BÍBLIA konta kona-ba oinsá derrepente deʼit ema komesa koʼalia língua oioin. Ida-neʼe akontese duni ka lae? Ema balu kritika Bíblia nia istória kona-ba oinsá ema nia língua sira hahú no habelar. Porezemplu, hakerek-naʼin ida hatete: “Istória kona-ba Babel mak istória ida neʼebé beik liu hotu.” Ulun-naʼin ida husi relijiaun judeu mós hatete katak ema “inventa deʼit istória neʼe atu koko esplika nasaun hotu mai husi neʼebé”.

Tanbasá mak ema balu la fiar istória kona-ba Babel? Tanba ida-neʼe kontra buat neʼebé ema balu hanoin kona-ba língua hotu nia hun. Porezemplu, matenek-naʼin balu hatete katak língua oioin la mosu derrepente deʼit maibé sira dehan katak, língua hotu mai husi língua ida. Ema seluk fiar katak uluk, língua orijinál balu mosu kuandu ema neʼebé la hatene koʼalia komesa atu koʼalia iha dalan neʼebé simples deʼit, toʼo ikusmai sira halo mudansa toʼo ema bele koʼalia língua oioin neʼebé kleʼan. Tanba ideia sira-neʼe no mós seluk tan, ema barak hanoin hanesan profesór ida naran W.T. Fitch neʼebé hakerek livru ida naran The Evolution of Language. Nia hatete: “Ita seidauk hatene loloos kona-ba língua sira mai husi neʼebé.”

Saida mak matenek-naʼin kona-ba arkeolojia hetan kona-ba língua hotu nia hun no kona-ba mudansa iha ema nia língua sira? Buat neʼebé sira hetan apoia ema nia hanoin ka lae? Ka apoia istória kona-ba Babel? Ulukliu, mai ita aprende liután kona-ba istória Babel nian.

Kuandu Maromak halo ema hotu koʼalia língua oioin no ema hotu komesa hela ketaketak, Bíblia hatete katak ida-neʼe akontese iha “rai-Sinear”, neʼebé ikusmai bolu nuʼudar Babilónia.  (Gênesis [Kejadian] 11:2) Horibainhira mak neʼe akontese? Bíblia hatete katak iha Peleg nia tempu “ema iha mundu hela ketaketak”. Peleg moris maizumenus tinan 250 antes Abraão. Tan neʼe, istória kona-ba Babel akontese maizumenus tinan 4.200 liubá.—Gênesis (Kejadian) 10:25; 11:18-26.

Ema balu hanoin katak língua oioin mai husi língua ida deʼit neʼebé sira hanoin ema koʼalia iha tinan 100.000 liubá. a Ema seluk hanoin katak língua sira neʼebé ita koʼalia ohin loron mai husi língua balu neʼebé ema koʼalia tinan 6.000 liubá. Maibé oinsá mak matenek-naʼin sira esplika kona-ba hun ba língua oioin neʼebé agora ema la uza ona? Revista ida naran Economist hatete katak ida-neʼe susar tebes. Tanbasá? Tanba matenek-naʼin sira kona-ba biolojia bele uza fosil sira hodi hatene kona-ba ema nia istória, maibé matenek-naʼin kona-ba língua la iha buat ida. Revista neʼe mós hatete katak matenek-naʼin ida kona-ba oinsá língua oioin mosu, sempre siʼik deʼit.

Maski nuneʼe, iha duni evidénsia antigu neʼebé bele ajuda atu esplika kona-ba língua oioin mai husi neʼebé. Saida mak neʼe? Livru ida (The New Encyclopædia Britannica) hatete katak matenek-naʼin sira hetan fatuk rai-mean ho liafuan neʼebé bahat, no fatuk sira-neʼe nia otas la liu tinan 4.000 ka 5.000 liubá. Iha neʼebé mak sira hetan evidénsia neʼe? Sira hetan iha Mesopotámia, fatin neʼebé uluk bolu nuʼudar rai-Sinear. b Tan neʼe, evidénsia neʼebé iha, apoia buat neʼebé Bíblia hatete.

Bíblia hatete katak iha Babel, Maromak “halo konfuzaun sira-nia língua hodi sira la bele komprende malu.” (Gênesis [Kejadian] 11:7) Nuneʼe, serbisu-naʼin sira “la harii tan sidade neʼe” no sira ‘namkari iha mundu tomak’. (Gênesis [Kejadian] 11:8, 9) Tan neʼe, Bíblia la hatete katak língua hotu mai husi língua ida deʼit. Maibé Bíblia esplika katak língua barak mosu hamutuk dala ida deʼit, ho liafuan sira-neʼebé kompletu ona hodi ema bele koʼalia moos kona-ba sira-nia sentimentu no hanoin iha dalan neʼebé la hanesan.

