Iha 25 Maiu 2022, irmaun Dennis Christensen toʼo ona iha Dinamarka ho seguru. Iha loron antes neʼe, autoridade iha Rúsia hasai nia husi komarka no deporta kedas nia. Ema muda nia ba komarka oioin iha tinan lima nia laran.

Irmaun Dennis dehan: “Haʼu kontente tebes sai livre husi komarka no hamutuk fali ho haʼu-nia feen doben, Irina. Apoiu husi irmaun-irmán sira iha mundu tomak mak prezente husi Jeová. Haʼu kontinua halo orasaun ba irmaun-irmán sira neʼebé hetan terus no iha komarka laran tanba kaer metin ba sira-nia fiar ho aten-brani.”

Dennis no Irina hetan apoiu husi sira-nia belun no família iha dalan espirituál no fíziku. Sira dehan: “Ami hein namanas atu adora Jeová ho livre hamutuk ho irmaun-irmán sira iha Dinamarka.”

Iha loron 25 Maiu 2017, autoridade Rúsia neʼebé lori armas tama reuniaun-fatin iha Oryol bainhira nia atende hela reuniaun, no sira kaer nia. Ikusmai nia hetan akuzasaun katak nia mak organiza atividade husi relijiaun neʼebé konsidera nuʼudar seita fanátiku, neʼebé Tribunál Aas Liu iha Rúsia bandu ona iha fulan ida antes neʼe.

Autoridade Rúsia konfirma beibeik katak sira-nia desizaun iha tinan 2017 aplika deʼit ba Testemuña ba Jeová nuʼudar organizasaun legál, maibé neʼe laʼós atu hanetik Testemuña ida-idak nia direitu atu halaʼo sira-nia adorasaun. Maski nuneʼe, komesa husi irmaun Dennis nia kazu, sira kontinua halaʼo kampaña atu kaer Testemuña barak iha Rúsia no Crimea no hatama ba komarka.

Agora daudaun, irmaun-irmán hamutuk naʼin-91 mak iha komarka laran. Ita harohan ba Jeová atu kontinua apoia no “hafolin tebes” sira neʼebé hatudu laran-metin ba nia.—Salmo 4:3.