BA EMA balu, tentasaun mak hanesan buat ida neʼebé sira gosta tebes. Maibé ba ema seluk tentasaun mak hanesan inimigu ida neʼebé buka hela sira, no sira hakarak tebes manán inimigu neʼe. Ita hanoin oinsá? Kuandu ita hasoru tentasaun, ita sei hakaʼas an atu kontra tentasaun neʼe ka Ita sei monu deʼit?

Iha tentasaun boot no mós iha tentasaun kiʼik. Porezemplu, tentasaun kiʼik hanesan han rebusadu uitoan sei la estraga saúde. Maibé monu ba tentasaun seluk bele lori rezultadu neʼebé aat tebes, liuliu se ita monu ba tentasaun hodi halo sala-foʼer. Bíblia fó avizu hodi dehan: “Ema naran deʼit neʼebé halo sala-foʼer . . . mak beik-teen, ema neʼebé halo ida-neʼe lori susar ba ninia moris rasik.”—Provérbios (Amsal) 6:32, 33.

Se derrepente deʼit tentasaun ida mosu, ita tenke halo saida? Bíblia fó resposta: “Imi ida-idak tenke hatene oinsá atu kontrola imi rasik nia isin hodi hanoin-hetan buat neʼebé santu no respeitu.” (1 Tesalónika 4:3, 4) Oinsá mak ita bele kontrola an hodi la monu? Hanoin kona-ba buat tolu tuirmai neʼebé bele ajuda ita.

Haree beibeik ba dezeñu sira neʼebé hatudu buat seksuál nian, sei halo hakarak aat sai makaʼas hanesan fui gazolina ba ahi. Jesus hatete katak, bainhira ema nia matan hateke ba buat ruma, ida-neʼe bele halo ema sai kaan. Nia dehan: “Ema neʼebé hateke beibeik ba feto ida toʼo kaan nia, ema neʼe halo ona sala-foʼer ho feto neʼe iha ninia laran.” Depois, nia dehan: “Neʼe duni, se ó-nia matan sorin loos halo ó sidi, losu sai nia no soe dook tiha.” (Mateus 5:28, 29) Ho liafuan sira-neʼe, saida mak Jesus hanorin ita? Atu hasoru tentasaun, keta husik ita-nia matan katar atu haree beibeik ba dezeñu sira neʼebé aat.

Hanoin toʼok ai-knanoik neʼe: Dala ruma hateke liu ba loro-matan halo ita-nia matan moras, maibé  ita tenke tanaat nafatin ba loro-matan ka lae? Lae! Ita sei taka ita-nia oin ka hateke sees kedas atu la bele estraga ita-nia matan. Se ita haree kois buat ruma iha livru, komputadór ka iha ita-nia oin neʼebé sei hamosu hanoin foʼer, lalais haree fali ba buat seluk. Ita tenke proteje ita-nia neon atu la foʼer. Juan, neʼebé uluk toman atu haree pornografia, hatete: “Kuandu haʼu haree feto bonita ida, baibain haʼu hakarak fihir hela deʼit. Tan neʼe, haʼu obriga an atu haree ba buat seluk, no haʼu dehan ba haʼu-nia an: ‘Ó tenke halo orasaun ba Maromak Jeová. Agora kedas!’ Depois halo tiha orasaun, lakleur deʼit hakarak neʼe lakon.”—Mateus 6:9, 13; 1 Korinto 10:13.

Hanoin kona-ba ema fiar-naʼin ida naran Job, nia dehan: “Haʼu halo aliansa ho haʼu-nia matan. Entaun oinsá mak haʼu bele hateke fali ba feto-raan ida?” (Jó [Ayub] 31:1) Oinsá ho Ita? Ita mós bele halo promete hanesan neʼe ka lae?

Koko toʼok halo ida-neʼe: Se derrepente deʼit Ita haree buat neʼebé atu tenta Ita, lalais hateke sees kedas. Ita bele banati-tuir Bíblia nia hakerek-naʼin ida neʼebé dehan: “Keta husik haʼu-nia matan atu haree buat neʼebé la iha folin.”—Salmo (Mazmur) 119:37.

Ita hotu sala-naʼin, tan neʼe dala ruma ita sei luta hasoru hakarak neʼebé aat. Bíblia hatete: “Basá ema ida-idak hetan koko liuhusi ninia hakarak rasik neʼebé dada nia no lohi nia. No kuandu hakarak neʼe sai buras ona, neʼe hamosu sala.” (Tiago 1:14, 15) Oinsá mak ita bele sees husi situasaun neʼebé hanesan lasu perigu ida?

