Orasaun

5 Bainhira no iha neʼebé?

KARIK Ita haree katak relijiaun barak fó atensaun liu kona-ba sira-nia uma orasaun, no sira mós fó ukun-fuan kona-ba oras neʼebé membru sira tenke halo orasaun. Bíblia fó ukun-fuan kona-ba oras no fatin atu halo orasaun ka lae?

Bíblia hatudu duni katak iha tempu neʼebé diʼak atu halo orasaun. Porezemplu, Jesus halo orasaun atu fó-agradese ba Maromak antes nia han ho ninia dixípulu sira. (Lucas 22:17) No kuandu ninia dixípulu sira halibur malu atu adora Maromak, sira halo orasaun hamutuk. Hodi halo nuneʼe, sira halo tuir toman husi tempu ulukliu kuandu ema judeu sira halibur iha sinagoga no templu iha Jerusalém. Maromak hakarak templu atu sai “uma orasaun nian”.—Lucas 19:46.

Bainhira Maromak nia povu halibur hamutuk no halo orasaun, sira-nia orasaun bele lori rezultadu diʼak. Kuandu sira iha hanoin ida deʼit no ema neʼebé reprezenta sira hatoʼo orasaun hodi tuir Bíblia nia matadalan sira, orasaun hanesan neʼe halo Maromak kontente. Ida-neʼe bele book Maromak atu halo buat neʼebé karik nia sei la halo se sira la husu iha orasaun. (Ebreu 13:19) Testemuña ba Jeová iha toman atu halo orasaun iha sira-nia reuniaun. Ami konvida Ita atu bá sira-nia Reuniaun-Fatin atu rona orasaun sira-neʼe.

Maibé, tuir loloos Bíblia la fó ukun-fuan kona-ba oras no fatin atu halo orasaun. Bíblia konta istória barak kona-ba Maromak nia atan sira neʼebé halo orasaun iha tempu naran deʼit no iha fatin oioin. Jesus hatete: “Wainhira ó harohan, tama iha ó-nia kuartu laran, taka odamatan hodi harohan subasubar ba ó-nia Aman, basá Nia neʼebé haree buat neʼebé subar, sei fó ó-nia kolen.”—Mateus 6:6.

Jesus nia liafuan neʼe halo ita kontente ka lae? Ita ida-idak bele hakbesik ba Maromak neʼebé Aas Liu Hotu hodi halo orasaun iha tempu naran deʼit, no Ita bele fiar katak Maromak sei rona Ita-nia orasaun. Tan neʼe mak dala barak Jesus buka fatin atubele halo orasaun mesamesak! Loron ida, nia uza kalan tomak atu harohan ba Maromak, karik hodi husu Maromak nia ajuda atu foti desizaun neʼebé importante tebes.—Lucas 6:12, 13.

Bíblia mós konta istória kona-ba Maromak nia atan sira seluk neʼebé halo orasaun kuandu sira tenke halo desizaun boot ruma, ka kuandu hasoru susar ruma. Dala ruma sira halo orasaun ho lian makaʼas no dala ruma sira halo orasaun iha laran; sira halo orasaun kuandu sira mesak no mós kuandu halibur ho maluk sira. Buat neʼebé importante mak sira halo orasaun maski sira iha fatin no situasaun naran deʼit. Maromak mós konvida ninia atan sira atu hakbesik nia iha orasaun, hodi dehan: “Hamulak beibeik.” (1 Tesalonika 5:17) Nia sempre prontu atu rona ba sira neʼebé halo tuir nia hakarak. Ida-neʼe hatudu katak Maromak hadomi tebes ita, loos ka lae?

Maibé, ohin loron ema barak iha dúvida katak orasaun bele ajuda sira ka lae. Karik Ita mós husu: ‘Orasaun bele ajuda haʼu ka lae?’

[Liafuan ne’ebé foti husi pájina 9]

Ita bele halo orasaun iha tempu no fatin naran deʼit