Aprende husi Maromak nia Liafuan

Tanbasá mak Maromak husik buat aat no terus akontese?

Informasaun iha neʼe esplika kona-ba pergunta neʼebé karik Ita husu ona no ajuda Ita atu hetan resposta husi Ita rasik nia Bíblia. Testemuña ba Jeová sira kontente atu koʼalia hamutuk ho Ita kona-ba pergunta sira-neʼe.

1. Oinsá mak buat aat mosu?

Buat aat hahú kuandu Satanás fó-hatene lia-bosok ba ema primeiru. Uluk nia laʼós anju neʼebé aat. Maromak kria nia nuʼudar anju neʼebé la iha sala, maibé ikusmai “nia la hela iha lia-loos”. (Joao 8:44) Nia komesa haburas hakarak atu ema adora nia, laʼós adora Maromak. Satanás koʼalia lia-bosok ba Eva, feto primeiru, no book feto neʼe atu halo tuir nia duké halo tuir Maromak. Adão mós deside atu halo tuir Eva hodi kontra Maromak. Rezultadu husi desizaun neʼe mak lori terus no mate mai.—Lee Gênesis (Kejadian) 3:1-6, 17-19.

Kuandu Satanás lohi Eva atu la halo tuir Maromak, nia kontra hasoru Maromak nia direitu atu ukun. Ema barak halo tuir Satanás hodi la simu Maromak nuʼudar Ukun-Naʼin. Nuneʼe Satanás sai “ukun-naʼin mundu neʼe nian”.—Lee Joao 14:30; Apokalipse 12:9.

2. Kuandu Maromak kria ema no anju, sira iha kbiit atu halo tuir Maromak ka lae?

Maromak kria ema no anju sira ho kbiit atu bele halo tuir didiʼak Maromak nia hakarak. (Deuteronômio [Ulangan] 32:5) Maromak kria ita no fó mai ita liberdade hodi bele hili buat neʼebé diʼak ka buat neʼebé aat. Liberdade neʼe fó mai ita oportunidade atu hatudu sai ita-nia domin ba Maromak.—Lee Tiago 1:13-15; 1 Joao 5:3.

3. Tanbasá mak Maromak husik terus akontese?

Husi tempu neʼebé Adão no Eva kontra Maromak, nia husik deʼit ema sira-neʼebé kontra ninia direitu atu ukun. Tanbasá? Atu hatudu katak ema nia hakaʼas-an atu ukun la bele lori buat diʼak ba ema hotu. (Jeremias [Yeremia] 10:23) Durante tinan 6.000 iha ema nia istória hatudu ho klaru katak ema la bele duni ukun an rasik. Ema nia ukun la bele lori justisa, ka halakon funu, krime, no moras.—Lee Eclesiastes (Pengkhotbah) 7:29; 8:9; Roma 9:17.

Maibé, ema sira-neʼebé simu Maromak nuʼudar sira-nia Ukun-Naʼin hetan rezultadu diʼak ba sira-nia moris. (Isaías [Yesaya] 48:17, 18) Lakleur tan, Maromak Jeová sei halakon ema nia ukun hotu. Ema sira-neʼebé hili no simu Maromak nia ukun mak sei hela iha mundu neʼe ba nafatin.—Isaías 2:3, 4; 11:9; lee Daniel 2:44.

 4. Maromak nia pasiénsia fó oportunidade saida ba ita?

Satanás duun katak ema sei la bele laran-metin ba Maromak Jeová. Maromak nia pasiénsia fó oportunidade ba ita hotu atu hili se ita simu Maromak nia ukun ka ema nia ukun. Ita hatudu ida-neʼe liuhusi dalan neʼebé ita halaʼo ita-nia moris.—Lee Jó (Ayub) 1:8-11; Provérbios (Amsal) 27:11.

5. Oinsá mak ita hatudu katak ita hili Maromak nuʼudar Ukun-Naʼin?

Ita hili Maromak nuʼudar ita-nia Ukun-Naʼin hodi aprende no halo tuir buat neʼebé Bíblia hanorin kona-ba adorasaun neʼebé loos. (Joao 4:23) Hanesan Jesus, ita mós la envolve an iha polítika no funu.—Lee Joao 17:14.

Satanás uza ninia kbiit atu halo ema haburas hahalok imorál no halo hahalok sira-neʼebé lori perigu ba ema nia moris. Kuandu ita sees husi hahalok sira-neʼe, karik ita-nia kolega no família balu sei goza ka kontra ita. (1 Pedro 4:3, 4) Nuneʼe ita tenke halo desizaun ida. Ita sei ransu ho ema sira-neʼebé hadomi Maromak ka lae? Ita sei halo tuir ninia ukun-fuan neʼebé matenek no hatudu domin ba ita ka lae? Se nuneʼe, ita hatudu katak Satanás koʼalia bosok kuandu nia duun katak la iha ema ida neʼebé sei halo tuir Maromak nia liafuan.—Lee 1 Korinto 6:9, 10; 15:33.

Atu hetan informasaun liután, haree kapítulu 11 husi livru Tuir Loloos, Saida mak Bíblia Hanorin? Livru neʼe husi Testemuña ba Jeová.

[Dezeñu iha pájina 16]

Adão halo desizaun neʼebé aat

[Dezeñu iha pájina 17]

Ita-nia desizaun sei hatudu katak ita hakarak Maromak nuʼudar ita-nia Ukun-Naʼin