Kuandu hakarak aat mosu iha ita-nia laran, ida-neʼe fila fali ba ita-nia an rasik saida mak ita sei halo. Diʼak liu hakaʼas an atu luta hasoru hakarak sira-neʼe no hasai husi ita-nia neon. Halo desizaun metin atu la hanoin kona-ba hakarak aat neʼe. Mane ida naran Troy, nia uluk iha toman atu haree pornografia iha internét. Nia hatete: “Haʼu hakaʼas an atu hasai hanoin sala husi haʼu-nia neon hodi hanoin fali ba buat neʼebé diʼak. Neʼe la fasil. Foufoun hanoin aat mosu fali maibé ikusmai haʼu bele kontrola haʼu-nia hanoin.” Feto ida naran Elsa, luta hasoru hakarak aat bainhira nia sei joven. Kona-ba tempu neʼe, nia hatete: “Haʼu halo haʼu-nia an okupadu nafatin no halo  orasaun ba Jeová, ida-neʼe ajuda haʼu atubele kontrola haʼu-nia hanoin neʼebé ladiʼak.”

Koko toʼok halo ida-neʼe: Se hanoin neʼebé aat mosu iha Ita-nia neon, para kedas no halo orasaun ba Jeová. Hodi bele kontra hasoru hakarak aat, Ita presiza hakonu ita-nia neon ho “buat sira neʼebé loos, buat sira neʼebé sériu, buat sira neʼebé diʼak, buat sira neʼebé moos, buat sira neʼebé fó ksolok, buat sira neʼebé iha folin”. —Filipe 4:8.

Se ema iha hakarak aat ruma iha ninia laran, kuandu nia hetan tentasaun no nia iha oportunidade diʼak atu halo buat hirak-neʼe, nia sei monu lalais. Rezultadu mak aat tebes. (Provérbios [Amsal] 7:6-23) Oinsá mak ita bele sees an husi susar neʼe?

Bíblia fó konsellu ba ita: “Ema neʼebé matenek haree perigu no buka atu subar nia an, maibé ema neʼebé ladún iha esperiénsia kontinua laʼo no loloos hetan susar.” (Provérbios [Amsal] 22:3) Kuidadu tebes kuandu halo desizaun. Hanoin nanis kona-ba situasaun neʼebé bele halo ita monu ba tentasaun, no hakaʼas an atu sees husi situasaun sira-neʼe. (Provérbios [Amsal] 7:25) Mane ida naran Filipe, neʼebé para ona haree pornografia, hatete: “Ami-nia komputadór haʼu tau iha fatin neʼebé ema hotu bele haree no tau programa ida hodi dezeñu aat la mosu. No haʼu loke internét só deʼit kuandu ema seluk iha.” Troy, neʼebé temi tiha ona mós dehan: “Haʼu la nonton filme neʼebé hatudu buat seksuál nian, no haʼu mós la ransu ho ema neʼebé koʼalia beibeik kona-ba seks. Haʼu lakohi tau haʼu-nia an iha situasaun neʼebé perigu.”

Koko toʼok halo ida-neʼe: Hanoin didiʼak kona-ba Ita rasik nia fraku mak saida, no planu nanis atu sees husi situasaun neʼebé bele halo Ita monu ba tentasaun.—Mateus 6:13.

Oinsá se ita hakaʼas an maibé monu nafatin ba tentasaun? Se nuneʼe, keta laran-tun no keta rende an. Bíblia hatete: “Ema laran loos ida karik monu ba dala hitu, maski nuneʼe nia sei hamriik fali.” (Provérbios [Amsal] 24:16) Neʼe duni, ita-nia Aman iha lalehan fó laran-manas ba ita atu “hamriik fali”. Ita sei simu ninia ajuda ka lae? Keta kole atu halo orasaun ba nia. Haburas fiar hodi estuda ninia Liafuan. Tuir reuniaun kristaun sira hodi hametin ita-nia laran. Hanoin nafatin Maromak nia promete ida-neʼe: “Haʼu sei hametin ó, sin haʼu sei ajuda ó.”—Isaías [Yesaya] 41:10.

Cody, neʼebé temi tiha ona, hatete: “Haʼu presiza hakaʼas an duni hodi luta hasoru haʼu-nia toman haree pornografia. Haʼu monu dala barak, maibé ho Maromak nia ajuda, ikusmai haʼu husik tiha toman neʼe.” Dylan, neʼebé mós temi ona, dehan: “Se haʼu hakarak, fasil deʼit ba haʼu atu halo sala ho haʼu-nia kolega serbisu. Maibé haʼu dehan ‘Lae!’ ba nia no haʼu-nia desizaun neʼe metin. Haʼu sente kontente tebes tanba haʼu-nia laran moos, maibé importante liu, haʼu hatene katak Jeová hafolin haʼu.”

Se Ita mós hamriik metin hodi tahan hasoru tentasaun, Ita bele fiar katak Maromak sei hafolin mós Ita!—Provérbios (Amsal) 27:11.