisu tanba haʼu toman atu halo tuir deʼit buat neʼebé haʼu hakarak.

 Konsellu iha Deuteronômio 6:5-7 mós ajuda tebes haʼu. Eskritura neʼe haruka inan-aman atu hanorin sira-nia oan kona-ba Maromak. Haʼu foin hatene katak haʼu iha responsabilidade iha Maromak nia oin kona-ba haboot haʼu-nia oan naʼin-rua. Ida-neʼe book haʼu atu uza tempu hamutuk ho sira no atu haburas domin neʼebé loos ba sira.

Haʼu sente agradese tebes tanba Maromak Jeová husik haʼu aprende lia-loos kona-ba nia. Tan neʼe, haʼu dedika haʼu-nia moris ba nia no hetan batizmu atu sai nuʼudar Testemuña ba Jeová.

BUAT DIʼAK NEʼEBÉ HAʼU HETAN: Agora haʼu hatene oinsá haʼu bele kontrola an atu la hirus lalais, ida-neʼe ajuda haʼu atu hadiʼa haʼu-nia relasaun ho haʼu-nia inan, no mós ho haʼu-nia oan sira.

Liután neʼe, agora haʼu odi hahalok neʼebé la tuir Maromak nia hakarak. Ida-neʼe halo haʼu livre husi problema barak neʼebé uluk haʼu hasoru tanba haʼu-nia hahalok aat. Agora haʼu kontente tebes hodi ajuda ema seluk aprende lia-loos kona-ba Maromak domin nian, Jeová.

“Halo tuir Bíblia nia matadalan, ida-neʼe salva duni haʼu-nia moris.”—MINORU TAKEDA

TINAN: 54

HUSI RAI: JAPAUN

MORIS ULUK NIAN: MORIS IHA LURÓN

HAʼU-NIA MORIS ULUK: Haʼu-nia aman no avó-feto haboot haʼu iha sidade naran Yamaguchi. Haʼu la hatene haʼu-nia inan. Kuandu haʼu tinan 19, haʼu-nia avó mate, no haʼu hela nafatin ho haʼu-nia aman. Haʼu serbisu teʼin no haʼu-nia aman mós sempre sai atu serbisu. Tanba ami serbisu iha oras la hanesan, ami ladún hasoru malu. Haʼu-nia toman mak serbisu ba oras barak no hemu tua hamutuk ho haʼu-nia kolega sira.

Nuʼudar tempu liu ba daudaun, haʼu komesa sente baruk ho haʼu-nia serbisu. Haʼu istori malu beibeik ho haʼu-nia patraun no komesa hemu barak liután. Kuandu haʼu besik tinan 30, haʼu deside atu sai husi uma no laʼo rai. Kuandu haʼu-nia osan hotu, haʼu komesa serbisu iha pachinko fatin (joga-fatin). Haʼu hasoru feto ida, no ikusmai ami kaben. Maibé tinan rua ho balu deʼit, ami soe malu.

Haʼu sente laran-tun no la iha vontade atu halo buat ida. Haʼu mós debe osan barak. Haʼu halai fila fali ba haʼu-nia aman atu sees husi ema neʼebé mai sisi osan. Maibé haʼu koʼalia bosok ba nia, no tan neʼe nia haree haʼu la diʼak. Haʼu naʼok ninia osan no moris ho joga deʼit. Neineik-neineik, haʼu sai kiak tebes no haʼu toba iha terminál komboiu. Haʼu muda ba sidade Hakata, depois muda ba Himeji, no ikusmai ba Kyoto. Iha neʼebá haʼu moris iha lurón ba tinan rua.

