Husi eskritura hotu iha Bíblia, eskritura neʼe mak ema barak liu hatene no temi beibeik. Ema hatete katak la iha eskritura seluk neʼebé “esplika ho klaru Maromak nia relasaun ho ema no dalan atu hetan salvasaun”. Tanba ida-neʼe, iha rai balu ema hakerek liafuan iha eskritura neʼe ka dala ruma temi deʼit “João 3:16”, no tau iha poster kuandu sira halaʼo atividade boot ruma, ka tau nuʼudar stiker iha sira-nia karreta, ka hakerek iha moru sira, no fatin seluk tan.

Sira neʼebé halo ida-neʼe fiar duni katak Maromak nia domin lori salvasaun ba sira. Ita mós sente hanesan neʼe ka lae? Maromak nia domin katak sá ba Ita? No tuir Ita-nia hanoin, saida deʼit mak Maromak halo ona atu hatudu ninia domin ba Ita?

Ema barak fiar duni katak Maromak mak kria lalehan no rai, buat hotu iha rai, no mós ema. Sira dehan katak buat hotu neʼebé moris halo ho didiʼak no ida-neʼe hatudu katak iha Ida neʼebé matenek neʼebé halo buat hotu neʼe. Ema barak mós fó-agradese ba Maromak loroloron tanba prezente moris nian. Sira rekoñese katak buat hotu neʼebé sira presiza atu moris hanesan anin, bee, ai-han, no buat seluk tan, neʼe depende ba Maromak. Sira bele haksolok ho sira-nia moris tanba Maromak fó buat hotu neʼe.

Sin, ita tenke agradese ba Maromak ho buat hotu neʼe, tanba nia mak ita-nia Kriadór no Ida neʼebé fó buat hotu neʼebé ita presiza atu moris. (Salmo [Mazmur] 104:10-28; 145:15, 16; Apóstolu 4:24) Ita bele hafolin liután Maromak  nia domin ba ita kuandu ita hanoin kleʼan kona-ba buat hotu neʼebé nia halo daudaun atu ita bele kontinua moris. Apóstolu Paulo hatete: “[Maromak] fó iis, fó moris no fó buat hotu ba ema. Tanba liuhusi nia mak ita hetan moris, book an no iha.”—Apóstolu 17:25, 28.

Maibé, Maromak la hatudu deʼit ninia domin hodi fó buat neʼebé ita presiza atu moris. Maromak fó dignidade ba ita hodi kria ita la hanesan ho animál sira. Nia fó ita kapasidade atu bele haburas relasaun diʼak ho nia no ajuda ita atu halo ida-neʼe. (Mateus 5:3) Ho nuneʼe, ema neʼebé halo tuir iha oportunidade atu sai parte ba Maromak nia família, katak sai ninia “oan sira”.—Roma 8:19-21.

Hanesan João 3:16 hatete, Maromak hatudu ninia domin ba ita hodi fó ninia Oan-Mane, Jesus, mai mundu atu hanorin ita kona-ba ninia Aman no atu mate ba ita. Maibé, ema barak dehan katak sira ladún komprende tanbasá mak Jesus presiza mate ba ita ema, no oinsá mak Jesus nia mate hatudu Maromak nia domin ba ita. Mai ita haree oinsá mak Bíblia esplika razaun tanbasá mak Jesus presiza mate no husi ninia mate ita bele hetan buat diʼak saida.

Ohin loron, ema hotu sai moras, ferik-katuas, no ikusmai mate. Maibé, ida-neʼe laʼós Maromak Jeová nia hakarak. Kuandu nia kria ema primeiru, nia fó sira oportunidade atu moris ba nafatin iha mundu neʼebé hanesan jardín Eden. Maibé atu hetan ida-neʼe, sira presiza halo buat ruma. Saida mak neʼe? Sira presiza halo tuir Maromak. Maromak dehan katak se sira deside atu la halo tuir Nia, sira sei mate. (Gênesis [Kejadian] 2:17) Adão hili atu kontra Maromak nia direitu atu ukun, no ida-neʼe lori rezultadu mate ba ninia an, no mós ninia oan no bei-oan sira. Apóstolu Paulo hatete: “Liuhusi ema ida mak sala tama iha mundu, no mate tanba sala. Nuneʼe mate habelar ba ema hotu tanba ema hotu sala.”—Roma 5:12.

