Iha 2005, feto ida iha Índia naran Sowbhagya lakon ninia laʼen tanba mate. Ninia laʼen sempre tau matan nia no sira-nia oan-feto neʼebé tinan tolu naran Meghana. Agora susar ba Sowbhagya atu hetan osan neʼebé natoon ba nia no ninia oan nia presiza.

 Aat liután, ema seluk la simu Sowbhagya. Ninia família trata nia ho ninia oan-feto nuʼudar ema kiak neʼebé sempre husu ezmola, no sira sempre hatete ba nia katak nia hanesan naha todan ida ba sira. Sowbhagya hakarak atu hetan kmaan, tan neʼe nia komesa bá igreja iha ninia área, maibé ema iha neʼebá haree nia la vale tanba nia kiak. Sowbhagya komesa buka serbisu atu nuneʼe nia bele hetan osan atu sustenta nia no ninia oan-feto nia moris. Maibé, maski nia koko makaʼas, nia la hetan serbisu.

 Sowbhagya hatete: “Haʼu sente lakon esperansa, entaun haʼu deside atu oho an. Maibé, haʼu hatene katak se haʼu la iha, haʼu nia oan-feto sei hasoru problema barak. Entaun haʼu deside atu halakon ami naʼin-rua nia moris.” Sowbhagya sente la iha folin no ema la hadomi nia, tan neʼe nia bá sosa venenu.

 Nuʼudar Sowbhagya fila ba uma saʼe komboiu, Testemuña ba Jeová ida naran Elizabeth hakbesik no komesa koʼalia ba nia. Sowbhagya esplika katak nia la iha serbisu, no Elizabeth ho laran-diʼak oferese atu ajuda nia buka serbisu. Elizabeth mós hatete katak nia atu ba estuda Bíblia ho ema. Neʼe halo Sowbhagya hakfodak tanba maski nia ba ona igreja barak maibé nia nunka rona kona-ba ema estuda Bíblia. Elizabeth konvida Sowbhagya atu vizita nia hodi bele haree oinsá sira halaʼo estuda Bíblia.

 Bainhira Sowbhagya toʼo uma, nia nafatin hanoin atu oho an. Maibé, ninia família lori Meghana ba viajen, entaun Sowbhagya deside atu hein toʼo ninia oan-feto fila ba uma mak nia foin oho ninia an no mós ninia oan-feto.

 Antes ninia oan-feto fila fali, nia vizita Elizabeth no Elizabeth simu nia ho laran-diʼak. Durante nia vizita, Elizabeth hatudu livru Tuir loloos, Saida mak Bíblia Hanorin? ba Sowbhagya, no Sowbhagya hakarak atu aprende liután kapítulu kona-ba “Ema neʼebé mate ona iha neʼebé?” Nia interese ba kapítulu neʼe tanba ninia laʼen foin mak mate. Iha loron neʼe kedas, Sowbhagya dehan katak nia hakarak estuda Bíblia.

 Elizabeth konvida Sowbhagya atu tuir reuniaun boot neʼebé sei halaʼo semana oin, no Sowbhagya hakarak tuir. Nia gosta tebes buat neʼebé nia rona no nia deside katak nia hakarak sai Testemuña ba Jeová. No nuʼudar nia fila ba uma, nia hetan serbisu.

 Sowbhagya kontinua estuda Bíblia. Agora, duké hanoin atu oho an, nia iha razaun atu hakarak kontinua moris. Nia hetan batizmu, no tuirmai, ninia oan-feto Meghana mós hetan batizmu. Ohin loron, sira naʼin-rua serbí nuʼudar pioneiru regulár, no Meghana serbí iha eskritóriu tradusaun ida iha Índia.

 Sowbhagya no Meghana agradese tebes tanba Elizabeth hakbesik ba Sowbhagya iha komboiu, hatudu interese husi laran, no mós koʼalia ba nia kona-ba lia-loos! Sira mós agradese tebes ba Jeová. Meghana hatete: “Se ami la aprende lia-loos iha tempu neʼebá, karik agora ami mate tiha ona. Ami kontente tebetebes agora. Haʼu no haʼu-nia amá hein namanas ba tempu neʼebé ami bele hakoʼak haʼu-nia apá fali, hanorin nia kona-ba Jeová, no fó-hatene nia kona-ba oinsá Jeová salva ami-nia moris.”