Talily Soa Nisorate i Marka 2:1-28
2 Faie, ie andro tsiampeampe tafara izay, le niheregne ta Kapernaomy ao ty Jesosy sady nirey o ndatio tie nijanogne tamy ze tragno raike zay ao reke.
2 Nizilike an-tragno ao ty ankamaroa i ndaty rey, le ndra ty tan-dalan-tragno eo aza nifeno ndaty. Le nanomboke nirehake tamy iareo ty saontsin’Agnahare reke.
3 Nisy lahilahy raike maleme zay, nente o ndatio tamy i Jesosy eo. Lahilahy efatse ty ninday aze tamy ty fandreagne.
4 Faie tsy afake nizilike tamy i tragno nisy i Jesosỳ ao iareo, noho ty hamaroa i ndatỳ. Hafarà’e i tafo-tragnoy ro niloaha iareo, le eo ty nanjotsoa iareo i lahilahy malemey miarake amy i fandreagne nisy azey.
5 Naho fa nahatrea ty finoa iareo ty Jesosy, le hoe reke tamy i lahilahy malemey: “Voavela ty fahota’o anake.”
6 Le nisy tamy ty mpampianatse lalàna nitoboke teo nieretseretse hoe izao:
7 “Akore ty ahavania ty lahy tia mirehake hoe izao? Manivetive an’Agnahare avao! Tsy misy afake mamela fahotagne naho tsy Andrianagnahare avao!”
8 Faie le avy le nihay i Jesosy ze raha nieretserete iareo zay, le hoe reke tamy iareo: “Nagnino nareo ro mieretseretse raha hoe izay?
9 Ty aia ty mora, ty mirehake amy i lahilahy malemey tihoe: ‘Voavela ty fahota’o’ vao sa tihoe: ‘Mitsangana, indeso o fandrea’ò, le akia mandehana’?
10 Faie mba hahafantara’areo tie managne fahefagne hamela heloke ambone tane etoy i Ana o ndatỳ ...”, le hoe reke tamy i lahilahy malemey:
11 “Izao ty rehafeko ama’o: Mitsangana, le andeso o fandrea’ò, le molia an-tragno’o agne.”
12 Nitsangagne i lahilahỳ sady le avy le nente’e i fandrea’ey, le nandeha tagnatreha i ndaty maroy eo reke. Nigaga areke iareo iaby, le nagnomey voninahitse an’Agnahare sady nanao tihoe: “Mbe tsy nahatrea raha hoe izao indraike tika!”
13 Nandeha ta moron-driake agne indraike ty Jesosy, le nisy ndaty maro ty nimbama’e mbeo, le nampianare’e.
14 Nahatrea i Levy ana-dahy i Alifeo reke naho fa niavy eo. Nitoboke tamy i birò famoriagne hetray ao ty Levy. Hoe reke tama’e: “Andao hagnorike ahy.” Le avy le nitsangagne ty Levy sady nagnorike aze.
15 Ie tafara izay, le nihinagne tan-tragno i Levy tao ty Jesosy naho i mpiana’e rey. Maro ka ty ndaty mpitake hetra naho ty mpanota niarake nihinagne tamy iareo tao. Ty anto’e, fa nanjare mpanonjohy ty lia i Jesosy ka iareo.
16 Faie naho fa nahatrea i Jesosy niarake nihinagne tamo o mpanotao naho o mpitake hetrao o mpampianatse lalànao naho o Fariseò, le hoe iareo tamy i mpiana’e rey: “Nagnino i Mpagnanatse anareoy ie miarake mihinagne amo o mpanotao naho o mpitake hetraò?”
17 Naho fa nirey i Jesosy zay, le hoe reke tamy iareo: “Tsy ty ndaty salama ro mipay dokotera fa ty ndaty marare. Tsy hitoka o ndaty maregneo ty niaviako fa o mpanotao.”
18 Nifaly hanegne o mpiana i Jaonao naho o Fariseò. Le nandeha mbamy i Jesosy mbeo iareo sady nanao tihoe tie: “Nagnino o mpiana i Jaonao naho o mpiana o Fariseò ro mifaly hanegne fa o mpiana’ò tsy mba mifaly hanegne?”
19 Hoe ty Jesosy tamy iareo: “Naho mbe amy i nama’e rey eo i mpagnengay, le tsy misy anto’e toko’e hifalia iareo hanegne. Tsy mifaly hanegne iareo naho mbe amy iareo eo i mpagnengay.
20 Faie ho avy ty andro hampialagne i mpagnengay amy iareo eo, le amy ze andro zay iareo ro hifaly hanegne.
21 Tsy misy ndaty manakeke vorodea amy ty tapa-damba vaovao. Satria naho izay ty atao’e, le horirite i tapa-damba vaovaoy i vorodeay, le vao mainke hindra i riatse ama’ey.
22 Tsy misy ndaty ka hagniligne divay vaovao amy ty siny holitse fa voroke. Satria naho izay ty atao’e, le ho riatse i siny holitsey, le i divaỳ ka hirarake an-tane eo. Fa tsy maintsy siny holitse vaovao ro isiagne divay vaovao.”
23 Ie tamy ze Sabata raike zay, le nandalo tamy ze horake zay ty Jesosy naho i mpiana’e rey, le nandrofotse voam-bare erike avao iareo nandehay.
24 Hoe areke o Fariseò tamy i Jesosy: “Nagnino iareo ro manao ty raha tsy azo atao amy ty andro Sabata?”
25 Faie hoe ty Jesosy tamy iareo: “Mbe tsy nivakie’areo tamy i Soratse Masigney ao vao tie, ino ty raha natao i Davida naho i lahilahy niarake tama’e rey naho fa nilany hanegne iareo, le nikeré?
26 Mbe tsy nivakie’areo hao i tantara i Abiatara lahibey ty mpisorogney? Nizilike tamy i anjomban’Agnaharey ao ty Davida tamy izay, le nihinagne tamy i mofo masigney,* ie amy izao tsy misy ndaty mahazo mihinagne o mofo iohoe, naho tsy o mpisorogneo avao. Nimea i Davida tamy i mofoy ka i lahilahy niarake tama’e rey.”
27 Le hoe ty Jesosy tamo o Fariseò: “I Sabatay, le natao hoahy o ndatio, fa tsy i Sabatay ro ambone ty amo o ndatio.
28 Rehafeko ama’areo, fa i Ana o ndatỳ ty Tompo o Sabatao.”
Fagnamarehagne ambane peje
^ Abt: “mofo atoro.”
