Tsy mandeha mialy ty Vavolombelo i Jehovah noho ty anto’e retoa:

1.   Mankatò an’Andrianagnahare. Mirehake ty Baiboly fa “hanefe ty mesabei’e naho ty lasarì’e” ty mpanompon’Andrianagnahare sady “tsy hianatse aly sasa.”​—Isaia 2:4.

2.   Mankatò i Jesosy. Hoe ty Jesosy tamy i apostoly Petera: “Aheregno amy ty tragno’e i mesa’oy, fa hovonoegne amy ty mesa ze mampiasa mesa.” (Matio 26:52) Natoro i Jesosy areke fa tsy toko’e handrambe fitaovam-pialiagne ty mpanonjohy ty lia’e.

    Nandily o mpiana’eo ka ty Jesosy tie tsy toko’e ho “agnisa ty tontolo toy” iareo. Ankatoave iareo zay, le tsy militse amy ty politike iareo. (Jaona 17:16) Tsy tohere iareo ka ty raha atao o maramilao sady tsy sakana iareo ze te hanao maramila.

3.   Tea ty mpiara-belogne ama’e. Nandily o mpiana’eo mba “hifankatea” ty Jesosy. (Jaona 13:34, 35) Manjare hoe keleiagne raike magneran-tane areke iareo, le tsy mandeha mialy mba hamonoagne ty rahalahi’e naho ty rahavave’e.​—1 Jaona 3:10-12.

4.   Manahake o Kristiana voaloha’eo. Hoe ty Fangalan-kilala Miomba ty Fivavahagne Naho ty Aly (angilé): ‘Tsy nimete nandeha nialy naho nanao maramila i mpiana i Jesosy voaloha’e rey satria nampianare’e hifankatea naho ho tea ty fahavalo’e.’ Nirehake ty teolojiana alemà atao tihoe Peter Meinhold fa tamy i mpiana i Jesosy voaloha’e rey, le “tsy nimete tihoe sady Kristiana ro maramila.”

 Tena mahasoa ty fiaraha-monegne amy ty tane misy aze o Vavolombelo i Jehovah-o sady tsy magnoho-doza. Magnaja o manam-pahefàgneo zahay satria mankatò ty toro lalagne retoa:

•   “Ekeo o manam-pahefàgneo.”​—Romanina 13:1.

•   “Aloao amy i Kaisara ze ahy i Kaisara, fa aman’Andrianagnahare ka ze an’Andrianagnahare.”​—Matio 22:21.

 Mankatò lalàna areke zahay, mandoa hetra, magneke ze kezake atao o manam-pahefàgneo mba hagnasoavagne o vahoakeo.