Karazam-piagne hafa o rémorao. Mahavita mipiteke ndra mipetrake amy ty biby hafa agnate riake agne reke. Tsy sahiragne ka reke naho fa hiala boake amy i bibỳ ey, ie amy izaò tsy tihoe mandratse i bibỳ. Tena nahaveregne o mpikarokeo o fiagne iohoe.

 Dineho zao: Mahavita mipiteke amy ty biby an-driake ey o rémorao ndra malamalama ty holy i bibỳ ndra tsy malamalama. Agnisa izay o faio, o antsantsao, o fanò, vaho o trozogneo. Ze hanegne tsy lany i biby rey ndra i kankagne kedekede rey amy ty vata i biby rey eỳ ro hane o rémorao. Tsy voatere mikezake bey reke naho fa mandeha agnate riake agne satria i biby ipetaha’ey ty minday aze. Voaro amy ty biby hihinagne aze ka reke. Mandineke o rémorao hinane zao o mpikarokeo satria tea iareo ho fantatse tie akore ty ahavità o fiagne iohoe mipiteke moramora amy ty raha isan-karaza’e, ie amy izaò afake mipiteke mafe.

 Rémora mipiteke amy ty antsantsa jabajaba

 Misy raha hoe pisake lavalava somare bontolitoly zay ty ambone ty loha o rémorao eo. Matevegne naho maleme ty sisy o raha iohoe, le afake mipiteke mafe soa ambone ze raha ipetaha’e eo reke sady tsy mora miala. Ty agnivo’e ka misy raha kedekede maro milahadahatse, sady taolagne kedekede mafe bey ty agnate’e ao. Naho hipetake amy ty biby hafa o rémorao, le mitsangagne mahitsy soa o raha milahadahatse reo sady mifampikasikasike amy ty holy i bibỳ. I taolagne mafe bey agnate’e ao rey ty magnampe aze hifampikasike soa amy i bibỳ. Sady mahay mifampikasikasike amy ty holy ty biby hafa o rémorao ro mahay mipiteke amy iareo ka. Izay ty mahavy aze hipiteke soa ambone’eo fa tsy ho votsotse, ndra tie mandeha mafe bey aza i bibỳ ndra mitsile tampoke.

 Nampieke o mpikarokeo i raha ambone ty loha o rémorao eoy, le namboatse raha mitovitovy amy io ka iareo. Somare bontolitoly lavalava ka ty pozy i rahay, sady mipiteke amy ty raha isan-karaza’e. Nandrama iareo napiteke tamy ty raha reke. Naho fa nisintonegne reke naho fa niavy eo, le tsy nimete niala sasa, ndra tie nihoatse ty lanja’e aza ty hery nampiasae iareo hisintonagne aze.

 Va’e hahavitagne fitaovagne isan-karaza’e o raha nalaegne tahake boake amo o rémorao iohoe. Agnisa izay ty fitaovagne apetake amy ty biby agnate riake agne naho fa hanao fikarohagne miomba o bibio iareo, ndra fitaovagne fikarohagne miomba ty fara’e ambane i riakey agne. Eo ka ty fitaovagne azo agnantognagne jiro ndra agnantognagne raha hafa agnate rano agne, ohatse, ambane o ragiragio ey ndra ambane sambo agne.

 Akore ty heve’o? Vokatse ty evolisiona vao ty fahaia o rémorao mipiteke amy ty biby hafa, sa nisy namorogne?