Aprende husi Maromak nia Liafuan

Oinsá mak Ita bele hatene relijiaun neʼebé loos?

Informasaun iha neʼe esplika kona-ba pergunta neʼebé karik Ita husu ona no ajuda Ita atu hetan resposta husi Ita rasik nia Bíblia. Testemuña ba Jeová sira kontente atu koʼalia hamutuk ho Ita kona-ba pergunta sira-neʼe.

1. Iha ka lae, relijiaun ida neʼebé loos?

Jesus hanorin ninia dixípulu sira katak iha relijiaun ida deʼit neʼebé loos. Ida-neʼe hanesan dalan neʼebé lori ba moris. Kona-ba dalan neʼe, Jesus hatete: “Ema uitoan deʼit mak hetan nia.” (Mateus 7:14) Maromak simu deʼit adorasaun neʼebé tuir lia-loos husi Bíblia. Ema kristaun neʼebé loos iha fiar ida deʼit.—Lee Joao 4:23, 24; 14:6; Efeso 4:4, 5.

2. Tanbasá mak relijiaun barak bolu sira-nia an nuʼudar kristaun?

Profeta falsu sira hatama hanorin falsu iha relijiaun kristaun neʼebé loos hodi dada ema tuir sira. Hanesan Jesus fó-hatene nanis, sira bolu sira-nia an nuʼudar Jesus nia “bibi” maibé sira-nia hahalok hanesan asu-fuik. (Mateus 7:13-15, 21, 23) Kuandu Jesus nia apóstolu sira mate, kristaun falsu komesa sai barak.—Lee Apostolu 20:29, 30.

3. Oinsá mak Ita bele hatene relijiaun neʼebé loos?

Ema kristaun neʼebé loos respeitu Bíblia nuʼudar Maromak nia Liafuan. Sira hakaʼas an atu moris tuir Bíblia nia matadalan. Relijiaun neʼebé loos la hanesan ho relijiaun neʼebé tuir ema nia hanoin deʼit. (Mateus 15:7-9) Ema kristaun neʼebé loos la hanorin buat ida, depois halo buat seluk.—Lee Joao 17:17; 2 Timoteo 3:16, 17.

Relijiaun neʼebé loos hahiʼi Maromak nia naran, Jeová. Jesus fó sai Maromak nia naran. Nia ajuda ema atu hatene kona-ba Maromak no nia hanorin sira atu halo orasaun hodi halo santu Maromak nia naran. (Mateus 6:9) Iha Ita-nia fatin, relijiaun ida neʼebé mak uza Maromak nia naran?—Lee Joao 17:26; Roma 10:13, 14.

 4. Oinsá mak Ita bele rekoñese ema kristaun neʼebé loos?

Ema kristaun neʼebé loos haklaken kona-ba Maromak nia Reinu, ka Ukun. Maromak haruka Jesus atu haklaken kona-ba Ukun neʼe. Liuhusi Maromak nia Ukun deʼit mak ema bele hetan esperansa. Jesus halaʼo haklaken kona-ba Ukun neʼe toʼo nia mate. (Lucas 4:43; 8:1; 23:42, 43) Nia mós fó-hatene ninia dixípulu sira atu haklaken kona-ba Maromak nia Ukun. Se ema ida hakbesik Ita atu koʼalia kona-ba Maromak nia Ukun, ema neʼe tuir relijiaun ida-neʼebé?—Lee Mateus 10:7; 24:14.

Jesus nia dixípulu sira la hola parte iha mundu aat neʼe. Sira la hola parte iha buat polítiku nian ka mete iha problema komunidade nian. (Joao 17:16) Sira mós la halo tuir mundu nia hahalok neʼebé aat.—Lee Tiago 1:27; 4:4.

5. Hahalok importante saida mak ema kristaun neʼebé loos hatudu?

Ema kristaun neʼebé loos hatudu domin boot ba malu. Sira aprende husi Bíblia atu hatudu respeitu ba ema husi nasaun no rasa oioin. Maski relijiaun falsu dala barak apoia funu sira iha mundu, maibé ema kristaun neʼebé loos la halo ida-neʼe. (Miquéias [Mikha] 4:1-4) Ema kristaun neʼebé loos uza sira-nia tempu no rikusoin atu ajuda ema seluk.—Lee Joao 13:34, 35; 1 Joao 4:20, 21.

Sin, Testemuña ba Jeová deʼit hatudu katak sira-nia hanorin mai husi Maromak nia Liafuan no sira deʼit mak hahiʼi Maromak nia naran. Sira haklaken kona-ba Maromak nia Ukun nuʼudar buat neʼebé bele fó esperansa ba ema. Sira mós hatudu domin ba malu no la envolve an iha funu.—1 Joao 3:10-12.

Atu hetan informasaun liután, haree kapítulu 15 husi livru Tuir Loloos, Saida mak Bíblia Hanorin? Livru neʼe husi Testemuña ba Jeová.

[Dezeñu iha pájina 16]

“Sira-neʼe dehan katak sira hatene Maromak, maibé sira la fiar nia.”—Tito 1:16