Maibé, Maromak “hadomi justisa”. (Salmo [Mazmur] 37:28) Tan neʼe, Maromak fó kastigu ba Adão tanba ho neon nia kontra hasoru Maromak. Maski nuneʼe, Maromak lakohi ema hotu atu nafatin hetan terus no mate tanba Adão nia sala. Saida mak Maromak halo? Hodi halaʼo justisa neʼebé loos, nia halo tuir ninia ukun-fuan kona-ba “moris troka moris”, no ida-neʼe loke dalan ba ema neʼebé halo tuir nia atu hetan moris rohan-laek. (Êxodo [Keluaran] 21:23) Maibé karik Ita husu: ‘Oinsá mak bele hetan fali moris perfeitu neʼebé Adão halo lakon?’ Resposta: Ema ida tenke fó moris perfeitu hanesan ho Adão nian.

Klaru katak Adão nia bei-oan ida neʼebé sala-naʼin la bele troka moris perfeitu neʼebé Adão halo lakon, maibé Jesus bele. (Salmo [Mazmur] 49:6-9) Kuandu Jesus moris mai, nia la simu Adão nia sala, nuneʼe nia perfeitu hanesan ho Adão antes nia halo sala. Tan neʼe, hodi fó ninia moris nuʼudar sakrifísiu, Jesus bele halo ema livre husi sala. Hodi halo nuneʼe, nia fó oportunidade ba Adão no Eva nia bei-oan sira atu hetan  moris perfeitu neʼebé Adão no Eva halo lakon. (Roma 3:23, 24; 6:23) Maibé iha buat ruma neʼebé ita presiza halo atu hetan oportunidade kapás neʼe ka lae?

Iha João 3:16, ita mós lee liafuan tuirmai neʼe: “Atu ema hotu neʼebé fiar iha [Jesus] la bele lakon, maibé hetan moris rohan-laek.” Ida-neʼe hatudu katak atu ita hetan prezente moris rohan-laek, ita presiza halo buat ruma. Neʼe mak fiar no halo tuir Jesus.

Karik Ita hanoin: ‘Halo tuir envolve saida deʼit?’ Jesus hatete katak “ema hotu neʼebé fiar iha nia” sei hetan moris rohan-laek, loos ka lae? Maski fiar mak importante duni, maibé Bíblia mós dehan katak atu iha fiar deʼit, neʼe latoʼo. Atu Maromak simu ita, latoʼo atu fiar deʼit katak Jesus mak ita-nia Salvadór. Ita mós presiza hakaʼas an atu halo tuir buat neʼebé Jesus hanorin. Hanesan Bíblia hatete: “Fiar la hamutuk ho hahalok mate.” (Tiago 2:26) Entaun, ema neʼebé hatudu fiar iha Jesus, tenke moris tuir ho buat neʼebé nia fiar.

Apóstolu Paulo esplika liután ida-neʼe hodi hatete: “Kristu nia domin book ami makaʼas, no ida-neʼe mak ami hatene: Mane ida [Jesus] mate ba ema hotu . . . no nia mate ba ema hotu atu nuneʼe sira neʼebé moris sei la moris tan ba sira-nia an rasik, maibé moris ba ida neʼebé mate ba sira no neʼebé moris hiʼas ona.” (2 Korinto 5:14, 15) Tanba ita hafolin duni Jesus nia sakrifísiu, neʼe book ita atu troka ita-nia moris. Ita sei la moris tan ba ita-nia an rasik, maibé ba Jesus neʼebé mate ba ita. Ida-neʼe katak ita tenke tau uluk iha ita-nia moris buat neʼebé Jesus hanorin. Kuandu ita halo hanesan neʼe, ida-neʼe sei kona ita-nia hahalok, desizaun, no buat hotu neʼebé ita halo. Maibé, bensaun saida mak sira neʼebé hatudu fiar ba Jesus sei hetan?

Husi parte ikus iha João 3:16, fó sai Maromak nia promete ba sira neʼebé hatudu fiar iha Jesus nia sakrifísiu no moris tuir Maromak nia hakarak. Maromak promete katak ema neʼebé hatudu fiar “la bele lakon, maibé hetan moris rohan-laek”. Maibé, Maromak fó esperansa neʼebé la hanesan ba ema neʼebé hatudu fiar no halo tuir nia.

Jesus promete ba grupu ida kona-ba moris rohan-laek iha lalehan. Antes nia fila fali ba lalehan, nia fó-hatene ba ninia dixípulu sira neʼebé laran-metin katak nia bá atu prepara fatin ba sira hodi sira bele ukun hamutuk ho nia iha lalehan. (João 14:2, 3; Filipe 3:20, 21) Sira neʼebé atu hetan moris-hiʼas atu bá lalehan “sei sai nuʼudar amlulik ba Maromak no Kristu, no sei ukun nuʼudar liurai hamutuk nia ba tinan 1.000”.—Apokalipse 20:6.