OINSÁ BÍBLIA TROKA HAʼU-NIA MORIS: Loron ida iha tinan 1999, kuandu haʼu tuur iha jardín ida besik Mota Kamogawa iha Kyoto, feto naʼin-rua hakbesik haʼu. Sira ida husu: “Ita hakarak estuda Bíblia ka lae?” Haʼu simu. Ema kristaun husi kongregasaun Testemuña ba Jeová hanorin Bíblia mai haʼu. Sira ajuda haʼu atu komprende tansá mak importante atu halo tuir  matadalan husi Bíblia. Sira fó laran-manas mai haʼu atu buka serbisu no hela-fatin. Tanba haʼu hakarak halo sira kontente haʼu bá buka serbisu, maibé foufoun haʼu ladún hakaʼas an. Depois, haʼu komesa halo orasaun beibeik ba Maromak atu husu ajuda no haʼu koko makaʼas, no ikusmai haʼu hetan serbisu.

Orasaun mós ajuda haʼu atu hasoru situasaun ida neʼebé susar tebes. Ema sira neʼebé uluk haʼu debe osan buka nafatin haʼu no ikusmai hetan fali haʼu. Sira sisi sira-nia osan. Haʼu sente laran-susar tebes. Iha tempu neʼebá haʼu toman tiha ona lee Bíblia loroloron, no loron ida, haʼu hetan eskritura ida iha Isaías 41:10. Iha eskritura neʼe, Maromak promete ba ninia atan neʼebé laran-metin ba nia: “Haʼu loloos sei ajuda ó.” Liafuan neʼe fó forsa mai haʼu no halo haʼu aten-brani. Haʼu hakaʼas an atu rezolve haʼu-nia problema kona-ba osan no ikusmai haʼu rezolve duni. Iha tinan 2000, haʼu hetan batizmu atu sai nuʼudar Testemuña ba Jeová.

BUAT DIʼAK NEʼEBÉ HAʼU HETAN: Buat neʼebé haʼu aprende husi Bíblia book haʼu atu hadiʼa haʼu-nia relasaun ho haʼu-nia aman, no nia fó perdua ba haʼu-nia hahalok uluk. Haʼu-nia aman kontente tebes hatene katak haʼu agora moris tuir Bíblia nia matadalan. Haʼu sente katak hodi halo tuir Bíblia nia matadalan, ida-neʼe salva duni haʼu-nia moris.

Liután neʼe, haʼu bele serbisu atu tau matan ba haʼu-nia an. (Efeso 4:28; 2 Tesalonika 3:12) Haʼu mós hetan belun neʼebé loos iha kongregasaun kristaun. (Marcos 10:29, 30) Ho laran tomak haʼu agradese ba Maromak Jeová ba ninia hanorin.

“Ba haʼu, susar atu troka haʼu-nia moris.”—DAVID HUDSON

TINAN: 72

HUSI RAI: AUSTRÁLIA

MORIS ULUK NIAN: LANU-TEEN

HAʼU-NIA MORIS ULUK: Haʼu-nia inan naran Lucy no aman naran Willie, haʼu mak oan númeru sanulu-resin-ida. Haʼu-nia família hela iha área aboríjene iha parte norte iha Queensland, naran Aurukun. Sidade kiʼik neʼe besik mota neʼebé kapás naran Archer, no mós besik tasi. Haʼu-nia inan-aman hanorin ami atu buka hahán hodi kasa no kail ikan. Iha tempu neʼebá, estadu bandu ema aboríjene labele kaer osan, no ami mós tenke hela deʼit iha ami-nia área.

Haʼu-nia inan-aman hanorin ami atu iha hahalok diʼak no hatudu respeitu ba ferik-katuas sira no atu fahe buat neʼebé ami iha ba maluk sira maski ami iha uitoan deʼit. Tan neʼe, ferik-katuas sira hotu iha ami-nia área, ami haree hanesan ami-nia inan ka aman, no tia ka tiu.

