Talily Soa Nisorate i Marka 10:1-52
-
Fanambaliagne naho fisaraham-panambaliagne (1-12)
-
Nagnomey tso-drano ajaja ty Jesosy (13-16)
-
Ty fagnontenea i ajalahy raike mpagnarivoy (17-25)
-
Raha afoe noho i Fanjakagney (26-31)
-
Mbe nirehafe i Jesosy indraike tie hovonoegne reke (32-34)
-
Fangataha i Jakoba naho i Jaona (35-45)
-
Solovoigne hagnavotagne ndaty maro ty Jesosy (45)
-
-
Nahatrea indraike ty Bartomeo (46-52)
10 Niala ty eo ty Jesosy, le nitsake i Renerano i Jordanay, le niavy tamy ty efe-tane i Joda agne. Maro ty ndaty nimbama’e mbeo, le nanomboke nampianatse iareo reke satria fa izay ty fatao’e.
2 Nisy Fariseo ka nagnantogne aze mba hitsapa hevetse aze. Nagnontenea iareo reke naho azo ty lahilahy atao ty misarake amy ty vali’e.
3 Le hoe ty navale’e iareo: “Ino ty nandilia i Mosesy anareo?”
4 Le hoe iareo: “Nenga i Mosesy ty lahilahy mba hanoratse taratasy fisaraham-panambaliagne naho fa misarake amy ty vali’e.”
5 Faie hoe ty Jesosy tamy iareo: “Noho inareo mafe fo ro nahavy i Mosesy nanoratse ho anareo ze lily zay.
6 Fa tam-boaloha’e tagne, tamy i Andrianagnahare namorogne o ndatioy, le lahilahy naho ampela ty namboare’e.
7 Izay ty anto’e mahavy o lahilahio hienga ty rae’e naho ty rene’e,
8 le hanjare ho nofotse raike iareo mirovaly. Tsy roe sasa areke iareo fa nofotse raike avao.
9 Ao areke ze naharon’Andrianagnahare baogne, tsy hosarahe o ndaty.”
10 Naho fa tagnate ze tragno raike zay ao iareo, le nagnontenea i mpiana’e rey aze ty miomba ze raha zay.
11 Le hoe reke tamy iareo: “Ze lahilahy misarake amy ty vali’e sady manambaly ampela hafa, le magnitsakitsa-baly.
12 Naho manambaly lahilahy hafa i ampela nisaraha ty vali’ey, le magnitsakitsa-baly ka.”
13 Nisy ajaja nente o ndatio ty mbamy i Jesosy mbeo mba hotsapae’e. Faie ndra nendaha i mpiana i Jesosy rey i ndaty rey.
14 Niboseke ty Jesosy naho fa nahatrea izay, le hoe reke tamy iareo: “Engao’areo ho mbamako mbetoa o ajajao fa ko sakana’areo. Ty anto’e, hoahy ze ndaty manahake iareo i Fanjakàn’Andrianagnaharey.
15 Volagneko ama’areo,* fa ndra ia ndra ia tsy mitsikombe o ajajao naho fa mandrambe i Fanjakàn’Andrianagnaharey, le tsy hizilike ao.”
16 Nisazohe i Jesosy naho nimea’e tso-drano i ajaja rey sady nametraha’e tagnagne.
17 Tamy ireke niakatse boake an-tragno aoy, le nisy lahilahy raike zay nilay mbama’e mbeo sady nanongaleke tagnatreha’e eo, le nagnontane aze tihoe: “O Mpagnanatse Soa, ino ty raha tsy maintsy ataoko mba hahazoako* i havelogne nainai’ey?”
18 Le hoe ty Jesosy tama’e: “Nagnino raho ro tokave’o tihoe soa? Andrianagnahare raike avao ro soa.
19 Hai’o sa tsy hai’o i lily manao tihoey tie: ‘Ko mamono ndaty, ko magnitsakitsa-baly, ko mangalatse, ko mitsangagne ho vavolombelogne mavande, ko mamitake, le hajao ty rae’o naho ty rene’o?’”
20 Le hoe i lahilahỳ tamy i Jesosy: “O Mpagnanatse, fa amparake ty naha kede ahy raho ro nagnorike o lily rehoe.”
21 Nagnente i lahilahỳ ty Jesosy sady izao ty nirehafe’e tama’e satria reke nitea’e: “Faie misy raha raike toy tsy ampe ama’o: Akia rehe mandehana, le avaroto ze raha anagna’o, le omeo o mahantrao ty vili’e, amy izay rehe hanagne harena an-dagnitse agne. Andao ka hagnorike ty liako.”
22 Le nandeha tamy ty alahelo’e i lahilahỳ naho fa naharey ze reha i Jesosy zay satria tena nimaro ty fanagna’e.
23 Naho fa nagnente ty magnodidigne aze ty Jesosy, le hoe reke tamy i mpiana’e rey: “Tena ho sarotse amo o mpagnarivò ty hizilike amy i Fanjakàn’Andrianagnaharey ao!”
24 Faie nigaga tamy ze reha i Jesosy zay i mpiana’e rey. Hoe indraike areke ty Jesosy tamy iareo: “Tena sarotse vata’e anio rikiahe* ty hidiragne amy i Fanjakàn’Andrianagnaharey ao!
25 Ndra mbe moramora ka ty hiziliha o ramevao amo o lavam-pinjaitseo ta tie ty hiziliha o mpagnarivò amy i Fanjakàn’Andrianagnaharey ao.”
26 Faie vao mainke nigaga iareo naho fa naharey izay, le hoe iareo: “Hisy ho voavonje avao koahe naho izay?”
27 Le nagnente iareo ty Jesosy sady nanao tihoe: “Naho amo o ndatio, le tsy hovita zay, faie tsisy raha tsy hovitan’Agnahare.”
