Lee-naʼin nia pergunta . . .

Maromak hela iha fatin hotu-hotu ka lae?

▪ Relijiaun oioin fiar katak Maromak hela iha fatin hotu-hotu. Porezemplu, livru ensiklopédia katólika nian (New Catholic Encyclopedia) hatete: “Maromak hela iha fatin hotu-hotu no iha buat hotu-hotu nia laran.” Ema naran-boot ida naran John Wesley neʼebé komesa hahú Igreja Metodista hakerek diskursu ida neʼebé fó sai katak “la iha fatin ida iha kriasaun hotu neʼebé Maromak la hela”. *

Maibé, saida mak Bíblia hanorin kona-ba neʼe? Maromak hela iha fatin hotu-hotu ka lae? Porezemplu, Maromak bele hela iha lalehan, rai, no iha ema ida-idak nia laran iha tempu neʼebé hanesan ka lae?

Tuir loloos, Bíblia hatete katak Maromak iha fatin neʼebé nia hela. Neʼe mak iha lalehan. Bíblia konta Liurai Salomão nia orasaun ida, neʼebé nia hasaʼe ba Maromak: “Ita rasik rona husi lalehan, Ita-nia hela-fatin.” (1 Reis [Raja-Raja] 8:43) Kuandu Jesus Kristu hanorin ninia dixípulu sira atu halo orasaun, nia hanorin sira atu halo orasaun ba “Ami Aman iha lalehan”. (Mateus 6:9) Depois Kristu hetan moris-hiʼas, Bíblia hatete katak nia “tama iha lalehan rasik, nuneʼe nia bele mosu iha Maromak futar oin”.—Ebreu 9:24.

Eskritura sira-neʼe hatudu ho klaru katak Maromak Jeová hela iha lalehan deʼit, la’ós iha fatin hotu-hotu. Liafuan “lalehan” la koʼalia kona-ba atmosfera, ka anin neʼebé haleʼu mundu, no la koʼalia kona-ba mundu nia liʼur neʼebé luan tebetebes. Lalehan neʼebé Maromak kria, la toʼo ba Maromak atubele sai ninia hela-fatin. (1 Reis 8:27) Bíblia hatete katak “Maromak mak espíritu”. (Joao 4:24) Nia hela iha lalehan espíritu nian, la’ós lalehan neʼebé iha fitun no planeta sira.—1 Korinto 15:44.

Maibé ema balu hanoin katak Bíblia hatudu Maromak hela iha fatin hotu-hotu. Porezemplu, eskritura iha Salmo [Mazmur] 139:7-10 temi David nia liafuan neʼebé nia koʼalia kona-ba Maromak: “Iha neʼebé mak haʼu bele bá atu hadook an husi Ita-nia espíritu, no iha neʼebé mak haʼu bele halai sees an husi Ita-nia oin? Se haʼu saʼe ba lalehan, Ita iha neʼebá, no se haʼu halo haʼu-nia toba-fatin iha rate laran, haree! iha neʼebá mak Ita iha. Se haʼu iha liras, no haʼu bele hela iha tasi neʼebé dook tebes, iha neʼebá Ita rasik nia liman sei lori haʼu.” Entaun, versíkulu sira-neʼe hatudu katak Maromak hela iha fatin hotu-hotu hanesan temi iha neʼe ka lae?

Haree ba buat primeiru neʼebé David husu: “Iha neʼebé mak haʼu bele bá atu hadook an husi Ita-nia espíritu?” * Liuhusi Maromak nia espíritu santu, nia bele haree buat hotu-hotu no hatudu ninia forsa iha fatin naran deʼit. Nia la presiza atu bá toʼo fatin sira-neʼe atu halo buat ruma. Porezemplu, foin lalais sientista sira hetan informasaun kona-ba rai-uut husi planeta Marte, neʼebé dook kilómetru rihun ba rihun husi rai. Oinsá mak sira bele hetan informasaun sira-neʼe? Liuhusi roket neʼebé sira haruka ba planeta neʼe. Roket neʼe hasai foto no halibur informasaun sira seluk. Entaun, sira bele estuda kona-ba rai-uut iha planeta neʼe maski sira rasik la saʼe ba neʼebá.

Nuneʼe mós, Maromak Jeová la presiza atu bá fatin hotu-hotu atu haree saida mak akontese iha lalehan no rai. Bíblia hatete kona-ba Maromak: “La iha buat ida neʼebé subar husi Nia.” (Ebreu 4:13) Maromak Jeová bele haruka ninia espíritu santu, ka forsa, atu toʼo iha fatin hotu-hotu. Sin, nia bele haree buat hotu neʼebé akontese hodi kumpre ninia hakarak iha fatin hotu husi ninia “hela-fatin neʼebé santu”, lalehan.—Deuteronômio (Ulangan) 26:15.

[Nota–rodapé]

[Dezeñu iha pájina 13]

IAC/RGO/David Malin Images