Naho teantikagne ho fantatse tie ombia ro ho avy ty fara ty tontolo toy, le mila haintikagne heike tie inogne ty dika tihoe “ty tontolo toy” amy Baiboly ao. Mateteke ty rehake grike tihoe kôsmôs ro adika tihoe “ty tontolo toy.” Irehafagne o ndatio amy ty ankapobei’e o rehake iohoe, lohotsie fa ty ndaty tsy manompo an’Andrianagnahare. (Jaona 15:18, 19; 2 Petera 2:5) Faie kindraike le irehafagne ty rafitse misy amy ty tontolo toy eto o rehake iohoe. Agnisa izay ty varotse, ty politike naho ty fivavahagne.​—1 Korintianina 7:31; 1 Jaona 2:15, 16. a

Inogne ty dika tihoe “fara ty tontolo toy”?

 Trea amy ty Baiboly maro tihoe “fara ty tontolo toy.” Faie misy Baiboly manao aze tihoe “fifaragna ty rafitse ty tontolo toy” ndra tihoe “fiafara ty tontolo toy.” (Matio 24:3; Dikan-drehake Iombonagne a Madagasikara Eto) Tsy tihoe ho poteke areke ty tane toy ndra ho mate ze kila ndaty ambone tane eto, naho fa ho avy ty fara’e. Ty rafitse misy amy ty tontolo toy eto o hifaragneo.​—1 Jaona 2:17.

 Mirehake ty Baiboly tie ‘haringagne ty ndaty mpanao raty.’ Amy izay, le hiadagne naho ho sambatse ambone tane etoa o ndaty manao ty soao. (Salamo 37:9-11) Ombia o raty fagnahio ro haringagne? Amy i haoreagne lahibeỳ, le i aly Hara-magedonay ty hamaragne o haoreagne lahibey iohoe.​—Matio 24:21, 22; Apokalypsy 16:14, 16.

Ombia ty hiavia izay?

 Hoe ty Jesosy: “Tsy misy mahafantatse ze andro naho ze lera zay, ndra ty anjely an-dagnitse agne ndra i Anakey, naho tsy le i Rae avao.” (Matio 24:36, 42) Nirehake ka reke tie “amy ty lera tsy eretserete’areo ro hiavia i Ana o ndatỳ.” Midika zay tie ho tampoke ty hiavia ty fara’e.​—Matio 24:44.

 Faie ndra tie tsy fantantikagne aza ty andro naho ty lera hiavia ty fara’e, le fa nagnomey “famantaragne” ty Jesosy. Ty anto’e, nirehake reke tie hisy raha maromaro hiseho aloha kede ty fotoagne hiavia ty fara’e. (Matio 24:3, 7-14) “Fotoa ty fara’e” ndra “andro fara’e” ty irehafa ty Baiboly o fotoagne iohoe.​—Daniela 12:4; 2 Timoty 3:1-5.

Inogne ty raha ho sisa tavela afara izay?

 Mbe ho eo avao ty tane toy, satria mirehake ty Baiboly tie “tsy ho voaezengezegne nainai’e” o taneo. (Salamo 104:5) Hisy ndaty tsiefa ka ty an-tane etoa, satria hoe ty Baiboly: “Ty ndaty maregne ro handova ty tane toy, sady ho velogne nainai’e etoy.” (Salamo 37:29) Haheren’Andrianagnahare manahake ty tamy ty voaloha’e ty fiaignagne ambone tane etoa:

•   Paradisa.​—Isaia 35:1; Lioka 23:43.

•   Tsy hisy raha hampatahotse sady hiadagne o ndatio.​—Mika 4:4.

•   Sambe hanagne asa fanjaka naho mahafa-po ty ndaty iaby.​—Isaia 65:21-23.

•   Tsy hisy ndaty harare naho ho antetse sasa.​—Joba 33:25; Isaia 33:24.