Oinsá ho língua nia grupu oioin ohin loron? Língua sira-neʼe iha buat barak neʼebé hanesan ka sira la hanesan duni? Matenek-naʼin ida naran Lera Boroditsky hatete katak kuandu matenek-naʼin sira estuda kona-ba mundu nia língua oioin neʼebé maizumenus hamutuk 7.000, sira haree katak iha buat barak neʼebé la hanesan duni. Maski língua balu hanesan uitoan, porezemplu lia-Kantonés no lia-Hakka husi Xina parte Súl, maibé sira la hanesan duni ho língua seluk hanesan lia-Portugés no Españól.

Língua neʼebé ema koʼalia bele kona dalan neʼebé ema hanoin no esplika buat ruma. Porezemplu, iha língua ida, ema bele koʼalia kona-ba ema nia “liman loos”. Maibé iha língua seluk, sira hatete “liman oeste”. Ida-neʼe bele halo konfuzaun kuandu ema koʼalia ba malu, loos ka lae? Tan neʼe  ita bele komprende katak serbisu-naʼin sira iha Babel sente susar loos atu kontinua sira-nia serbisu.

Ema nia língua orijinál mak hanesan saida? Bíblia hatete katak mane primeiru, Adão, bele inventa liafuan foun kuandu nia hanaran animál hotu. (Gênesis [Kejadian] 2:20) Adão mós halo poezia atu fó sai ninia sentimentu kona-ba ninia feen, no Eva esplika momoos ho ninia liafuan sira saida mak Maromak nia ukun-fuan no rezultadu neʼebé sei mosu se la halo tuir Nia. (Gênesis [Kejadian] 2:23; 3:1-3) Sin, kuandu ema koʼalia língua primeiru, sira bele fó sai sira-nia hanoin no fó sai sira-nia sentimentu iha dalan neʼebé klaru no furak.

Kuandu Maromak halo konfuzaun ema nia língua iha Babel, sira la bele ona serbisu hamutuk. Maibé língua foun neʼebé sira koʼalia, laʼós simples deʼit tanba sira iha liafuan neʼebé kompletu ona. Ita bele fiar hanesan neʼe tanba iha tinan atus balu deʼit, ema halo buat barak, hanesan harii sidade sira neʼebé rame, organiza tropa sira no fila-liman ho rai barak. (Gênesis [Kejadian] 13:12; 14:1-11; 37:25) Klaru katak sira la bele halo buat sira-neʼe se sira-nia língua la iha liafuan barak, loos ka lae? Tuir Bíblia, língua orijinál no mós língua foun sira-neʼe neʼebé mosu iha Babel, mak laʼós simples deʼit, maibé kleʼan ho liafuan kompletu.

Ohin loron, buat neʼebé matenek-naʼin sira estuda kona-ba língua sira mós apoia ida-neʼe. Porezemplu, livru ida (The Cambridge Encyclopedia of Language) hatete katak maski kultura ida bele simples, maibé tuir loloos sira sei uza língua neʼebé kleʼan ho liafuan kompletu. Profesór ida naran Steven Pinke iha ninia livru (The Language Instinct) hatete: “La iha língua ida neʼebé simples.”

Tanba evidénsia hotu neʼebé ita foin koʼalia, kona-ba oinsá língua sira la hanesan no mós kona-ba língua husi tempu antigu ho liafuan sira neʼebé kompletu, ita bele fiar saida? Ita bele fiar katak buat neʼebé Bíblia hatete kona-ba Babel mak loos duni.

Bíblia hatete katak uluk Maromak Jeová halo konfuzaun ema nia língua sira iha Babel tanba sira kontra hasoru nia. (Gênesis [Kejadian] 11:4-7) Maibé nia promete katak nia sei “halo mudansa hodi fó ba ema língua neʼebé moos, atu sira hotu bele bolu Jeová nia naran, hodi bele serbí nia hamutuk ida deʼit”. (Zephaniah [Zefanya] 3:9) “Língua neʼebé moos” neʼe mak lia-loos husi Maromak nia Liafuan neʼebé halo ema barak iha mundu iha unidade. Ita bele hanoin katak, karik iha futuru Maromak sei halo ema iha unidade liután hodi fó ba sira língua ida neʼebé ema hotu bele komprende. Hodi nuneʼe, konfuzaun neʼebé mosu husi tempu Babel nian la iha tan.