Irmaun Bryn hela iha Karolina Norte, Estadus Unidus no nia mak membru ba Komisaun neʼebé Komunika ho Ospitál. Komisaun neʼe komunika beibeik ho ospitál oioin hodi ajuda pasiente Testemuña ba Jeová.

 Tanba pandemia COVID-19, ospitál barak la husik ema tama arbiru ba ospitál atu vizita pasiente. Bryn hakarak kontinua apoia pasiente Testemuña sira, tan neʼe nia telefone diretór iha ospitál neʼebé halo arranju atu pasiente sira bele simu kmaan tuir sira-nia relijiaun, hodi buka-hatene oinsá nia bele halo nuneʼe.

 Bryn koʼalia ho diretór nia asistente. Tanba ema labele tama arbiru ba ospitál atu vizita pasiente, Bryn husu ajuda ba asistente neʼe atu fó ninia númeru telefone ba pasiente Testemuña sira hodi nuneʼe sira bele kontaktu nia. Asistente dehan bele.

 Bryn mós hanoin kona-ba ema neʼebé serbisu iha ospitál. Nia fó sai ba asistente neʼe katak nia sente agradese ba sira neʼebé serbisu iha ospitál no espera katak sira nafatin iha saúde neʼebé diʼak. Bryn mós hatete katak nia rona ema iha fatin hotu hasoru daudaun estrese boot tanba pandemia neʼe, liuliu ema sira neʼebé serbisu iha ospitál.

 Asistente neʼe fó sai katak COVID-19 lori estrese boot ba ema neʼebé serbisu iha ospitál.

 Tuirmai, Bryn dehan: “Ami-nia website iha informasaun neʼebé bele ajuda ema atu tahan hasoru estrese. Se Ita loke website jw.org no ketik liafuan ‘estrese’ iha kaixa atu buka informasaun, Ita sei hetan informasaun oioin neʼebé bele anima Ita-nia maluk sira.”

 Bainhira sira koʼalia hela, asistente neʼe loke website jw.org no ketik liafuan ‘estrese’ iha kaixa atu buka informasaun, no haree informasaun oioin. Nia dehan: “Wow! Haʼu sei hatudu neʼe ba diretór. Neʼe sei ajuda serbisu-naʼin sira no ema seluk tan. Haʼu sei print informasaun no fahe ba sira.”

 Semana balu liutiha, Bryn koʼalia ho diretór. Diretór dehan katak nia no ninia asistente haree website neʼe no print informasaun oioin kona-ba oinsá atu tahan hasoru estrese hodi fó ba enfermeira no serbisu-naʼin sira iha ospitál.

 Bryn dehan: “Diretór neʼe fó obrigadu ba buat neʼebé Testemuña sira halo no informasaun diʼak oioin neʼebé ajuda tebes sira.”