Tsy raha am-po ty Kristiana ao o Fanjakàn’Andrianagnahare zao. a Rehafe ty Baiboly tihoe “fanjakà i lagnitsey” o Fanjakàn’Andrianagnahare iohoe. Trea amy io areke ty ahafantarantikagne tie aia ty misy aze. (Matio 4:17, Dikan-drehake Protestanta) Mirehake ty Baiboly fa tena fitondram-panjakagne io sady fa minday an-dagnitse agne. Dineho ty porofo retoagne:

•   Managne mpitondra naho vahoake fehe’e o Fanjakàn’Andrianagnahare iohoe, sady managne lalàna naho fahefagne hagnatanterake ty zoton’arofon’Andrianagnahare an-dagnitse agne naho an-tane etoa.​—Matio 6:10; Apokalypsy 5:10.

•   Hanjaka amy ty “vahoake naho firenena vaho ndaty sambe hafa firehake” i Fanjakàn’Andrianagnaharey. (Daniela 7:13, 14) I Andrianagnahare ty nagnomey fahefagne ty mpitondra amo o fanjakagne iohoe fa tsy ty vahoake fehe’e.​—Salamo 2:4-6; Isaia 9:7.

•   Nirehake tamy i apostoli’e tsy nivalike rey ty Jesosy fa hiarake hanjaka ama’e amy i Fanjakagne an-dagnitse agney iareo sady “hipetrake amy ty sezan-droandriagne.”​—Lioka 22:28, 30.

•   Managne fahavalo o Fanjakagne iohoe le haringa’e iareo amy ty hoavy.​—Salamo 2:1, 2, 8, 9; 110:1, 2; 1 Korintianina 15:25, 26.

 Tsy mampianatse ty Baiboly tie agnate fo ao i Fanjakà i lagnitseỳ, le hiasa am-po o ndatio ao. Faie rehafe ty Baiboly fa “ty rehake miomba i fanjakagney” ndra ty “talily soa i fanjakagney”, le afake ty hisy voka’e amy ty fontika sady tena toko’e hisy voka’e amantika.​—Matio 13:19; 24:14.

Ino ty dika i rehake tihoe ‘agnate’areo eo i Fanjakàn’Andrianagnaharey’?

 Nanjare tsy hay o ndatio ty toeragne misy i Fanjakagney noho ty fomba nandikà ty Baiboly ila’e ty Lioka 17:21. Ty Dikan-drehake Protestanta, ohatse, mandika aze tihoe: “I Fanjakàn’Andrianagnaharey, le agnate’areo ao.” Mila magnente ty rehake magnodidigne tika mba hahaiagne ty tena dika o rehake iohoe.

 Nirehake tamo o Fariseò ty Jesosy tamo o fotoagne iohoe. Mpinday fivavahagne nanohetse i Jesosy iareo sady nipay fomba hamonoagne aze. (Matio 12:14; Lioka 17:20) Le hitombegne vao tihoe am-po o ndaty mafe fo reo ao i Fanjakàn’Andrianagnaharey, ie amy izao ty Jesosy nirehake tamy iareo tie: “Ty agnate’areo ao le tena manao soa miatreke sady feno fandikan-dalàna.”​—Matio 23:27, 28.

 Faie maregne soa ty fomba nandikà ty Baiboly hafa o reha i Jesosy amy Lioka 17:21 ao iohoe. Izao, ohatse, ty rehafe ty Dikan-drehake Angilé Moderina: “I Fanjakàn’Andrianagnaharey, le miarake ama’areo eto. (Izahay o manao soratse mandreo) Hoe ka ty Dikan-drehake Tontolo Vaovao: “Agnivo’areo eo i Fanjakàn’Andrianagnaharey.” ‘Niarake’ tamo o Fariseò ndra ‘tagnivo iareo eo’ i Fanjakàn’Andrianagnaharey satria nitsangagne tagnatreha iareo teo ty Jesosy, i tinendren’Andrianagnahare ho Mpanjaka i Fanjakà’eỳ.​—Lioka 1:32, 33.