Tsy mitovy tihoe magnafake ajaja naho tihoe niafake anake. Tsy mampiasa ty rehake tihoe “fagnafahagne ajaja” ty Baiboly. Faie rehafe’e ao tie akore ty fivazohoan’Andrianagnahare ty ay o ndatio, agnisa izay o ajaja mbe an-troke aò.

 Andrianagnahare ty nagnomey aigne antikagne. (Genesisy 9:6; Salamo 36:9) Sarobily ama’e iaby ty ay ze kila ndaty, agnisa izay ty ay o ajaja mbe an-troke aò. Mamono ndaty areke ze magnafake ajaja.

 Nagnomey lily o Israelitao ty Andrianagnahare tie: “Naho misy ndaty mialy le mahavoadosy ampela mivesatse, sady terake tsy feno volagne reke faie tsy misy mate voka izay, le hampandoave ty valy i ampelay ze onetse paliae’e i ndatỳ. Haloa’e agnatreha o zizio eo zay. Fa naho misy mate voka izay, le tsy maintsy hagnomey aigne ho solo ty aigne rehe.”​—Eksodosy 21:22, 23. a

•  Fa azo rehafegne tihoe ndaty vao o ajaja mbe an-troke aò, ndra tie vaho miforogne aza?

•  Va’e mbe havelan’Andrianagnahare vao ty helo ty ndaty raike nagnafake ajaja?

•  Mete vao ty magnafake ajaja naho atahoragne ho mate i ajajay ndra i rene’ey?

 Saontsien’Andrianagnahare amy Baiboly ao tie fa ndaty ty ajaja raike, ndra tie vaho manomboke miforogne an-troke ao aza. Mitovy avao ty fiay ty ajaja mbe an-troke ao naho ty fiay o ajaja fa aterakeo, tie aman’Andrianagnahare. Intoagne misy ohatse tsiampeampe magnamaregne izay:

•   Nahazo fagnahy masigne ty Davida Mpanjaka, le nirehake taman’Andrianagnahare tie: “Nahavazoho ahy ty fihaino’o ndra tie mbe vaho niforogne aza raho.” (Salamo 139:16) Trea boake amy izay fa ndaty reke taman’Andrianagnahare, ndra tie mbe tan-troke ao aza.

•   Hoe izay ka ty Jeremia mpaminany. Mbe tsy naterake reke, le fa nisaontsy ty Andrianagnahare tie homea’e andraikitse miambake reke. Hoe ty Andrianagnahare tama’e: “Fa nifantako rehe taloha ty namorognako azo tan-troke tao, sady fa nihamasigneko rehe taloha ty niterahagne azo. Nitendréko ho mpaminany hoahy o firenenao rehe.”​—Jeremia 1:5.

•   Dokotera ty Lioka, mpanoratse Baiboly. Nisy fotoagne reke nirehake miomba ty ajaja raike mbe tan-troke ao naho ty ajaja raike vaho naterake. Rehake grike raike avao ty nampiasae’e naho fa nirehake miomba o ajaja rehoe reke.​—Lioka 1:41; 2:12, 16.

 Eka. “Mamindra fo naho soa fagnahy ty Andrianagnahare ... Manahake ty halavy ty atignanagne amy ty ahandrefagne ty halavy ty anitaha i Jehovah amantikagne ty hakeontikagne.” b (Salamo 103:8-12) Faie toko’e hagneke i ndatỳ tie sarobily aman’Andrianagnahare, ndra ty fiay o ajaja mbe an-troke aò aza. Naho tena mibebake reke, le hamela aze ty Jehovah, ndra tie fa nagnafake ajaja aza reke ndra nanao raha raty hafa. (Salamo 86:5) Tsy toko’e ho kivy naho hagnamelo-tegna bey sasa reke afara izay.

 Naho ty Baiboly ro henteagne, le tsy azo atao fialan-tsiny hagnafahagne ajaja tihoe va’e atahoragne ho mate i rene i ajajaỳ ndra i ajajay.

 Akore naho misy olagne, le tsy maintsy atao ty safidy tie ty fiay i ajajay sa ty fiay i rene’ey ro havotagne? Tsy le mpiseho mateteke ty raha hoe izay. Faie naho sendra miseho ty raha hoe izay, le anjara i tafilitse amy i raha zaỳ ty mijobogne tie ia ty ho kezahegne havotagne.