Aprende husi Maromak nia Liafuan

Sé mak Maromak?

Informasaun iha neʼe esplika kona-ba pergunta neʼebé karik Ita husu ona no ajuda Ita atu hetan resposta husi Ita rasik nia Bíblia. Testemuña ba Jeová sira kontente atu koʼalia hamutuk ho Ita kona-ba pergunta sira-neʼe.

1. Sé mak Maromak?

Maromak neʼebé loos mak Kriadór ba buat hotu-hotu. Bíblia bolu Maromak nuʼudar “Liurai rohan-laek”, neʼe katak nia la iha hun no rohan. (1 Timoteo 1:17) Tanba Maromak mak fó moris mai ita, ita tenke adora nia mesak deʼit.—Lee Apokalipse 4:11.

2. Maromak hanesan saida?

Maromak mak Espíritu. Neʼe dehan katak nia iha isin neʼebé ita la bele haree, neʼebé kmanek liu fali ema no animál neʼebé moris iha rai. (Joao 1:18; 4:24) Maski ita la bele haree Maromak, maibé ita bele hatene didiʼak kona-ba Maromak liuhusi buat neʼebé nia kria. Porezemplu, ita ema hatene buat barak kona-ba ai-fuan no ai-funan oioin. Kuandu ita hanoin didiʼak kona-ba buat sira-neʼe, ita bele hatene kona-ba Maromak nia domin no matenek. Kuandu ita haree fitun barak iha lalehan, ida-neʼe hatudu katak Maromak iha forsa boot.—Lee Roma 1:20.

Ita mós bele aprende buat barak liután kona-ba Maromak liuhusi Bíblia. Porezemplu, Bíblia fó-hatene saida mak Maromak gosta no la gosta, oinsá nia tau matan ba ninia povu, no oinsá mak nia sente kona-ba situasaun oioin.—Lee Salmo (Mazmur) 103:7-10.

3. Maromak iha naran ka lae?

Jesus hatete: “Ami Aman iha lalehan, halo Ita naran sai santu.” (Mateus 6:9) Maski Maromak iha títulu oioin, hanesan “Naʼi” ka “Aman”, maibé nia iha naran ida deʼit. Iha lia-tetun, naran neʼe mak “Jeová”. No iha rai ida-idak, ema bolu Maromak nia naran tuir sira-nia língua.—Lee Salmo (Mazmur) 83:18.

Bíblia barak ho tradusaun oioin hasai tiha Maromak nia naran no troka fali ho títulu sira hanesan Naʼi ka Maromak. Maibé iha Bíblia orijinál Maromak nia naran hakerek maizumenus dala 7.000. Jesus haklaken Maromak nia naran kuandu nia hanorin Maromak nia Liafuan ba ema, hodi halo nuneʼe nia ajuda ema atu koñese didiʼak Maromak.—Lee Joao 17:26.

  4. Maromak Jeová hanoin ita ka lae?

Maromak Jeová hatudu interese mai ita hodi rona ita ida-idak nia orasaun. (1 Joao 5:14) Maibé ita ema hasoru susar barak, ida-neʼe hatudu katak Maromak la hanoin ita ka lae? Ema balu hatete katak Maromak halo susar mai ita atu koko ita, maibé sira-nia hanoin la loos. Bíblia hatete: “Maromak nunka halo hahalok aat.”—Jó 34:10; lee Tiago 1:13.

Kuandu Maromak kria ema, nia mós fó liberdade ba ema atu hili. Ita hotu iha liberdade atu halo kontente Maromak. Ita hafolin ida-neʼe ka lae? (Josué [Yosua] 24:15) Susar barak mosu tanba ema hili atu halo buat aat ba ema seluk. Kuandu Maromak haree buat neʼebé la loos, ida-neʼe halo nia laran triste.—Lee Gênesis (Kejadian) 6:5, 6.

Lakleur, Maromak Jeová sei haruka Jesus atu halakon ema nia susar sira no mós ema neʼebé lori susar ba ema seluk. Maibé Bíblia hatudu katak Maromak Jeová iha razaun tansá nia husik susar sira-neʼe mosu ba tempu uitoan. Kona-ba ida-neʼe, ita bele aprende liután husi Livru Haklaken neʼebé sei tuirmai.—Lee Isaías (Yesaya) 11:4.

5. Maromak hakarak ita atu halo saida?

Maromak Jeová kria ita hotu hodi ita bele hatene no hadomi nia. Nia hakarak ita aprende lia-loos kona-ba nia. (1 Timoteo 2:4) Se ita estuda Bíblia, ita bele koñese didiʼak Maromak nuʼudar ita-nia Belun.—Provérbios (Amsal) 2:4, 5; lee Tiago 2:23.

Maromak Jeová fó moris mai ita, nuneʼe ita-nia domin ba Maromak tenkesér boot liu fali domin ba ema seluk. Ita bele hatudu ita-nia domin ba Maromak hodi halo orasaun no halo tuir nia hakarak. (1 Pedro 3:12) Maromak Jeová husu ita atu hatudu domin ba ema seluk.—Lee Marcos 12:29-31; 1 Joao 5:3.

Atu hetan informasaun liután, haree kapítulu 1 husi livru Tuir Loloos, Saida mak Bíblia Hanorin?. Livru neʼe husi Testemuña ba Jeová.

[Dezeñu iha pájina 25]

Dala ruma iha razaun diʼak atu husik ema tahan susar ruma ba tempu uitoan ka lae?