28 Le hoe ty Petera tamy i Jesosy: “Fa nafoe’ay iaby ze kila raha mba hagnorihagne azo.”
29 Le hoe ty Jesosy: “Volagneko ama’areo, fa tsy misy ndaty fa nahafoe tragno, ndra rahalahy, ndra rahavave, ndra rene, ndra rae, ndra anake, ndra teteke noho ty amako naho i talily soay,
30 le tsy hahazo raha maro mihoatse lavitse* o raha nafoe’e rehoe amy izao. Agnisa izay ty tragno, rahalahy, rahavave, rene, anake naho teteke, vaho fagnenjehagne. Amy ty hoavy ka reke hahazo i havelogne nainai’ey.
31 Faie maro amy ze voaloha’e ro ho fara’e, le ze fara’e ro hanjare voaloha’e.”
32 Tamy iareo tan-dalagne ho a Jerosalema agney, le nandeha aloha iareo ao ty Jesosy. Nigaga i mpiana’e rey faie ze ndaty nagnorike iareo nanjare natahotse. Le nente’e niala kedekede i 12 lahy rey mba hirehafa’e amy iareo indraike ty raha hanjò aze retoa:
33 “Handeha ho a Jerosalema agne itika hinane zao, le hatolotse o lahibey ty mpisorogneo naho o mpampianatse lalànao i Ana o ndatỳ. Homelohe iareo mba hovonoegne ka reke, le hatolo iareo o ndaty boake amy ty firenena hafao.
34 Hotsikihe iareo reke, handrorà iareo, le hokaravasie iareo naho hovonoe iareo. Faie hovelogne amy ty mate reke naho fa afake telo andro.”
35 Nimbamy i Jesosy mbeo ty Jakoba naho i Jaona ana i Zebedio, le hoe iareo tama’e: “O Mpagnanatse, mba tea’ay naho atao’o ama’ay ze raha angatahe’ay ama’o.”
36 Le hoe ty Jesosy tamy iareo: “Ino ty raha tea’areo hataoko ama’areo?”
37 Le hoe iareo: “Engao zahay mba hitoboke agnila’o eo naho fa amy i Fanjakà’oy* ao rehe. Ty raike ho ankavana’o eo, le ty raike ho ankavia’o eo.”
38 Faie hoe ty Jesosy tamy iareo: “Tsy hai’areo ty raha angatahe’areo. Vita’areo vao ty hinogne amy i kope hinomakoy ndra ty hatao badisa amy i badisa hanoagne ahikey?”
39 Le hoe iareo tama’e: “Vita’ay.” Le hoe ty Jesosy tamy iareo: “Maregne zay. Hinogne amy i kope hinomakoy naho hatao badisa amy i badisa hanoagne ahikey nareo.
40 Faie ty hitoboke ankavanako eo naho ankaviako eo, le tsy anjarako ty manao izay, satria i Raeko ro hanapa-kevetse amy ze hitoboke ankavanako eo naho ankaviako eo.”
41 Naho fa naharey ty miomba izay i folo lahy rey, le niboseke tamy i Jakoba naho i Jaona.
42 Faie nitokave i Jesosy iareo sady hoe reke tamy iareo: “Fanta’areo fa manjakazaka amy ty ndaty indese’e o mpitondrao, le o manam-pahefagne amboneo magnampatse fahefagne amy ty ndaty fehe’e.
43 Faie tsy toko’e hisy hoe izay ty ama’areo eo. Fa ze te ho ambone ama’areo, le ho mpanompo’areo.
44 Le ze te ho voaloha’e ama’areo, le ho ndevo’areo.
45 Fa ndra i Ana o ndatỳ ka aza, tsy niavy mba hotompoegne fa mba hanompo naho hagnomey ty fiai’e mba ho solovoigne hagnavotagne ndaty maro.”
46 Niavy ta Jeriko agne iareo naho fa niavy eo. Faie naho fa niala boake a Jeriko ao iareo, le nisy ndaty maro nagnorike aze naho i mpiana’e rey. Nisy goa mpangatake zay, nitoboke ta moron-dalagne eo. I Bartimeo ty agnara’e (ana i Timeo reke).
47 Naho fa nirei’e tie i Jesosy te Nazareta o nandalò, le nitoka mafe reke tie: “O Jesosy Ana i Davida, mba iferegneso raho!”
48 Le nimaro ty ndaty nagnendake aze naho nampitsigne aze, faie vao mainke nitoka mafe reke tie: “O Jesosy Ana i Davida, mba iferegneso raho!”
49 Nijanogne areke ty Jesosy sady nanao tihoe: “Tokavo mbetoa reke.” Le nitokave iareo i lahilahy goay sady hoe iareo tama’e: “Mahereza rehe, le mitsangana satria fa nitoka azo reke.”
50 Natora’e areke i akanjobei’ey sady nitsangagne malaky reke, le nandeha mbamy i Jesosy mbeo.
51 Le hoe ty Jesosy tama’e: “Ino ty raha tea’o hataoko ama’o?” Le hoe i lahilahy goay: “O Rabony,* mba ampahatreavo indraike raho.”
52 Le hoe ty Jesosy tama’e: “Akia mandehana. Ty finoa’o ro nahasitragne azo.” Eo naho eo avao, le avy le nahatrea indraike i lahilahỳ sady nanomboke nagnorike aze tan-dalagne ey.
Fagnamarehagne ambane peje
^ Abt: “Volagneko ama’areo to vata’e.”
^ Abt: “handovako.”
^ Abt: “anake.”
^ Abt: “hahazo miheregne in-jato.”
^ Abt: “voninahi’oy.”
^ Agnaram-boninahitse nirehafagne o Mpampianatse jiosio.
