Sukursál Arjentina halo arranju ba kampaña espesiál atu haklaken iha área izoladu sira iha rai-Arjentina no rai-Uruguai, husi fulan-Janeiru toʼo fulan-Abríl 2023. Haklaken-naʼin hamutuk naʼin-9.500 liu mak partisipa, no sira fahe ba grupu maizumenus 700. Sira ajuda kongregasaun 146 husi Testemuña ba Jeová iha área izoladu sira-neʼe.

Ema naʼin millaun ida liu hela iha sidade kiʼik sira, knua sira, no área rurál iha rai-Arjentina no rai-Uruguai. Husi tinan tolu liubá toʼo agora, susar ba haklaken-naʼin sira atu vizita fatin sira-neʼe. Ita-nia irmaun-irmán sira kontente tebes atu komesa fali haklaken Bíblia nia mensajen iha área izoladu sira-neʼe.

Irmaun Adrián Donadío no ninia feen, Karina hetan knaar atu haklaken iha Tartagal, rai-Arjentina. Sira halo viajen ba kilómetru 1.600 atu toʼo fatin neʼe. Adrián hatete: “Bainhira ami haree katak ema presiza tebes atu aprende kona-ba Maromak, ami sente kontente tebes atu ajuda sira hetan kmaan husi liafuan diʼak.”

Antes pandemia, haklaken-naʼin rua iha sidade Barrancas, rai-Arjentina, vizita feen-laʼen ida neʼebé idade 90 liu no komesa estuda Bíblia. Tanba sira hela iha fatin dook no internét la diʼak, sira lakon kontaktu ho kongregasaun ba tinan tolu. Maibé sira kontinua lee Bíblia loroloron no halo orasaun ba Jeová atu ema ba vizita fali sira. Sira haksolok tebes bainhira irmaun-irmán vizita sira durante kampaña. Sira agradese ba Jeová tanba hatán sira-nia orasaun, no sira komesa fali estuda Bíblia.

Irmaun Eduar Ferreira no ninia feen, Alejandra, serbí nuʼudar pioneiru iha Montevideu, rai-Uruguai. Sira partisipa iha kampaña espesiál no halo viajen dook maizumenus kilómetru 400 atu bá área izoladu iha rai neʼe. Sira-nia oan naʼin-tolu neʼebé idade 17, 15 no 11 mós tuir sira. Eduar dehan: “Kapás loos atu haree ami-nia oan haklaken ho kontente. Nuʼudar família ida, ami sei dehan katak ami prontu ba kampaña tuirmai!”

Ami kontente atu haree dalan neʼebé Jeová haraik bensaun ba ita-nia irmaun-irmán sira nuʼudar sira hakaʼas an atu “fó sasin ho didiʼak” iha área izoladu sira-neʼe.—Apóstolu 10:42.