Maibé, ema uitoan deʼit husi Jesus nia dixípulu sira mak sei simu esperansa kapás neʼe. Jesus hatete: “Keta taʼuk, bibi-lubun kiʼik, tanba imi-nia Aman deside ona atu fó ba imi Ukun neʼe.” (Lucas 12:32) “Bibi-lubun kiʼik” neʼe ema naʼin-hira? Eskritura iha Apokalipse 14:1, 4 hatán: “Haʼu haree Bibi-Oan [Jesus neʼebé moris-hiʼas ona] hamriik iha Foho Siaun [lalehan] nia leten hamutuk ho ema naʼin-144.000, no iha sira-nia reen-toos hakerek tiha Bibi-Oan nia naran no ninia Aman nia naran. . . . Sira mak ema neʼebé sosa ona husi ema seluk nia leet nuʼudar ai-fuan primeiru ba Maromak no ba Bibi-Oan.” Se kompara ho ema rihun ba rihun neʼebé moris iha mundu, ema naʼin-144.000 mak hanesan “bibi-lubun kiʼik” deʼit. Bíblia dehan katak sira-neʼe sei sai liurai, entaun sira sei ukun sé?

Jesus mós koʼalia kona-ba grupu segundu husi ninia dixípulu sira neʼebé laran-metin neʼebé sei hetan buat diʼak husi ninia Ukun iha lalehan. Iha João 10:16 Jesus hatete: “Haʼu iha bibi seluk tan neʼebé seidauk tama iha luhan neʼe, sira mós haʼu tenke lori, no sira sei rona haʼu-nia lian, no sira sei sai luhan ida deʼit, no iha bibi-atan ida deʼit.” “Bibi seluk” sira-neʼe hein atu simu moris rohan-laek iha mundu, esperansa neʼebé uluk Maromak fó ba Adão no Eva, maibé sira lakon kuandu sira halo sala. Oinsá mak ita hatene katak “bibi seluk” sira-neʼe nia esperansa mak atu moris ba nafatin iha rai?

Eskritura barak iha Bíblia koʼalia katak iha futuru mundu neʼe sei sai fali hanesan jardín Eden. Ita bele loke Ita-nia Bíblia no lee rasik kona-ba  neʼe iha eskritura sira tuirmai neʼe: Salmo (Mazmur) 37:9-11; 46:8, 9; 72:7, 8, 16; Isaías (Yesaya) 35:5, 6; 65:21-23; Mateus 5:5; João 5:28, 29; Apokalipse 21:4. Eskritura sira-neʼe fó-hatene nanis katak funu, hamlaha, moras, no mate sei la iha tan. No mós fó-hatene kona-ba tempu neʼebé ema diʼak sira sei kontente tanba sira bele harii sira-nia uma rasik, kuda iha sira-nia toʼos rasik, no haboot sira-nia oan iha mundu neʼebé hakmatek. a Esperansa neʼe mak furak tebes, loos ka lae? Ita bele fiar katak lakleur tan Maromak nia promete sira-neʼe sei sai loos.

Kuandu Ita fó tempu hodi hanoin buat hotu neʼebé Maromak halo ona ba Ita rasik no ba ema hotu iha mundu, klaru katak Maromak halo ona buat barak, loos ka lae? Maromak fó ita moris, matenek, saúde neʼebé ajuda ita halaʼo moris loroloron nian, no buat neʼebé ita presiza atu kontinua moris. Liután neʼe, hanesan ita foin aprende husi João 3:16, Maromak fó prezente folin-boot ba ita hodi fó Jesus nia moris nuʼudar sakrifísiu atu salva ita husi sala no mate. No ida-neʼe loke dalan atu ita hetan bensaun furak liu.

Hanoin toʼok, ita bele moris ba nafatin iha mundu neʼebé hakmatek no hanesan jardín neʼebé furak tebes. Funu, hamlaha, ka mate sei la iha tan. Ida-neʼe sei halo ita kontente tebes no mós loke dalan ba ita atu simu bensaun seluk tan. Maibé, Ita sei hetan bensaun furak neʼe ka lae? Ida-neʼe depende ba Ita. Ita sei hatán oinsá ba pergunta neʼe: ‘Agora daudaun, saida mak Ita halo ba Maromak?’