Kuandu haʼu tinan hitu, haʼu-nia aman mate, no ami muda ba área aboríjene ida iha  Mapoon, maizumenus kilómetru 150 dook husi Aurukun. Kuandu haʼu tinan 12, haʼu komesa aprende saʼe kuda atu serbisu tau matan ba karau, no haʼu halo serbisu neʼe toʼo haʼu besik tinan 50. Iha tempu neʼebá, haʼu serbisu todan no moris simples. Haʼu toman hemu tua barak. Ida-neʼe lori problema barak mai haʼu.

Loron ida, kuandu haʼu hemu-lanu, haʼu laʼo sai husi bár no karreta neʼebé halai makaʼas xoke haʼu. Ba tinan rua, haʼu presiza hetan tratamentu atu bele sai isin-diʼak fali. Maibé, haʼu la bele ona saʼe kuda.

OINSÁ BÍBLIA TROKA HAʼU-NIA MORIS: Durante tempu neʼebé haʼu simu tratamentu, kolega feto ida lori Livru Haklaken no Sedarlah! balu mai haʼu. Maibé, tanba haʼu tuir eskola ba tinan balu deʼit, haʼu ladún hatene lee. Depois, iha loron ida neʼebé manas tebes, katuas ida neʼebé tinan 83 mai vizita haʼu. Haʼu konvida nia atu tama tuur iha uma laran, no haʼu fó bee malirin ba nia. Nia fó livru balu kona-ba Bíblia no husu se nia bele mai fali atu esplika informasaun iha laran. Ikusmai, haʼu hahú estuda Bíblia ho katuas neʼe. Haʼu komesa komprende katak haʼu presiza troka haʼu-nia hahalok no haʼu-nia moris atu halo Maromak kontente.

Ba haʼu, susar atu troka haʼu-nia moris. Maibé, tanba haʼu hanoin buat neʼebé haʼu-nia inan uluk hatete, haʼu respeitu tebes katuas neʼebé hanorin Bíblia mai haʼu, no haʼu mós hafolin buat neʼebé nia hanorin husi Bíblia. Maski nuneʼe, haʼu dada an no la dedika haʼu-nia an ba Maromak. Haʼu hanoin katak ulukliu haʼu tenke hatene buat hotu iha Bíblia laran.

Maibé haʼu-nia kolega serbisu ida ajuda haʼu atu hadiʼa haʼu-nia hanoin sala neʼe. Nia Testemuña ba Jeová, no nia hatudu mai haʼu liafuan husi Koloso 1:9, 10. Eskritura neʼe hatete katak ita presiza kontinua atu ‘sai boot bá iha matenek kona-ba Maromak’. Haʼu-nia kolega serbisu esplika katak haʼu bele kontinua atu sai boot hodi nafatin aprende buat foun husi Bíblia, tan neʼe haʼu la presiza hanoin katak haʼu la prontu atu serbí Maromak.

Kuandu haʼu komesa tuir reuniaun, haʼu sente hakfodak no kontente tebes tanba haʼu haree ema barak neʼebé kultura la hanesan, maibé sira adora Maromak ho laran ida deʼit. Sira-nia unidade halo haʼu fiar katak haʼu hetan duni relijiaun neʼebé loos, no iha tinan 1985, haʼu hetan batizmu atu sai nuʼudar Testemuña ba Jeová.

BUAT DIʼAK NEʼEBÉ HAʼU HETAN: Haʼu aprende atu lee ho moos, no agora haʼu uza oras barak hodi ajuda ema seluk atu aprende lee no estuda Bíblia. Liután neʼe, kolega feto neʼebé uluk fó Livru Haklaken no Sedarlah! mai haʼu, nia mós estuda Bíblia ho Testemuña sira, hetan batizmu, no ikusmai haʼu kaben ho nia. Ami sente kontente tebes serbisu hamutuk hodi ajuda ema seluk iha área aboríjene atu aprende kona-ba Maromak Jeová.

[Nota–rodapé]

[Liafuan neʼebé foti husi pájina 13]

Haʼu ho haʼu-nia feen kontente tebes hodi ajuda ema seluk iha área aboríjene atu aprende kona-ba Maromak